અમદાવાદ જિલ્લાના સાણંદમાં નિર્વાણા ગ્રીન્સના વિકેન્ડ હોમ હાઇપ્રોફાઇલ પાર્ટીમાં પોલીસે દરોડા પાડીને 80થી વધુ યુવક-યુવતીઓને અટકાયતમાં લીધા હતાં. પોલીસે ઘટના સ્થળેથી વિદેશી દારુની બોટલો, હુક્કા અને ફ્લેવર્સ સહિતનો મુદ્દામાલ જપ્ત કર્યો હતો. અટકાયતમાં લેવાયલા લોકોમાં અગ્રણી બિલ્ડરો, ડોકટરો અને વ્યવસાયિકોનો સમાવેશ થતો હતો.
તમામના મેડિકલ ટેસ્ટ કરાયા હતાં. સાણંદના ગોરસ સિમ નજીક આવેલા નિર્વાણા ગ્રીન વિકેન્ડ હોમમાં એક પ્રાઈવેટ બંગલોમાં એક 25મી એનિવર્સરીની પાર્ટી હતી. જેમાં દારૂની મહેફિલનું આયોજન કરાયું હતું. અહીં ફૂડ કાઉન્ટર ગોઠવવામાં આવ્યા હતાં. આ 11 જેટલા ટેબલ પર પર કેક, હુક્કો અને દારૂ પીરસવામાં આવ્યો હતો. પોલિસે રેડ કરતા જ મહેફિલમાં ભંગ પડ્યો હતો અને ત્યાં હાજર યુવક અને યુવતીઓમાં અફરાતફરી મચી ગઇ હતી.
પોલીસ 80 જેટલા યુવક યુવતીની ધરપકડ કરીને પોલીસ સ્ટેશન લઈ આવી હતી અને ત્યાંથી સાણંદની સરકારી હોસ્પિટલ ખાતે મેડિકલ ટેસ્ટ માટે લઈ જવાયા હતા. મહિલાઓને મેડિકલ તપાસ બાદ નોટિસ ફટકારીને છોડી મૂકવામાં આવી હતી.
