જીટીઆરઆઈ વિશ્લેષણ મુજબ 2.4 અબજ ડોલરની ઝીંગાની નિકાસને ફટકો પડશે, તેથી વિશાખાપટ્ટનમ ખાતેના ફાર્મમાં રોજગારી સામે જોખમ ઊભું થશે. ડાયમંડ અને જ્વેલરી ક્ષેત્રની 10 અબજની નિકાસને ફટકો પડવાથી સુરત અને મુંબઈમાં આ ક્ષેત્રમાં નોકરીઓ પર જોખમ આવશે. આ ઉપરાંત 10.8 અબજ ડોલરની વસ્ત્રોની નિકાસને ફટકો પડવાથી તિરુપુર, NCR, બેંગલુરુ જેવા સ્થળો પર મોટાપાયે છટણી થઈ શકે છે. જેમ્સ એન્ડ જ્વેલરી ક્ષેત્રના એક નિકાસકારે જણાવ્યું હતું કે જ્વેલરી અને હીરા ક્ષેત્રોમાં નોકરીઓમાં કાપ ચોક્કસપણે આવશે કારણ કે યુએસ આપણું સૌથી મોટું બજાર છે.
GTRIના જણાવ્યા અનુસાર અમેરિકામાં ભારતની નિકાસ 2025ના નાણાકીય વર્ષની 86.5 અબજ ડોલરથી ઘટીને 2026ના નાણાકીય વર્ષમાં 49.6 અબજ ડોલર થવાનો અંદાજ છે. આમ ઊંચી ટેરિફથી નિકાસમાં આશરે 43 ટકાનો જંગી ઘટાડો થશે. આની સામે 30 ટકા નિકાસ (27.6 અબજ ડોલર) ડ્યૂટીફ્રી રહેશે. આ ઉપરાંત 4 ટકા નિકાસ (3.4 અબજ ડોલર)ની ઓટો પાર્ટ્સ નિકાસ પર 25 ટકા ટેરિફ લાગુ થશે.
થિંક ટેન્ક GTRIના જણાવ્યા અનુસાર અમેરિકામાં ભારતની કુલમાંથી ભારતની 66 ટકા નિકાસ (60.2 બિલિયન) એપેરેલ, ટેક્સટાઇલ્, જેમ્સ એન્ડ જ્વેલરી, શ્રીમ્પ, કાર્પેટ અને ફર્નિચર જેવા ક્ષેત્રોમાંથી થાય છે. આ તમામ ક્ષેત્રો શ્રમપ્રધાન છે, જેથી આ ક્ષેત્રોમાં રોજગારી પર મોટું સંકટ આવશે.
કાર્પેટ (1.2 બિલિયન ડોલર), હસ્તકલા (1.6 બિલિયન ડોલર)ને અસર થશે, કારણ કે તુર્કી અને વિયેતનામને ફાયદો થશે. બાસમતી, મસાલા, ચા સહિત એગ્રીફૂડ (6 બિલિયન બિલિયનની નિકાસ)ને અસર થશે, જેનો ફાયદો પાકિસ્તાન અને થાઇલેન્ડને થશે. સ્ટીલ, એલ્યુમિનિયમ, તાંબુ (4.7 બિલિયન ડોલર), ઓર્ગેનિક રસાયણો (2.7 બિલિયન ડોલર અને મશીનરી ( 6.7 બિલિયન ડોલર)ને પણ અસર થશે.
લેધર અને ફૂટવેર ઉદ્યોગના એક અધિકારીએ જણાવ્યું હતું કે બંને દેશો વચ્ચે પ્રસ્તાવિત દ્વિપક્ષીય વેપાર કરાર (BTA) પર સ્પષ્ટતા ન થાય ત્યાં સુધી કંપનીઓને હવે સ્ટાફ ઘટાડવા અને ઉત્પાદન બંધ કરવાની ફરજ પડશે.
એપેરલ એક્સપોર્ટ પ્રમોશન કાઉન્સિલ (AEPC) ના સેક્રેટરી જનરલ મિથિલેશ્વર ઠાકુરે જણાવ્યું હતું કે 10.3 બિલિયન ડોલરની નિકાસ સાથે કાપડ ક્ષેત્ર સૌથી વધુ પ્રભાવિત ક્ષેત્રોમાંનું એક છે.
