વૈશ્વિક વેચાણમાં ઘટાડા વચ્ચે ઇલોન મસ્કની માલિકીની ઇલેક્ટ્રિકલ કાર કંપની ટેસ્લા 15 જુલાઈ ભારતમાં પ્રથમ શોરૂમ ખોલશે. ઇલેક્ટ્રિક વાહન (EV) ક્ષેત્રની આ દિગ્ગજ કંપનીએ X (અગાઉ ટ્વિટર) પર તેનું પહેલું ટીઝર પોસ્ટ કર્યું હતું, તેમાં “ભારત” અને “જુલાઈ 2025” શબ્દો સાથે બહુમાળી ઇમારતો દર્શાવવામાં આવી છે. ભારતનો પહેલો શોરૂમ 15 જુલાઈના રોજ મુંબઈના બાંદ્રા કુર્લા કોમ્પ્લેક્સ (BKC)માં ખુલશે. કંપની જુલાઇના અંત ભાગમાં નવી દિલ્હીમાં બીજો શોરૂમ ખોલે તેવી શક્યતા છે.
કંપની આગામી મહિનાની શરૂઆતમાં ડિલિવરી શરૂ કરશે. વૈશ્વિક વેચાણમાં ઘટાડો થયો છે ત્યારે ટેસ્લા વિશ્વના ત્રીજા સૌથી મોટા ઓટોમોબાઈલ બજારમાં પ્રવેશ કરીને ઘટતા વેચાણનો સામનો કરવા માગે છે.
બ્લૂમબર્ગે ગયા મહિને એક રીપોર્ટમાં જણાવ્યું હતું કે ટેસ્લાની ચીન ફેક્ટરીમાંથી મોકલવામાં આવેલી કારનો પહેલો સેટ – મોડેલ Y રીઅર-વ્હીલ ડ્રાઇવ SUV – ભારતમાં આવી ગયો છે. મોડેલ Y વિશ્વની સૌથી વધુ વેચાતી ઇલેક્ટ્રિક કાર છે. ભારતમાં ૪૦,૦૦૦ ડોલરથી ઓછી કિંમતની ફુલી બિલ્ડ કારની આયાત પર 70 ટકા આયાત જકાત લાગુ પડે છે.
