વડાપ્રધાન નરેન્દ્ર મોદીએ સરકારના કડક નિયંત્રણવાળા પરમાણુ ઉર્જા ક્ષેત્રને ટૂંક સમયમાં ખાનગી ખેલાડીઓ માટે ખુલ્લું મૂકવાની ગુરુવારે જાહેરાત કરી હતી. મોદીની આ જાહેરાતથી દેશની ઉર્જા સુરક્ષાને નવી મજબૂતાઈ મળશે.
હૈદરાબાદમાં સ્કાયરૂટ એરોસ્પેસના ઇન્ફિનિટી કેમ્પસના ઉદ્ઘાટન સમારોહ દરમિયાન વડાપ્રધાને જાહેરાત કરી હતી કે અમે પરમાણુ ક્ષેત્રને પણ ખુલ્લુ મૂકવા તરફ આગળ વધી રહ્યાં છીએ. અમે આ ક્ષેત્રમાં પણ ખાનગી ક્ષેત્ર માટે મજબૂત ભૂમિકાનો પાયો નાખી રહ્યાં છીએ. આનાથી નાના મોડ્યુલર રિએક્ટર, અદ્યતન રિએક્ટર અને ન્યુક્લિયર ઇનોવેશનમાં નવી તકો ઊભી થશે. આ સુધારાથી આપણી ઉર્જા સુરક્ષા અને ટેકનોલોજીકલ નેતૃત્વને નવી તાકાત મળશે.
સરકારે 2047 સુધીમાં 100 GW પરમાણુ ઉર્જાના ઉત્પાદનનો ટાર્ગેટ નિર્ધારિત કર્યો છે, જે વર્તમાન 8.8 GW પરમાણુ ઉર્જા ઉત્પાદન ક્ષમતાથી 10 ગણો વધારે છે. સરકારે 1 ડિસેમ્બરથી શરૂ થઈ રહેલા સંસદના શિયાળુ સત્ર દરમિયાન પરમાણુ ઊર્જા બિલ, 2025 રજૂ કરવાની યોજના બનાવી છે. આ બિલમાં ખાનગી ક્ષેત્રની ભાગીદારી માટે પરમાણુ ઉર્જા ક્ષેત્રને ખોલવાની દરખાસ્ત છે.
આ વર્ષે ફેબ્રુઆરીમાં સામાન્ય બજેટ રજૂ કરતા નાણામંત્રી નિર્મલા સીતારામને પરમાણુ જવાબદારી કાયદામાં સુધારો કરવાની યોજનાની પણ જાહેરાત કરી હતી.1962ના અણુ ઊર્જા ધારા હેઠળ પરમાણુ ક્ષેત્રમાં ખાનગી ક્ષેત્ર અથવા રાજ્ય સરકારોની ભાગીદારી પર પ્રતિબંધ છે.
