મધ્યપૂર્વમાં સંઘર્ષ વચ્ચે યુનાઇટેડ આરબ અમિરાત (UAE)માં યુદ્ધ અંગે સોશિયલ મીડિયા પર ભ્રામક અને ફેક વીડિયો પોસ્ટ કરવાના આરોપમાં 19 ભારતીયો સહિત 35 વિદેશી નાગરિકોની ધરપકડ કરાઈ હતી. આ લોકો સામે મિસાઇલો અને વિસ્ફોટોના ફેક વીડિયો પોસ્ટ કરવાના આરોપ મૂકાયા હતાં.
એટર્ની જનરલના જણાવ્યા મુજબ આવા ગુનાઓ માટે ઓછામાં ઓછા એક વર્ષની જેલ અને ઓછામાં ઓછો 1 લાખ દિરહામ દંડની જોગવાઈ છે.
સત્તાવાર ન્યૂઝ એજન્સી વેમે જણાવ્યું હતું કે આરોપીઓને સામે ઝડપથી ટ્રાયલ ચલાવવામાં આવશે. રવિવારે જાહેર થયેલી યાદીમાં 17 ભારતીય સહિત વિવિધ દેશોના 25 લોકોના નામ હતાં અગાઉ શનિવારે બે ભારતીય સહિત 10ની ધરપકડનો આદેશ અપાયો હતો.
તપાસ એજન્સીએ આરોપીઓને ત્રણ જુદા જૂથોમાં વહેંચ્યાં હતાં. પ્રથમ જૂથના 10 લોકોએ દેશની એરસ્પેસમાં મિસાઈલ હુમલાના અથવા તેને તોડી પાડવાના અસલી વીડિયો પોસ્ટ કર્યા હતાં, પરંતુ તેમાં ટિપ્પણીઓ અને સાઉન્ડ ઇફેક્ટ્સ ઉમેરી હતી. આ જૂથમાં પાંચ ભારતીયો, એક પાકિસ્તાની, એક નેપાળી, બે ફિલિપિનો અને એક ઇજિપ્શિયન સામેલ છે.
બીજા જૂથે AI દ્વારા બનાવેલ વીડિયો ક્લીપ પોસ્ટ કરી હતી અથવા દેશની બહાર થયેલા હુમલાના ફૂટેજ જારી કર્યા હતા અને દાવો કર્યો હતો કે તે ઘટના દેશમાં બની હતી. આ ક્લિપ્સમાં વિસ્ફોટો અને મિસાઇલોના એઆઇ વીડિયો હતાં. ખોટા દાવાઓને વિશ્વસનીયતા આપવા અને જનતાને ગેરમાર્ગે દોરવા માટે રાષ્ટ્રીય ધ્વજ અથવા ચોક્કસ તારીખો દર્શાવવામાં આવી હતી. આ જૂથમાં સાત વ્યક્તિઓનો સમાવેશ થાય છે, જેમાં પાંચ ભારતીયો તથા નેપાળ અને બાંગ્લાદેશના એક-એક વ્યક્તિનો સમાવેશ થાય છે.
ત્રીજા જૂથના છ લોકોએ એક દુશ્મન દેશ અને તેના સૈન્યની પ્રશંસા કરતી સામગ્રી શેર કરી હતી, આ જૂથમાં પાંચ ભારતીયો અને એક પાકિસ્તાની સામેલ છે.
