અમેરિકન પ્રેસિડેન્ટ ડોનાલ્ડ ટ્રમ્પના સોશિયલ મીડિયા પર ભૂતપૂર્વ પ્રેસિડેન્ટ બરાક ઓબામા અને તેમનાં પત્ની મિશેલ ઓબામાને વંશીય ટિપ્પણી સાથે એક વિડીયો દ્વારા જંગલમાં રહેનારા વાનર તરીકે દર્શાવવામાં આવ્યા હતા. રીપબ્લિકન્સ અને ડેમોક્રેટ્સ બંનેએ આ પોસ્ટને અપમાનજનક વિડીયો કહેતા અંતે તે પોસ્ટને કાઢવામાં આવી હતી. આ અંગે પછી ટ્રમ્પે કહ્યું કે, તેઓ પોસ્ટ મુકવા મુદ્દે માફી માગશે નહીં. ‘મેં ભૂલ કરી નથી.’ આ પોસ્ટ મુદ્દે પર નાગરિક અધિકાર અગ્રણીઓથી લઈને પીઢ રીપબ્લિકન સેનેટર સુધીના લોકોએ વ્યાપક વિરોધ નોંધાવ્યો હતો, ત્યારપછી આ પોસ્ટ મુકવા માટે એક કર્મચારીને દોષિત ઠેરવવામાં આવ્યો હતો. વ્હાઇટ હાઉસે ગંભીર ભૂલ થઇ હોવાનું સ્વીકાર્યું હતું, બહુ જુજ કિસ્સામાં વ્હાઇટ હાઉસ ભૂલ સ્વીકારે છે. આ પોસ્ટ કાઢવામાં આવ્યા પછીના થોડાક જ કલાકોમાં પ્રેસ સેક્રેટરી કેરોલિન લેવિટે પોસ્ટ પર ‘નકલી નારાજગી’નો અસ્વીકાર કર્યો હતો. વ્હાઇટ હાઉસે કહ્યું હતું કે, એક કર્મચારીએ ભૂલથી આ વિડીયો પોસ્ટ કર્યો હતો. ટ્રમ્પે અગાઉ પણ ઓબામા વિરુદ્ધ વ્યક્તિગત આકરી ટીકા કરી હતી.
