વિવિધ વેબ સીરિઝને લોકપ્રિય બનાવવામાં સાત કલાકારોની મહત્ત્વપૂર્ણ ભૂમિકા.

ભારતીય દર્શકોમાં સિનેમા-ફિલ્મોની સાથે ડિજિટલ પ્લેટફોર્મ પર રજૂ થતી જુદા જુદા વિષયક વેબ સીરિઝનું આકર્ષણ વધ્યું છે. દર્શકોને આકર્ષતી ક્રાઈમ થ્રીલર્સથી લઇને રાજકારણના કાવાદાવા અને ઘટનાપ્રચુર ડ્રામા સુધીના વિષયો તેમાં જોવા મળે છે. કલાકારોના અભિનયને કારણે વેબ સીરિઝ એકદમ જીવંત બની ગઇ છે દર્શકો તેના દરેક એપિસોડ વધુને વધુ ઉત્સુકતા સાથે નિહાળે છે. વેબ સીરિઝની લોકપ્રિયતામાં કલાકારોનું યોગદાન મહત્ત્વનું છે. અહીં એવા કેટલાક અભિનેતા અને અભિનેત્રીઓની અહીં ચર્ચા કરવામાં આવી છે જેમના કારણે ડિજિટલ મીડિયમમાં સ્ટોરીટેલિંગ એક વધુ ઊંચા શિખર પર પહોંચી ગઈ.

વેબ સીરિઝ ‘પાતાલ લોક’ અને જયદીપ અહલાવત એકબીજાના પૂરક બની ગયા છે. ઈન્સ્પેક્ટર હઠીરામ ચૌધરીની ભૂમિકાને જયદીપ અહલાવતે પાતાલ લોકની સીઝન-2માં પણ એક મુખ્ય આકર્ષણ બનાવી હતી. સમીક્ષકો કહે છે કે, તેનું પરફોર્મન્સ પાવરફુલ એક્ટિંગનો એક અધ્યાય બની ગયું છે. ગત વર્ષથી શરૂ થયેલી બીજી સીઝનમાં જયદીપે પોતાના પાત્રને વધુ ઊંડાણપૂર્વક ભજવ્યું છે. પોલીસ તંત્રની બેજવાબદારી વચ્ચે લોકોને ન્યાય અપાવવા ઝઝુમતા દિલ્હીના પોલીસ ઓફિસરની ભૂમિકાને દર્શકોએ પસંદ કરી હતી. તેના કારણે જયદીપને ઇન્ડિયન ફિલ્મ ફેસ્ટિવલ ઓફ મેલબર્નમાં બેસ્ટ એક્ટરનો એવોર્ડ મળ્યો હતો.

હુમા કુરેશીની ‘મહારાજા સીઝન 4’માં રાની ભારતીના રૂઆબ અને ઠસ્સા સાથે જોવા મળી રહી છે. આ પોલિટિકલ ડ્રામામાં ગામડાની એક સામાન્ય ગૃહિણીમાંથી બિહારની પાવરફુલ ચીફ મિનિસ્ટર બની ગયેલી રાની રાષ્ટ્રીય સ્તરના રાજકારણમાં ઝંપલાવતી જોવા મળે છે. આ ભૂમિકાને હુમાએ જે સહજતા અને શ્રેષ્ઠતા સાથે ભજવીને પાત્રને જીવંત કર્યું છે, જેના કારણે તે ઓટીટીનું એક શક્તિશાળી મહિલા પાત્ર બની છે. આ સીઝનમાં રાનીની મહત્ત્વાકાંક્ષા એને દિલ્હીમાં વડાપ્રધાન સાથે સીધા સંઘર્ષ ઉતરવા પ્રેરણા આપે છે. હુમાએ શોના દરેક એપિસોડમાં પાત્રના મજબૂત મનોબળનો પરિચય કરાવ્યો છે.

ફિલ્મોની સાથે વેબ સીરિઝમાં પણ મનોજ બાજપાઇનો અનોખો ચાહક વર્ગ છે. ‘ધ ફેમિલી મેન સીઝન 3’ દ્વારા તેણે ફરીથી સાબિત કર્યું છે કે, તેને શા માટે ભારતના શ્રેષ્ઠ કલાકારોમાં સ્થાન મળ્યું છે. આ સીરિઝમાં તેણે મધ્યમ વર્ગના એક પરિવારપ્રેમી ગૃહસ્થ અને ઉચ્ચ ઇન્ટેલીજન્સ ઓફિસર વચ્ચેના સંતુલનને અસરકારક રીતે રજૂ કર્યું છે. આ સીરિઝમાં તેના પરફોર્મન્સમાં દેશને બચાવવા જીવ હથેળી પર લઈને નીકળેલા ઓફિસરની પોતાના પરિવારને વિખેરાતો બચાવવવા માટેનું ઝુનૂન જોવા મળે છે. મનોજ બાજપાઇનો અભિનય હંમેશા એક ચર્ચાનો વિષય હોય છે.

વેબ સીરિઝ ‘બ્લેક વોરંટ’માં ઝહાન કપૂરનું કામ એક આશ્ચર્ય બની રહ્યું છે. તિહાર જેલના એક સુપરિટેન્ડન્ટના સંસ્મરણો પર આધારિત સીરિઝમાં શશી કપૂરના પૌત્ર ઝહાને પોતાની એક્ટિંગની રેન્જ દર્શાવી છે. પૃથ્વી થિયેટરમાં નાટકો ભજવીને ઘડાયેલા આ એક્ટરના પરફોર્મન્સે જેલની અંધારી અને ક્રુર દુનિયા વચ્ચે રહીને સતત મૂંઝવણ અનુભવતા એક યુવાન જેલરના પાત્રને વાસ્તવિક બનાવી દીધું છે. એની સંવેદના દર્શકોને સ્પર્શી ગઈ હતી. ઘણી મહેનત પછી ઝહાનની પ્રતિભાની દર્શકોએ નોંધ લીધી હતી.

‘દેલ્હી ક્રાઈમ સીઝન 3’માં સયાની ગુપ્તાએ કુસુમની ભૂમિકામાં ફરીથી એકવાર અસરકારક અભિનય કર્યો છે. સયાનીએ પોતાના પાત્રની નૈતિક જટિલતાની સાથોસાથ એના જીવનમાં ચુપચાપ આવતા રૂપાંતરને જીવી ગઈ છે. મોટા ક્રાઈમ નેટવર્ક અને એની હિંસક દુનિયા વચ્ચે જીવની અને ઝઝુમતી મહિલાને સયાની પોતાના સંયમિત અભિનયથી સાકાર કરી છે. ‘દેલ્હી ક્રાઈમ’ની આ સીઝનમાં મોટી પાવરફુલ કાસ્ટ વચ્ચે સયામીએ પોતાના પરફોર્મન્સની નોંધ લેવડાવી છે, એટલે જ સીરિઝના એપિસોડ્સ પૂર્ણ થયા પછી પણ લોકો કુસુમના પાત્રને યાદ કરી રહ્યા છે.

‘બેડ્સ ઓફ બોલીવૂડ’થી લેખક-દિગ્દર્શક તરીકે પદાર્પણ કરનારા આર્યન ખાનની પ્રશંસા થઇ હતી. આ સાથે જ વેબ સીરિઝમાં રાઘવ જુયાલનો અભિનય પણ વખણાયો હતો. નેટફ્લિક્સ પર તેનો પ્રીમિયર યોજાયો હતો, જેમાં લગભગ બોલીવૂડ સહુ ફિલ્મકારો ઉપસ્થિત રહ્યા હતા. આ સીરિઝ જોઈને લોકો રાઘવની ડાન્સિંગ બેકગ્રાઉન્ડને એક બાજુ રાખીને તેના નાટ્યાત્મક અભિનયની ચર્ચા કરતા થઈ ગયા હતા. દર્શકોને સ્ક્રીન પર જકડી રાખતા આ શોમાં તેણે પોતાની વૈવિધ્યતા અને જોખમ લેવાની તૈયારીનો પુરાવો આપ્યો હતો. રાઘવે સાબિત કર્યું હતું કે, તેનામાં એક ટેલેન્ટેડ ડાન્સર અને એન્ટરટેઈનર કરતા આપવા માટે બીજુ ઘણું બધું છે.

આ અભિનેત્રી પાતાલ લોકની દુનિયાની સીઝન-2 માં એક પાવરફુલ પાત્રમાં છે. પોતાના ઊંડાણપૂર્વકના અભિનયને કારણે જાણીતી તિલોતમા શોમે ભારતીય સમાજની અંધારી બાજુમાં લઈ જતી વખણાયેલી વેબ-સીરિઝમાં આકર્ષણ ઉમેર્યું છે. તેનું પાત્ર જયદીપ અહલાવતના લોકપ્રિય હઠીરામ ચૌધરીની ભૂમિકાનું પૂરક બની રહ્યું. તિલોત્તમા પોતાના પાત્રમાં નવા નવા પ્રયોગ કરી રહી છે.