ઉતરાખંડમાં હરિદ્વારમાં 14 જાન્યુઆરી 2027નો અર્ધકુંભ મેળાનો શુભારંભ થશે. કુલ 97 દિવસના ભવ્ય કુંભ મેળામાં કુલ ચાર મુખ્ય શાહી સ્નાન થશે. એપ્રિલ-2027માં અર્ધ કુંભનું સમાપન થશે. વર્ષ 2021માં હરિદ્વારમાં પૂર્ણ કુંભ યોજાયો હતો. પરંતુ ઉતરાખંડ સરકારે 2027માં યોજાનાર અર્ધકુંભને પણ પૂર્ણ કુંભની જેમ ઉજવવાની જાહેરાત કરી છે. અર્ધકુંભને માટે તૈયારીઓ લગભગ એક વર્ષ પહેલાંથી જ શરુ કરાઈ હતી.
ઉત્તરાખંડના મુખ્યમંત્રી પુષ્કર સિંહ ધામીએ શુક્રવારે જણાવ્યું હતું કે, 2027માં ઉત્તરાખંડમાં યોજાનારા હરિદ્વાર અર્ધ કુંભ મેળાને પૂર્ણ કુંભની જેમ “દૈવી અને ભવ્ય” રીતે ઉજવવામાં આવશે, અને પ્રથમ વખત સાધુઓ અને સંતો અર્ધ કુંભ દરમિયાન ‘શાહી સ્નાન’ કરશે. કુંભ મેળો ખૂબ સારી રીતે યોજાશે. જે કોઈ ભક્તો દેશભરમાંથી અહીં આવશે, એ તમામ સારા અનુભવો લઈને અહીંથી જશે, આ માટે વહીવટીતંત્રની દૃષ્ટિએ અમારી તમામ તૈયારીઓ આગળ વધી રહી છે.
અર્ધ કુંભ દરમિયાન 14 જાન્યુઆરીએ પ્રથમ શાહી સ્નાન થશે. આ ઉપરાંત 6 ફેબ્રુઆરીએ મૌની અમાવસ, 11 ફેબ્રુઆરીએ વસંત પંચમી, 20 ફેબ્રુઆરીએ માઘ પૂનમ, 6 માર્ચે મહાશિવરાત્રિ અમૃત સ્નાન. 8 માર્ચે ફાગણ અમાવસ અમૃત સ્નાન થશે. આ ઉપરાંત 7 એપ્રિલે નવ સંવત્સર, 14 એપ્રિલે રામનવમી, 20 એપ્રિલે ચૈત્ર પૂનમનું અમૃત સ્નાન પણ થશે.
