અમેરિકાના સેક્સ અપરાધી જેફરી એપ્સ્ટેઇન સંબંધિત તપાસ ફાઇલોમાં વડાપ્રધાન નરેન્દ્ર મોદીના ઉલ્લેખને ભારતે સખત શબ્દોમાં નકારી કાઢ્યો હતો. ભારતે જણાવ્યુ હતુ કે આ ઉલ્લેખ એક દોષિત ગુનેગારના બકવાસથી વધુ કંઈ નથી અને તે સૌથી વધુ ઘૃણા સાથે ફગાવી દેવાને પાત્ર છે.
અહીં ઉલ્લેખનીય છે કે દોષિત સેક્સ ટ્રાફિકર જેફરી એપ્સ્ટેઇન સંબંધિત નવી ફાઇલો યુએસ અધિકારીઓએ જાહેર કરી હતી. વિદેશ મંત્રાલયના પ્રવક્તા રણધીર જયસ્વાલે એક નિવેદનમાં જણાવ્યું હતું કે અમે કહેવાતી ફાઇલોમાંથી એક ઇ-મેઇલ સંદેશના અહેવાલો જોયા છે, જેમાં વડા પ્રધાન અને તેમની ઇઝરાયલ મુલાકાતનો સંદર્ભ છે. જુલાઈ 2017માં વડાપ્રધાનની ઇઝરાયલની સત્તાવાર મુલાકાત સિવાય આ ઇ-મેઇલમાં બાકીના તમામ રેફરન્સ એક દોષિત ગુનેગાર દ્વારા કરવામાં આવેલા બકવાસથી વધુ કંઈ નથી, જેને અત્યંત તિરસ્કાર સાથે ફગાવી દેવા જોઈએ.
શુક્રવારે યુએસ જસ્ટિસ ડિપાર્ટમેન્ટે જાહેર કરેલી તપાસ ફાઇલોમાં આ ઈ-મેલનો પણ સમાવેશ થાય છે. ન્યાય વિભાગે યુએસ કોંગ્રેસે પસાર કરેલા કાયદા અનુસાર 3.5 મિલિયન પેજ અને 2,000 વીડિયો પ્રકાશિત કર્યા હતાં.
આ ઇ-મેઇલમાં દાવો કરાયો હતો કે અમેરિકાના પ્રેસિડન્ટ ડોનાલ્ડ ટ્રમ્પે 2017માં વડાપ્રધાન નરેન્દ્ર મોદીની ઇઝરાયલ મુલાકાતમાં ભૂમિકા ભજવી હતી.
ભારતમાં મુખ્ય વિરોધ પક્ષ કોંગ્રેસે આ મુદ્દે સોશિયલ મીડિયામાં બે દસ્તાવેજ જારી કરીને વડાપ્રધાન નરેન્દ્ર મોદીની ટીકા કરતાં જણાવ્યું હતું કે ખરેખર નિંદાત્મક મુદ્દા પર વડાપ્રધાનનું મૌન અસ્વીકાર્ય છે. આ દસ્તાવેજ દર્શાવે છે કે વડાપ્રધાન મોદીએ યુએસ પ્રેસિડન્ટના લાભ માટે ઇઝરાયેલમાં ‘ડાન્સ’ કર્યો હતો. એપ્સ્ટેઇન અને નરેન્દ્ર મોદી વચ્ચેનો આ અક્ષમ્ય સંબંધ રાષ્ટ્રીય ગૌરવ અને આંતરરાષ્ટ્રીય પ્રતિષ્ઠાનો વિષય છે. વડાપ્રધાને સ્પષ્ટતા કરવી જોઈએ કે તેઓ જેફરી એપ્સ્ટેઇનની સલાહ શા માટે લઈ રહ્યા હતાં. મોદી ઇઝરાયલમાં અમેરિકન પ્રેસિડન્ટના કયા ફાયદા માટે ગાતા અને નાચતા હતાં?
