અમેરિકાએ તેની ઇમિગ્રેશન નીતિમાં વધુ એક સુધારાનો અમલ કરતાં હવે સ્ટુડન્ટ, ટુરિસ્ટ અને H-1B સહિતના વિઝા મેળવવાના ખર્ચમાં આશરે અઢી ગણા સુધીનો સુધારાનો વધારો થશે. પ્રેસિડન્ટ ડોનાલ્ડ ટ્રમ્પના બહુચર્ચિત વન બિગ બ્યૂટિફૂલ બિલ એક્ટ હેઠળ હવે 250 ડોલરની વિઝા ઇન્ટિગ્રિટી ફી લાદવામાં આવી છે. આ ઉપરાંત ટ્રાવેલ સંબંધિત બીજી કેટલીક ફી પણ લાદવામાં આવી છે. આ ફીમાં ફુગાવાને આધારે દર વર્ષે વધારો પણ થશે.
આ ફી સિક્યોરિટી ડિપોઝિટ જેવી છે અને જો અરજદારો ચોક્કસ માપદંડો પૂર્ણ કરે તો તેનું રિફંડ પણ મળી શકે છે. અરજદારોને યુએસ ઇમિગ્રેશન કાયદાઓનું પાલન કરે તે માટે ટ્રમ્પ વહીવટીતંત્રે આ ફી લાદી છે.ઇન્ટિગ્રિટી ફીનો મુખ્ય હેતુ અમેરિકાના ઇમિગ્રેશન નિયમોનું પાલન કરવાનો છે. તે સિક્યોરિટી ડિપોઝિટી જેવી છે અને અમેરિકાના કાયદાનું પાલન કરવામાં આવે તો તે રિફંડ મળી શકે છે. જો વિઝા ધારકો તેમના વિઝા સમાપ્ત થયાના પાંચ દિવસમાં
અમેરિકામાંથી નીકળી જાય તો રિફંડની અરજી કરી શકાય છે. રિફંડ મેળવવા માટે વિઝા લંબાવવાની કે વિઝા સ્ટેટસમાં ફેરફાર કરવાની અરજી પણ કરી શકાશે નહીં.
પ્રેસિડન્ટે ટ્રમ્પે 4 જુલાઈએ વન બિગ બ્યૂટીફૂલ બિલ પર હસ્તાક્ષર કર્યા હતાં, તેથી આ બિલ હવે કાયદો બન્યું છે. નવો વિઝા નિયમ ઓમ્નિબસ એક્ટનો એક ભાગ છે.
નવા નિયમ મુજબ આ ફી ફરજિયાત છે અને તેનો અમલ 2026થી થશે. ટુરિસ્ટ-બિઝનેસ (B-1/B-2), સ્ટુડન્ટ (F/M), વર્ક વિઝા (H-1B) અને એક્સ્ચેન્જ (J) વિઝા માટે અરજી કરતાં તમામને આ ફી લાગુ પડશે. તેમાં એકમાત્ર રાજદ્વારી વિઝા કેટેગરીને (A અને G)ને મુક્તિ અપાઈ છે. ડિપાર્ટમેન્ટ ઓફ હોમલેન્ડ સિક્યુરિટી (DHS) વિઝા જારી કરતી વખતે હાલના વિઝા અરજી ખર્ચ ઉપરાંત આ સરચાર્જ લાદશે.
આ બિલમાં ટ્રાવેલ સંબંધિત બીજી ફી લાદવાની પણ જોગવાઈ છે. તેમાં એરાઇવલ-ડિપાર્ચરના ફોર્મ I-94 માટે 24 ડોલર, વિઝા વેવર પ્રોગ્રામના મુસાફરો માટે ઇલેક્ટ્રોનિક સિસ્ટમ ફોર ટ્રાવેલ ઓથોરાઇઝેશન (ESTA)ની 13 ડોલર ફી તથા 10 વર્ષના B-1/B-2 વિઝા ધરાવતા અમુક ચીની નાગરિકો માટે 30 ડોલરની ઇલેક્ટ્રોનિક વિઝા અપડેટ સિસ્ટમ (EVUS) ફીનો સમાવેશ થાય છે.
હાલમાં ભારતીયો માટે યુએસ ટુરિસ્ટ-બિઝનેસ વિઝા (B-1/B-2)નો ખર્ચ આશરે $185 (રૂ.15,855) થાય છે. $250ની ઇન્ટિગ્રિટી ફી તથા નવી ટ્રાવેલ સંબંધિત ફી સાથે ટુરિસ્ટ વિઝાનો ખર્ચ વધીને $472 (રૂ.40,456) થશે, જે આશરે અઢી ગણો વધારો દર્શાવે છે.
