કેનેડાના ટોરોન્ટોમાં એક વ્યસ્ત શોપિંગ સેન્ટરના પાર્કિંગ એરિયામાં અજાણ્યા હુમલાખોરોએ કરેલા ફાયરિંગમાં 37 વર્ષીય ઇન્ડિયન-કેનેડિયનનું મોત થયું હતું. ટોરોન્ટો પોલીસ સર્વિસે મૃતકની ઓળખ બ્રેમ્પટનના ચંદન કુમાર રાજા નંદકુમાર તરીકે કરી હતી. મૂળ કર્ણાટકના નંદકુમાર એક આઇટી પ્રોફેશનલ હતાં.
પોલીસે જણાવ્યું હતું કે શનિવારે આશરે 3:31 વાગ્યે રેક્સડેલ બુલવાર્ડ અને હાઇવે 27 પર સ્થિત વુડબાઇન શોપિંગ સેન્ટરના પાર્કિંગમાં ફાયરિંગની જાણ થઈ હતી. પોલીસ અધિકારીઓ ઘટનાસ્થળે પહોંચ્યાં ત્યારે તેમને ગોળીના ઘા વાગેલી એક વ્યક્તિ મળી આવી હતી. પીડિતને જીવલેણ ઇજાઓ સાથે હોસ્પિટલમાં લઈ ખસેડવામાં આવ્યાં હતાં.પીડિતનું હોસ્પિટલમાં સારવાર દરમિયાન મોત નીપજ્યું હતું. હુમલાખોરો એક વાહનમાં ઘટનાસ્થળેથી ભાગી ગયાં હતાં.
સીટીવી ન્યૂઝ અનુસાર, ઘટનાસ્થળેથી લેવામાં આવેલી તસવીરોમાં સફેદ એસયુવી દેખાય છે જેમાં વિન્ડશિલ્ડમાં ગોળીઓથી કાણા પડી ગયેલા છે અને ડ્રાઇવરની બાજુની બારી તૂટેલી છે. ફાયરિંગ પાછળનું કારણ જાણી શકાયું ન હતું, પરંતુ પોલીસ માને છે કે આ એક ટાર્ગેટેડ હત્યા હતાં. ટોરોન્ટોમાં આ વર્ષ ફાયરિંગમાં મોતની આવી ત્રીજી ઘટના બની છે.
