યુએસ ડિસ્ટ્રિક્ટ જજ અમિત મહેતાએ મંગળવારે પોતાના ચુકાદામાં જણાવ્યું હતું કે અમેરિકાના પ્રેસિડન્ટ ડોનાલ્ડ ટ્રમ્પને 6 જાન્યુઆરી 2021ના કેપિટોલ હીલ (સંસદ) પરના હુમલાના મામલામાં કાનૂની કાર્યવાહીમાંથી મુક્તિ મળી શકે નહીં, કારણ કે તેમણે આ હુમલો કરવા માટે તેમના સમર્થકોના ટોળાની ઉશ્કેરણી કરી હતી, એવો એક ફેડરલ જજે ચુકાદો આપ્યો છે.
જજે જણાવ્યું હતું કે ‘સ્ટોપ ધ સ્ટીલ’ રેલી દરમિયાન ટ્રમ્પે આપેલા ભાષણમાં ઉશ્કેરણીજનક શબ્દો હતાં, જે અમેરિકાના બંધારણના પ્રથમ સુધારા (ફ્રી સ્પીચ) હેઠળ કાનૂની રક્ષણ હેઠળ આવતા નથી. અહીં ઉલ્લેખનીય છે વ્હાઉટ હાઉસ નજીક યોજાયેલી આ રેલી પછી ટ્રમ્પના સમર્થકોએ કેપિટલ હીલ પર હુમલો કર્યો હતો.
જજે જણાવ્યું હતું કે ટ્રમ્પ 6 જાન્યુઆરીના ભાષણ અને તે દિવસે કરેલી ઘણી સોશિયલ મીડિયા પોસ્ટ્સ જવાબદાર ઠરી શકે છે. જોકે રોઝ ગાર્ડનમાં આપેલા નિવેદનો અથવા ન્યાય વિભાગ સાથેની વાતચીત જેવા તેમના સત્તાવાર કાર્ય માટે તેમને જવાબદાર ઠેરવી શકાય નહીં.
જજ મહેતાએ તેમના ચુકાદામાં જણાવ્યું હતું કે ટ્રમ્પનું ભાષણ તેમના પ્રેસિડન્ટ પદના સત્તાવાર કાર્યોની હદમાં આવતું નથી, એટલે તેમને ઇમ્યુનિટી મળતી નથી. આ ભાષણની સામગ્રી પુષ્ટિ કરે છે કે તે સત્તાવાર કાર્ય ન હતું અને તેને કાનૂની રક્ષણ મળી શકે નહીં.
કેપિટોલ હીલ હિંસા માટે ટ્રમ્પને જવાબદાર ઠેરવી શકાય છે તેવો કોર્ટનો આ પ્રથમ ચુકાદો નથી, પરંતુ 79 પેજનો આ ચુકાદોથી આ જ કોર્ટહાઉસમાં તેમની સામે સિવિલ ટ્રાયલનો તખતો તૈયાર કરે છે. આ જ કોર્ટમાં અગાઉ 6 જાન્યુઆરીની આ હિંસા માટે આરોપ મૂકવામાં આવ્યો હતો.
ફેબ્રુઆરી 2022માં પણ જજ મહેતાએ ટ્રમ્પ વિરુદ્ધના દાવાઓ રદ કરવાનો ઇનકાર કર્યો હતો અને કહ્યું હતું કે ટ્રમ્પે પ્રેસિડન્ટ તરીકે કાનૂની દાવાથી રક્ષણ મળતુ નથી. આ ચુકાદામાં પણ જજે જણાવ્યું હતું કે તેમનું ભાષણ ઉશ્કેરણીજનક હતું. આ પછી 2022ના આ ચુકાદાને અપીલ કોર્ટે માન્ય રાખ્યો હતો, તેથી આ સમગ્ર મામલે હવે ફરી જજ મહેતા પાસે આવ્યો છે.
6 જાન્યુઆરીના દિવસે ટ્રમ્પે તેમના સમર્થકોને સંબોધતા કહ્યું હતું કે આપણે લડીશું, જોરદાર લડશું, નહીં તો દેશ નહીં બચે. આ ભાષણ પછી ભીડે યુએસ કેપિટલ પર હુમલો કર્યો હતો. અરજદારોએ જણાવ્યું હતું કે ટ્રમ્પ તે સમયે પ્રેસિડન્ટ તરીકે નહીં પરંતુ ફરીથી પદ મેળવવા માંગતા રાજકારણી તરીકે વર્તી રહ્યા હતાં, એટલે તેમને પ્રેસિડન્ટ ઇમ્યુનિટીનો લાભ મળવો જોઈએ નહીં.
