ઇટાલીમાં વિન્ટર ઓલિમ્પિક્સના ઉદ્ધાટન સમારંભમાં દર્શકોએ અમેરિકન વાઇસ પ્રેસિડેન્ટ જેડી વેન્સ અને તેમનાં પત્ની ઉષાનો ખરાબ રીતે હુરિયો બોલાવવા અંગેની ઘટના વિશે ડોનાલ્ડ ટ્રમ્પને પત્રકાર દ્વારા પૂછવામાં આવ્યું હતું. તેના જવાબમાં તેમણે સામે પૂછ્યું હતું કે, ‘શું આ સાચું છે’. એક મહિલા પત્રકારે ટ્રમ્પને પૂછ્યું હતું કે, ‘શું તમે જોયું કે ઉદ્ધાટન સમારંભ દરમિયાન વાઇસ પ્રેસિડેન્ટનો હુરિયો બોલાવવામાં આવ્યો હતો? આ અંગે તમારી શું પ્રતિક્રિયા છે?’ આથી ટ્રમ્પ તેમને ફરીથી પોતાનો પ્રશ્ન પૂછવા માટે કહ્યું હતું. પત્રકારનો ફરીથી પ્રશ્ન સાંભળીને ટ્રમ્પના ચહેરા પર આશ્ચર્ય જોવા મળ્યું હતું. પછી તરત જ તેમણે પૂછ્યું હતું કે, ‘ના. શું તે સાચું છે? શું તે સાચું છે? આ આશ્ચર્યજનક છે કારણ કે લોકો તેમને પસંદ કરે છે. જે હોય તે, મારો અર્થ એ છે કે, તે બીજા દેશમાં છે, તમે જાણો છો, પ્રામાણિકપણે કહું તો આ દેશમાં તેમનો હુરિયો બોલાવવામાં આવતો નથી.’ મિલાનો કોર્ટીના વિન્ટર ઓલિમ્પિક ગેમ્સના ઉદ્ધાટન સમારંભમાં અમેરિકન પ્રેસિડેન્ટના પ્રતિનિધિ તરીકે ઉપસ્થિત રહેનારા વાઇસ પ્રેસિડેન્ટનું સ્વાગત કરવામાં આવ્યું હતું. જ્યારે પરેડ ઓફ નેશન્સ દરમિયાન વેન્સ દંપતી મોટા પડદા પર જોવા મળ્યું ત્યારે ત્યાં ઉપસ્થિત ટોળાએ તેમના પ્રત્યે નારાજગી વ્યક્ત કરીને તેમનો હુરિયો બોલાવ્યો હતો.
