અમદાવાદને 2030માં શતાબ્દી કોમનવેલ્થ ગેમ્સના યજમાન શહેર તરીકે બુધવાર, 26 નવેમ્બરે આખરી બહાલી મળી હતી. આનાથી બે દાયકા પછી ભારતમાં આ આંતરરાષ્ટ્રીય રમતોત્સવની વાપસીનો માર્ગ મોકળો થયો હતો. ભારતે અગાઉ 2010માં નવી દિલ્હીમાં કોમનવેલ્થ ગેમ્સનું આયોજન કર્યું હતું.
બુધવારે ગ્લાસગોમાં કોમનવેલ્થ સ્પોર્ટ જનરલ એસેમ્બલીમાં 74 કોમનવેલ્થ સભ્ય દેશો અને પ્રદેશોના પ્રતિનિધિઓએ ભારતની દાવેદારીને બહાલી આપી હતી. ભારતના પ્રતિધિમંડળે 2030 રમતોત્સવ માટે એક આકર્ષક વિઝન રજૂ કર્યું હતું. આમ અમદાવાદમાં શતાબ્દી વર્ષની ઉજવણી શૈલીમાં આ ઇવેન્ટ યોજાશે.
અમદાવાદને 2030 કોમનવેલ્થ ગેમ્સના યજમાન તરીકે જાહેર કર્યાના થોડા સમય પછી 20 ગરબા નર્તકો અને 30 ભારતીય ઢોલ વગાડનારાઓ જનરલ એસેમ્બલી હોલમાં ભારત અને ગુજરાતના સમૃદ્ધ સાંસ્કૃતિક કાર્યક્રમો સાથે ઉજવણી કરી હતી. ગરબા ગુજરાતની શાન છે અને ગ્લાસગોના ભારતીય સમુદાયના સભ્યો અને કોમનવેલ્થના અન્ય ભાગોના લોકોએ ગ્લાસગો 2026 કોમનવેલ્થ ગેમ્સથી શતાબ્દી આવૃત્તિ સુધીની સફર શરૂ કરવા માટે વિવિધતા અને એકતા બંનેનું પ્રદર્શન કર્યું હતું.
અમદાવાદને યજમાનીના હક મલ્યા પછી કોમનવેલ્થ ગેમ્સ એસોસિએશન ઓફ ઈન્ડિયાના પ્રમુખ પીટી ઉષાએ જણાવ્યું હતું કે “કોમનવેલ્થ સ્પોર્ટ દ્વારા દર્શાવવામાં આવેલા વિશ્વાસથી અમે ખૂબ જ સન્માનિત છીએ. 2030 ગેમ્સ માત્ર કોમનવેલ્થના સો વર્ષની ઉજવણી જ નહીં, પરંતુ આગામી સદીનો પાયો પણ નાખશે. તે મિત્રતા અને પ્રગતિની ભાવનામાં કોમનવેલ્થમાંથી રમતવીરો, સમુદાયો અને સંસ્કૃતિઓને એકસાથે લાવશે.
કોમનવેલ્થ સ્પોર્ટના પ્રમુખ ડોનાલ્ડ રુકારેએ જણાવ્યું હતું કે “આ કોમનવેલ્થ સ્પોર્ટ માટે એક નવા સુવર્ણ યુગની શરૂઆત છે.
અગાઉ 15 ઓક્ટોબરે કોમનવેલ્થ સ્પોર્ટ એક્ઝિક્યુટિવ બોર્ડે અમદાવાદને 2030 શતાબ્દી કોમનવેલ્થ ગેમ્સ માટે યજમાન શહેર બનાવવાની ભલામણ કરી હતી. આ સ્પોર્ટ્સ માટે અમદાવાદ અને અબુજા, નાઇજીરીયા બંનેએ બિડ સબમિટ કરી હતી. ભારત સરકાર ૨૦૩૬માં અમદાવાદમાં ઓલિમ્પિક યોજવાની તૈયારી કરી છે, ત્યારે કોમનવેલ્થ ગેમ્સના યજમાન અધિકારો મેળવવા બાબત મહત્ત્વની છે.
કેનેડાના હેમિલ્ટનમાં પ્રથમ વખત યોજાયેલા કોમનવેલ્થ ગેમ્સને 100 વર્ષ પૂર્ણ થવાના છે. કેનેડાએ પણ સ્પર્ધામાં હતું, જોકે તેને બિડ કરી ન હતી. ભારતમાં ૨૦૧૦માં દિલ્હીમાં પહેલી વાર આ રમતોત્સવનું આયોજન થયું હતું. દક્ષિણ આફ્રિકાના શહેર ડર્બન નાણાકીય સમસ્યાઓના કારણે ખસી ગયા પછી ૨૦૨૨ રમતોત્સવ બર્મિંગહામ ખસેડવામાં આવ્યો હતો.
