ભારતીય મૂળના 34 વર્ષીય ડેમોક્રેટિક સોશિયાલિસ્ટ ઝોહરાન મામદાનીએ ન્યૂયોર્ક શહેરના મેયરની ચૂંટણીમાં અભૂતપૂર્વ વિજય મેળવી મંગળવાર, 4 નવેમ્બરે ઇતિહાસ રચ્યો હતો. અમેરિકાના સૌથી મોટા શહેરનું સુકાન સંભાળનારા તેઓ પ્રથમ દક્ષિણ એશિયન અને પ્રથમ મુસ્લિમ બન્યાં હતાં. મામદાનીએ ભૂતપૂર્વ ગવર્નર એન્ડ્રુ કુઓમો અને રિપબ્લિકન ઉમેદવાર કર્ટિસ સ્લિવાને હરાવ્યાં હતાં.
મામદાનીનો જન્મ ભારતીય મૂળના માતાપિતાને ત્યાં યુગાન્ડામાં થયો હતો. તેમની માતા પ્રખ્યાત ફિલ્મ નિર્માતા મીરા નાયર છે અને પિતા જાણીતા લેખક મહમૂદ મામદાની છે.
તેમણે NYC મેયરની ચૂંટણી 948,202 મતો (50.6 ટકા) સાથે જીતી હતી. કુઓમોને 776,547 મત (41.3 ટકા) મળ્યા હતા, જ્યારે સ્લિવાને 137,030 મત મળ્યા હતાં.
મામદાની ઘણા મહિનાઓથી NYC મેયરની ચૂંટણીમાં પ્રબળ દાવેદાર હતાં અને મંગળવારે તેમણે રિપબ્લિકન ઉમેદવાર કર્ટિસ સ્લિવા અને રાજકીય હેવીવેઇટ ન્યૂ યોર્ક રાજ્યના ભૂતપૂર્વ ગવર્નર એન્ડ્રુ કુઓમોને હરાવ્યાં હતાં. કુઓમો અપક્ષ ઉમેદવાર તરીકે ચૂંટણી લડ્યાં હતાં. ચૂંટણીની પૂર્વસંધ્યાએ જ યુએસ પ્રમુખ ડોનાલ્ડ ટ્રમ્પનું સમર્થન મળ્યું હતું. NYC બોર્ડ ઓફ ઇલેક્શન્સે જણાવ્યું હતું કે 1969 પછી પહેલી વાર બે મિલિયન મતો પડ્યાં હતાં.
પ્રેસિડન્ટ ડોનાલ્ડ ટ્રમ્પે ઝોહરાન મમદાનીને સામ્યવાદી ગણાવ્યા હતાં. આ ચૂંટણી જીવનનિર્વાહના ખર્ચ, ગુના અને દરેક ઉમેદવાર ટ્રમ્પનો સામનો કેવી રીતે કરશે તેના પર કેન્દ્રિત છે. ટ્રમ્પે શહેર માટે ફેડરલ ભંડોળ રોકવાની પણ ધમકી આપી હતી.
કોલંબિયા યુનિવર્સિટીના રાજકારણના પ્રોફેસર લિંકન મિશેલે જણાવ્યું હતું કે મામદાની એક અસામાન્ય રાજકીય વ્યક્તિત્વ છે અને ખરેખર આ ક્ષણની ભાવનાને પકડી લે છે. ન્યૂ યોર્કના મેયર માટે એક મુસ્લિમ ઉમેદવારની જીત એક મોટી કહાની છે.
પ્રખ્યાત ભારતીય ફિલ્મ નિર્માતા મીરા નાયર અને ભારતીય વંશના યુગાન્ડાના લેખક મહમૂદ મામદાનીના પુત્ર મમદાનીને ડેમોક્રેટિક પ્રાયમરી રેસમાં ભૂતપૂર્વ ગવર્નર એન્ડ્ર્યુ કુઓમોને હરાવીને અભૂતપૂર્વ વિજય મેળવ્યો હતો.
મમદાનીનો જન્મ 18 ઓક્ટોબર, 1991ના રોજ યુગાન્ડાના કંપાલામાં થયો હતો અને તેમનો ઉછેર ન્યુ યોર્ક શહેરમાં થયો હતો. તેઓ સાત વર્ષના હતાં ત્યારે તેમના માતાપિતા સાથે ન્યુ યોર્ક આવ્યાં હતાં. તેમની માતા મીરા નાયર ‘મોન્સૂન વેડિંગ’ અને ‘સલામ બોમ્બે!’ જેવી ફિલ્મો માટે વિશ્વભરમાં પ્રખ્યાત છે. ડેમોક્રેટિક સોશિયાલિસ્ટ મમદાનીએ બ્રુકલિન સ્થિત આર્ટિસ્ટ રામા દુવાજી સાથે લગ્ન કર્યા છે.
મમદાનીએ સરકાર માલિકીની કરિયાણાની દુકાનો, સાર્વત્રિક બાળ સંભાળ અને અન્ય બોલ્ડ દરખાસ્તો દ્વારા જીવનનિર્વાહના ખર્ચમાં ઘટાડો કરવાની યોજના ધરાવે છે. શહેરની આવક વધારવા માટે તે કોર્પોરેટ ટેક્સ રેટને વધારીને 11.5 ટકા કરવા માગે છે. તેઓ ન્યૂયોર્કના સૌથી ધનિકો પર પણ ટેક્સ લાદવાની યોજના ધરાવે છે.
