ડિજિટલ પ્લેટફોર્મ પ્રાઇમ વીડિયો પર અત્યાર સુધીના મનોરંજનના સૌથી મોટા રસથાળની જાહેરાત કરવામાં આવી છે. પ્લેટફોર્મ દ્વારા આ વર્ષના અંત સુધીમાં અંદાજે 55 નવી ઓરિજિનલ સીરિઝ અને ફિલ્મો રજૂ કરવાની જાહેરાત કરવામાં આવી છે. આ યાદીમાં માત્ર મોટી હિન્દી ફિલ્મો જ નહીં પરંતુ તમિલ અને તેલુગુ ભાષાની ફિલ્મો પણ સામેલ છે. એક નોંધપાત્ર મુદ્દો એ છે કે એમેઝોન અને એમજીએમ સ્ટુડિયોઝ હવે ભારતમાં સીધી થિયેટ્રિકલ રિલીઝ માટે પણ ફિલ્મો પ્રોડ્યુસ કરશે.
જૂના અને જાણીતા શો જોવા મળશે
આ પ્લેટફોર્મ પર ‘પંચાયત’ સીઝન 5, ‘ફર્ઝી’ સીઝન 2, અને ‘દહાડ’ સીઝન 2 રજૂ કરવામાં આવશે. આ ઉપરાંત, ‘કૉલ મી બૅ’ સીઝન 2, ‘દુપહિયા’ સીઝન 2 અને રિયાલિટી શો ‘ધ ટ્રેઇટર્સ’ સીઝન 2 પણ ફરીથી દર્શાવવામાં આવશે.
આલિયા ભટ્ટ-રિતિક રોશન સાથે ભાગીદારી
પ્રાઇમ વીડિયોએ આ વખતે મોટા પ્રોડક્શન હાઉસ સાથે ભાગીદારી પણ કરી છે. રિતિક રોશનની ‘એચઆરેક્સ ફિલ્મ્સ’ પ્રથમ વખત સ્ટ્રીમિંગની દુનિયામાં પ્રવેશ કરી રહી છે અને ‘સ્ટોર્મ’ સિરીઝ અને ‘મેસ’ ફિલ્મ લાવી રહ્યું છે. આ દરમિયાન, આલિયા ભટ્ટની ‘ઇટર્નલ સનશાઇન પ્રોડક્શન’ ‘ડોન્ટ બી શાય’ ફિલ્મ રજૂ કરશે. દક્ષિણમાં નોંધપાત્ર રીતે વિસ્તરણ કરતા, ‘ધ ટ્રેઇટર્સ’નું તેલુગુ વર્ઝન લાવવામાં આવી રહ્યું છે, જેને તેજા સજ્જા હોસ્ટ કરશે.
નવી સિરીઝ અને ફિલ્મોની રસપ્રદ યાદી
નવી સિરીઝમાં નિખિલ અડવાણીની ‘ધ રેવોલ્યુશનરીઝ’એ ચર્ચા જગાવી છે, જેમાં ભુવન બામ, રોહિત સરાફ, અને પ્રતિભા રાંટા છે. વિજય વર્મા ‘મટકા કિંગ’માં જોવા મળશે અને અલી ફઝલ ‘રાખ’ નામની સિરીઝમાં જોવા મળશે. રેપર કિંગ ફિલ્મ ‘લુખ્ખે’ સાથે અભિનિયમાં પદાર્પણ કરશે. આ દરમિયાન, ‘વંશ ધ કલિયુગ વોરિયર્સ’ ભારતની પહેલી હિન્દી સુપરહીરો સિરીઝ બનશે જેનું ખાસ સ્ટ્રીમિંગ માટે નિર્માણ કરવામાં આવ્યું છે.
પાંચ ફિલ્મો પણ થીયેટર્સમાં રિલીઝ થશે
એમેઝોને એમજીએમ સ્ટુડિયોઝ ઇન્ડિયા સાથે મળીને પાંચ ફિલ્મોની જાહેરાત કરી છે જે પહેલા થિએટર્સમાં રિલીઝ થશે. તેમાં રાજકુમાર રાવ અને કીર્તિ સુરેશની ‘રફ્તાર’, કુણાલ ખેમુ અને પ્રીટિ ઝિન્ટાની ‘વાઇબ’ અને યામી ગૌતમની ‘નઈ નવેલી’નો સમાવેશ થાય છે. ભુવન બામ અને વામિકા ગબ્બીની ‘કુકુ કી કુન્ડલી’ અને એ.આર. રહેમાનના સંગીતથી સજાવેલી ‘દિલકશી’ પણ મોટા પડદા પર આવશે. ત્યાર પછી, આ ફિલ્મોને ડિજિટલ પ્રીમિયર માટે પ્રાઇમ વીડિયો પર રજૂ કરવામાં આવશે.
