ગુજરાતના મહેસાણા જિલ્લાના ઊંઝા શહેરમાં ગોડાઉનમાંથી રૂ.3 કરોડના જીરાની ચોરી અને લૂંટના કેસમાં પોલીસે એક વકીલ અને બીજા ચાર લોકોની રવિવારે ધરપકડ કરી હતી. પાટણ સ્થિત વકીલ સહિત આરોપીઓએ ૧૨ ડિસેમ્બર, ૨૦૨૫ અને ૨ જાન્યુઆરી દરમિયાન ઉનાવા હાઇવે પરના બે ગોડાઉનમાં ઘૂસવા માટે ડુપ્લિકેટ ચાવીઓનો ઉપયોગ કર્યો હતો અને રાત્રે જીરાની ટ્રકોની સેંકડો બોરીઓ ચોરી કરી હતી.
અધિકારીઓએ જણાવ્યું હતું કે જીરાના બે વેપારીઓએ 4 જાન્યુઆરીએ ઉનાવા પોલીસ સ્ટેશનમાં સ્ટોક ગાયબ હોવાનું જાણ્યા બાદ ફરિયાદ નોંધાવી હતી. આ પછી પોલીસે તપાસ ચાલુ કરી હતી. આ દરમિયાન સ્થાનિક ક્રાઈમ બ્રાન્ચને માહિતી મળી હતી કે કેટલાંક માણસો ઊંઝાના વેપારીઓનો સંપર્ક કરી રહ્યાં છે અને અસામાન્ય રીતે નીચા ભાવે જીરું ઓફર કરી રહ્યા છે. સીસીટીવી ફૂટેજ અને પોલીસને મળેલી માહિતીના આધારે એક ટ્રક ડ્રાઈવરની ઓળખ અને પૂછપરછ કરાઈ હતી. આનાથી પોલીસ એક આરોપી જુમ્મા ખાન સુધી પહોંચી હતી. આ પછી પછી સમગ્ર નેટવર્કનો પર્દાફાશ થયો હતો.
પોલીસે મુખ્ય આરોપી ઇકરામ મેમણ, વજાહત ખાન, જુમ્મા ખાન, સાદિક મેમણ અને ગૌરવ પટેલની ધરપકડ કરી હતી. ઇકરામ મેમણે પાટણ જિલ્લા કોર્ટમાં પ્રેક્ટિસ કરતો વકીલ છે. દિલ્હી સ્થિત ઇમરાન જમીલ અને તેનો અજાણ્યો સાથીદાર સહિત બીજા લોકો ફરાર છે.
તપાસમાં જાણવા મળ્યું હતું કે આરોપીઓએ ગોડાઉના તાળાઓની ડુપ્લિકેટ ચાવીઓ તૈયાર કરી હતી અને તેઓ રાત્રે તેનો ઉપયોગ કરીને ગોડાઉનમાં પ્રવેશ્યા હતાં. મજૂરો અને ટ્રક લાવવામાં આવ્યા હતા, અને 10 ટ્રીપમાં લગભગ 3 કરોડ રૂપિયાના જીરુંની ચોરી કરાઈ હતી.
પોલીસના જણાવ્યા અનુસાર આ ચોરીની યોજના દિલ્હી સ્થિત જમીલે ઘડી હતી. આરોપી વકીલે ચોરીને અંજામ આપવા માટે સ્થાનિક ગેંગ બનાવવામાં મુખ્ય ભૂમિકા ભજવી હતી. ફરાર જમીલ ચાવીઓ બનાવવામાં નિષ્ણાત છે અને કથિત રીતે ડુપ્લિકેટ ચાવીઓ તૈયાર કરતો હતો. ગૌરવ પટેલની ભૂમિકા પોલીસની ગતિવિધિ પર નજર રાખવાની હતી, જ્યારે જુમ્મા ખાને ટ્રક અને મજૂરોની વ્યવસ્થા કરી હતી.પોલીસે અત્યાર સુધીમાં ધરપકડ કરાયેલા આરોપીઓ પાસેથી 45 લાખ રૂપિયા રોકડા અને 121 બોરી જીરાનો સ્ટોક જપ્ત કર્યો હતો.
