રશિયાના બાશ્કોર્ટોસ્તાન રિપબ્લિકમાં શનિવારે એક યુનિવર્સિટીમાં છરીથી થયેલા હુમલામાં ચાર ભારતીય વિદ્યાર્થીઓ સહિત ઓછામાં છ લોકો ઘાયલ થયાં હતાં. બાશ્કોર્ટોસ્તાન રિપબ્લિકના ઉફામાં સ્ટેટ મેડિકલ યુનિવર્સિટીના એક શયનગૃહમાં છરી સાથે એક કિશોર ઘૂસી ગયો હતો અને વિદ્યાર્થીઓ પર હુમલો કર્યો હતો.
આ હુમલાને દુર્ભાગ્યપૂર્ણ ઘટના ગણાવી મોસ્કો ખાતેના ભારતીય મિશને જણાવ્યું હતું કે ચાર ભારતીય વિદ્યાર્થીઓ સહિત અનેક લોકો ઘાયલ થયાં હતાં. તે સંબંધિત અધિકારીઓના સંપર્કમાં છે અને કાઝાન સ્થિત કોન્સ્યુલેટના અધિકારીઓ ઘાયલ વિદ્યાર્થીઓને સહાય પૂરી પાડવા માટે ઉફા જઈ રહ્યા છે.
ગૃહ મંત્રાલયના પ્રવક્તા મેજર જનરલ ઇરિના વોલ્કને જણાવ્યું હતું કે પોલીસ ધરપકડ કરવાની કાર્યવાહી કરી હતી ત્યારે પણ હુમલાખોરે પ્રતિકાર કર્યો, જે દરમિયાન બે પોલીસ અધિકારીઓને પણ છરાના ઘા વાગ્યાં હતાં. વધુમાં હુમલાખોરે પોતાને પણ શારીરિક નુકસાન પહોંચાડ્યું હતું.
રશિયન ફેડરલ આરોગ્ય મંત્રાલયે એક નિવેદનમાં જણાવ્યું હતું કે હુમલામાં ઘાયલ થયેલા ચાર લોકોને તબીબી સારવાર આપવામાં આવી રહી છે. તેમાં એકની હાલત ગંભીર છે, જ્યારે ત્રણ અન્ય લોકોની હાલત મધ્યમ છે. હુમલાખોર ઓળખ 15 વર્ષીય યુવક તરીકે થઈ હતૂ, તેને પણ ગંભીર હાલતમાં સ્થાનિક હોસ્પિટલમાં દાખલ કરાયો હતો.
મોસ્કોથી લગભગ 1,200 કિમી દૂર આવેલા બાશ્કોર્ટોસ્તાન રિપબ્લિકની રાજધાની ઉફાના અધિકારીઓએ આ ઘટનાની ઉચ્ચ સ્તરીય તપાસ શરૂ કરી હતી.
હુમલાખોર પ્રતિબંધિત NS/WP નિયોનાઝી સંગઠન સાથે જોડાયેલો હતો. હુમલા દરમિયાન તેને હોલોકોસ્ટના રાષ્ટ્રવાદી સૂત્રો પોકારી રહ્યો હતો. તેને ઘાયલોના લોહીથી દિવાલ પર દોરેલા સ્વસ્તિકનો ફોટો શેર કર્યો હતો.
