શ્રીલંકામાં તબાહી મચ્યા પછી વાવાઝોડુ દિતવાહ રવિવાર, 30 સપ્ટેમ્બરે દક્ષિણ ભારત નજીક પહોંચ્યું હતું. આનાથી તમિલનાડુ, આંધ્રપ્રદેશ અને પુડુચેરીના દરિયાકાંઠાના વિસ્તારોમાં એલર્ટ જારી કરાયો હતો. 30 નવેમ્બરે સવારે વાવાઝોડુ ત્રાટકે તે પહેલા આ ત્રણેય રાજ્યોના દરિયાકાંઠના વિસ્તારોમાં તેજ પવન સાથે ભારે વરસાદ ચાલુ થયો હતો. ખરાબ હવામાનને કારણે માછીમારો સતત બીજા દિવસે દરિયામાં ગયા ન હતાં.
તમિલનાડુમાં ભારે વરસાદને કારણે 54 ફ્લાઇટ્સ રદ કરાઈ હતી. પુડુચેરી સેન્ટ્રલ યુનિવર્સિટીએ શનિવારે રજા જાહેર કરી હતી અને તમામ પરીક્ષાઓ મુલતવી રાખી હતી. વાવાઝોડા દિતવાહથી તમિલનાડુમાં 100 કિલોમીટર પ્રતિ કલાકની ઝડપે પવન ફુંકાવાની અને ભારે વરસાદની પણ આગાહી કરાઈ છે. તમિલનાડુ ઉપરાંત, કેરળ, આંધ્રપ્રદેશ અને પુડુચેરીના દરિયાકાંઠાના વિસ્તારોમાં 60થી 100 કિલોમીટર પ્રતિ કલાકની ઝડપે પવન ફૂંકાશે અને ભારે વરસાદ પડશે.
શ્રીલંકામાં દિતવાહને કારણે આવેલા પૂર અને ભૂસ્ખલનમાં 156થી વધુ લોકોના મોત થયા હતાં અને 130થી વધુ લોકો લાપતા બન્યાં હતાં. કોલંબો એરપોર્ટ પર ફ્લાઇટ્સ રદ થતાં શ્રીલંકા થઈને દુબઈથી ભારત પાછા ફરવાના હતા તેવા લગભગ 300 ભારતીય મુસાફરો છેલ્લા ત્રણ દિવસથી કોલંબો એરપોર્ટ પર ફસાયેલા છે.
ભારતીય હવામાન વિભાગ (IMD)એ જણાવ્યું હતું કે વાવાઝોડુ 30 નવેમ્બરે તમિલનાડુ-પુડુચેરી દરિયા કિનારા પર ત્રાટકશે. આના કારણે રાજ્યભરમાં ભારે વરસાદ પડશે.તમિલનાડુ, આંધ્રપ્રદેશ અને પુડુચેરીમાં પૂરની શક્યતા છે. પર્વતીય વિસ્તારોમાં ભૂસ્ખલનનું જોખમ છે. આ વિસ્તારોમાં અચાનક પૂર આવી શકે છે. પહાડી વિસ્તારોમાં ભૂસ્ખલનનું જોખમ રહેલું છે.
તમિલનાડુ વિલ્લુપુરમ, ચેંગલપટ્ટુ, તિરુવલ્લુર, નાગાપટ્ટિનમ, તિરુવરુર, તંજાવુર, પુડુક્કોટ્ટાઈ અને મયલાદુથુરાઈ સહિતના દરિયાકાંઠના જિલ્લામાં નેશનલ ડિઝાસ્ટર રિસ્પોન્સ ફોર્સ (NDRF)ની 14 ટીમો તૈનાત કરાઈ છે. દિતવાહની અસરને કારણે 30 નવેમ્બરથી 3 ડિસેમ્બર દરમિયાન આંધ્રપ્રદેશના કેટલાક વિસ્તારોમાં ભારે વરસાદની સંભાવના છે.
