ડોનાલ્ડ ટ્રમ્પ અમેરિકાના પ્રમુખ બન્યા પછીના પ્રથમ ક્વાર્ટર (જાન્યુઆરી-માર્ચ)માં જીડીપી ગ્રોથ ઘટી 0.3 ટકા થઈ ગયો હતો, જે ઓક્ટોબર-ડિસેમ્બર ક્વાર્ટરમાં 2.4 ટકા હતો. છેલ્લાં ત્રણ વર્ષમાં પ્રથમવાર યુએસ જીડીપી ગ્રોથ ઘટ્યો છે. ટ્રમ્પના ટેરિફ વોરને કારણે અર્થશાસ્ત્રીઓ અમેરિકામાં મંદીની પણ સંભાવના વ્યક્ત કરી રહ્યાં છે.
માર્ચ ક્વાર્ટરમાં અમેરિકાની આયાત નોંધપાત્ર વધી હતી કારણ કે ટ્રમ્પના રેસિપ્રોકલ ટેરિફનો અમલ થાય તે પહેલાં આયાતકારોએ મોટાપાયે ખરીદી કરવા માંડી હતી. આયાતને કારણે જીડીપી ગ્રોથ પર 0.50 ટકા અસર થઈ હતી. કન્ઝ્યુમર સ્પેન્ડિંગ પણ નોંધપાત્ર ઘટ્યું હતું.
આકરા ટેરિફને પગલે અમેરિકાની કંપનીઓએ ચીનમાંથી આયાતના ઓર્ડર રદ કરવાનું શરૂ કરી દીધું છે. ઘણી કંપનીઓએ વિસ્તરણ પણ અટકાવી દીધું છે. ટ્રમ્પે ચીન સિવાયના દેશો પર પણ ટેરિફ જાહેર કરીને 90 દિવસ સુધી અમલ મોકૂફ રાખતા અનિશ્ચિતતા વધી ગઈ છે. અમેરિકાના સૌથી મોટા વેપાર ભાગીદાર દેશ ચીન પર જ 145 ટકા જેટલી ઊંચી ટેરિફ લાદવામાં આવી છે. ચીને પણ અમેરિકા પર 125 ટકા ટેરિફ લાગુ કરી છે.
એપોલો ગ્લોબલ મેનેજમેન્ટના ચીફ ઈકોનોમિસ્ટ ટોર્સ્ટેન સ્લોકે કહ્યું છે કે જો ટ્રમ્પના ટેરિફ તેમના કહ્યા મુજબ યથાવત્ રહેશે તો અમેરિકામાં મંદીમાં સરકી જવાની 90 ટકા શક્યતા છે. આરએસએમ કન્સલ્ટન્સીના ઈકોનોમિસ્ટે 12 મહિનામાં જ યુએસ મંદીમાં સરકી જવાની 55 ટકા સંભાવના દર્શાવી છે.
