- કમલ રાવ
શ્રી નારાયણદેવ ભુજ મંદિર, કચ્છ તાબાના શ્રી કચ્છ સત્સંગ સ્વામિનારાયણ મંદિર, ઈસ્ટ લંડનના 38મા અને શ્રી ઘનશ્યામ મહારાજની પ્રતિમાની સ્થાપનાના 23મા પાટોત્સવ પ્રસંગે 10થી 17 ઓગસ્ટ સુધી એક અઠવાડિયાના સીમાચિહ્નરૂપ સમાન ‘મંથન મહોત્સવ – 2025’નું આયોજન પૂ. આચાર્ય શ્રી કૌશલેન્દ્રપ્રસાદજી મહારાજ અને સ.ગુ. મહંત સ્વામી શ્રી ધર્મનંદનદાસજીની નિશ્રામાં સ્વામિનારાયણ સ્પોર્ટ્સ વર્લ્ડ (SSW), બ્લેક હોલ રોડ, વૉન્સટેડ, લંડન E11 2QW ખાતે કરવામાં આવ્યું હતું.
આ પ્રસંગે ઉપમહંત શ્રી ભગવતજીવનદાસજી સ્વામી, પૂ. કોઠારી પાર્ષદ શ્રી જાદવજી ભગત સહિત વડીલ સંતો, હેરોના મેયર અંજનાબેન પટેલ, ન્યુહામ, રેડબ્રિજ, એપિંગ અને હેરોના કાઉન્સિલરો, પ્રોફેસર કિશન દેવાણી બીઈએમ, શ્રી સ્વામિનારાયણ ગાદી પરિવાર યુકે (SSGP-UK) ના સભ્યો તથા અન્ય ખાસ પ્રતિષ્ઠિત મહેમાનો સહિત ઉપસ્થિત રહ્યા હતા. આ ઉજવણી દરમિયાન 8,000થી વધુ ભક્તો, પરિવારો, યુવાનો અને વિશાળ સમુદાય આનંદ, એકતા અને ભક્તિની ભાવના સાથે ઉજવણી માટે એકત્ર થયો હતો.
શુક્રવારે 15 ઓગસ્ટના રોજ ભારતના સ્વતંત્રતા દિવસની ઉજવણી કરવામાં આવી હતી અને ભારતના રાષ્ટ્ર ગીત સાથે ત્રિરંગા ધ્વજને સલામી આપી ઉજવણી કરવામાં આવી હતી. કાર્યક્રમ પછી સૌએ પ્રસાદનો લાભ લીધો હતો.
ઉત્સવનું એક આધ્યાત્મિક આકર્ષણ ભુજ મંદિરના સંતો દ્વારા ‘વાસુદેવ માહાત્મ્ય કથા’નું પઠન હતું. આ આદરણીય ગ્રંથ સ્વામિનારાયણ સંપ્રદાયમાં ખૂબ જ મહત્વ ધરાવે છે, અને તેનું પઠન યુકેના મંદિરો માટે પ્રથમ વખત અને ઐતિહાસિક રહ્યું હતું. સંતોના ઉત્થાનકારી પ્રવચનો અને આશીર્વાદથી ભક્તોને નવી શ્રદ્ધા અને સત્સંગ પ્રત્યેની પ્રતિબદ્ધતા મજબૂત થઈ હતી. કથાનો પ્રારંભ તા. 11ના રોજ થયો હતો અને કથાની પૂર્ણહતી રવિવાર તા. 17ના રોજ થઇ હતી મહાભિષેક તા 17ના રોજ કરવામાં આવ્યો હતો.
38 વર્ષ પહેલાં સ્થાપવામાં આવેલા મંદિરની યાત્રા પર પ્રતિબિંબ પાડતા, નેતાઓ અને સંતોએ પ્રેરક પ્રવચનો કર્યા હતા. જેણે સૌને સત્સંગને ટકાવી રાખનારા એકબીજા માટે પ્રેમ, વાણીમાં આદર, કાર્યમાં એકતા અને સાથે મળીને ખીલવાની સહિયારી દ્રષ્ટિ જેવા મૂલ્યોની યાદ અપાવી ગતી. આ મૂલ્યોએ જ દાયકાઓથી મંદિરનો સતત વિકાસ કર્યો છે.
આ વર્ષના ઉજવણીનું નામ ‘મંથન મહોત્સવ’ રાખવામાં આવ્યું હતું, જે સમુદ્ર મંથન અને આ વર્ષની શરૂઆતમાં યોજાયેલા અસાધારણ મહાકુંભથી પ્રેરિત હતું. આ થીમ સ્વામિનારાયણ સંપ્રદાયની આસ્થાને આધાર આપતા ચિંતન, એકતા અને આધ્યાત્મિક મંથનના શાશ્વત મૂલ્યોની યાદ અપાવે છે.
આ પ્રસંગે આધ્યાત્મિક કાર્યક્રમોની સાથે સંસ્કૃતિ, શિક્ષણ અને સમુદાયની પણ ઉજવણી કરવામાં આવી હતી. મંદિર દ્વારા ચલાવવામાં આવતી ગુજરાતી શાળાના વિદ્યાર્થીઓને શ્રેષ્ઠ પરિણામો અને સિદ્ધિઓ માટે સન્માનિત કરવામાં આવ્યા હતા. કેટલાક વિદ્યાર્થીઓએ તો સફળતાપૂર્વક ગુજરાતી ભાષામાં તેમના GCSE ગ્રેડ મેળવ્યા હતા. આ માન્યતા માતૃભાષાના સંવર્ધનના મહત્વ પર પ્રકાશ પાડે છે. અત્રે ઉલ્લેખનીય છે કે મંદિર દર શનિવારે પોતાની ગુજરાતી શાળા ચલાવે છે, જે યુવા પેઢીમાં ભાષા, સંસ્કૃતિ અને મૂલ્યો કેળવે છે.
આ પ્રસંગે યુવક મંડળ દ્વારા એક ગેમ્સ નાઇટનું આયોજન કરાયું હતું, જેમાં 9 વર્ષ અને તેથી વધુ ઉંમરના બાળકો અને કિશોરોને મનોરંજક પ્રવૃત્તિઓમાં સામેલ કરવામાં આવ્યા હતા, જે ફેલોશિપ અને ભાગીદારીની ભાવનાને મજબૂત બનાવે છે. ખાસ સાંસ્કૃતિક સાંજે તમામ ઉંમરના બાળકો દ્વારા પરંપરાગત નૃત્યો, નાટકો અને ભક્તિમય કૃતિઓ સ્ટેજ પર રજૂ કરવામાં આવી હતી.
