ગુજરાતના સમુદ્રી કિનારાની સુરક્ષા વ્યવસ્થાને વધુ સઘન બનાવવા ભારતીય કોસ્ટ ગાર્ડ અત્યાધુનિક સુવિધાઓથી સજ્જ જહાજ ‘ICGS શૌર્ય’ને તાજેતરમાં કાયમી ધોરણે પોરબંદર ખાતે તૈનાત કરવામાં આવ્યું છે. અગાઉ ચેન્નાઈમાં કાર્યરત આ જહાજ હવે અરબી સમુદ્રમાં કોસ્ટ ગાર્ડની ઓપરેશનલ તાકાતમાં મોટો વધારો કરશે.
ICGS શૌર્ય એ ગોવા શિપયાર્ડ લિમિટેડ દ્વારા નિર્મિત ‘સમર્થ ક્લાસ’નું ઓફશોર પેટ્રોલ વેસલ છે. આ સ્વદેશી જહાજ અંદાજે 105 મીટર લાંબુ અને 2300 ટન વજન ધરાવે છે, જે 23 નોટિકલ માઈલની મહત્તમ ઝડપે ગતિ કરવાની ક્ષમતા ધરાવે છે. તે સતત 20 દિવસ સુધી દરિયામાં રહીને 6000 નોટિકલ માઈલ સુધીનો પ્રવાસ ખેડી શકે છે. આ જહાજ પર ‘HAL ધ્રુવ’ જેવા હેલિકોપ્ટર ઉતારી શકાય તેવી વ્યવસ્થા હોવાથી સર્ચ અને રેસ્ક્યુ કામગીરીમાં તે અત્યંત મદદરૂપ સાબિત થશે. આ જહાજની તૈનાતીનો મુખ્ય ઉદ્દેશ્ય દરિયાઈ સરહદ પર સઘન દેખરેખ રાખવાનો અને માછીમારોની સલામતી સુનિશ્ચિત કરવાનો છે. આ જહાજ દરિયાઈ માર્ગે થતી દાણચોરી જેવી ગેરકાયદે પ્રવૃત્તિઓ ડામવામાં પણ મહત્વની ભૂમિકા ભજવશે.
