T20 વર્લ્ડ કપમાં 2026ની લીગ મેચમાં ઝિમ્બાબ્વેએ શુક્રવાર, 13 ફેબ્રુઆરીએએ શ્રીલંકાના કોલંબોના આર. પ્રેમદાસા સ્ટેડિયમ ખાતે સ્ટાર્સથી ભરપૂર ઓસ્ટ્રેલિયન ટીમને 23 રનથી હરાવીને ક્રિકેટ ઇતિહાસમાં સૌથી મોટો અપસેટ સર્જ્યો હતો.
મેટ રેનશોની લડાયક ઇનિંગ છતાં ઝિમ્બાબ્વેએ 169 રનના સ્કોરનો બચાવ કર્યો હતો અને સમગ્ર ઓસ્ટ્રેલિયન બેટિંગ લાઇનઅપને ફક્ત 146 રનમાં ઓલઆઉટ કરી હતી. આનાથી ઓસ્ટ્રેલિયાનું સુપર 8 ક્વોલિફિકેશન પણ મુશ્કેલ બન્યું છે. ઝિમ્બાબ્વે સામેની હારથી તેઓ ગ્રુપ Bમાં નંબર 3 પર આવી ગયા હતાં. હકીકતમાં 19 વર્ષમાં પહેલી વાર કોઈ મોટી વૈશ્વિક ટુર્નામેન્ટમાં શેવરોન્સે કાંગારૂઓને હરાવ્યા હતાં. આ ટુર્નામેન્ટમાં ઝિમ્બાબ્વેનો સતત બીજો વિજય હતો, જ્યારે ઓસ્ટ્રેલિયાનો પ્રથમ પરાજય થયો.
બ્રાયન બેનેટના અણનમ 64 રનની મદદથી ઝિમ્બાબ્વેએ આ મેચમાં ઓસ્ટ્રેલિયા સામે 2 વિકેટે 169 રનનો પડકારજનક સ્કોર બનાવ્યો હતો. બેનેટે 56 બોલમાં 7 ચોગ્ગા ફટકારીને ઝિમ્બાબ્વે માટે મોટા સ્કોરનો પાયો નાખ્યો હતો. આ ઉપરાંત વિકેટકીપર તાદીવાનાશે મારુમાની (35) અને રાયન બર્લ (35) એ પણ ઉપયોગી યોગદાન આપ્યું, જ્યારે કેપ્ટન સિકંદર રઝા 13 બોલમાં 25 રન બનાવી અણનમ રહ્યો હતો. ઝિમ્બાબ્વેએ 15 ઓવર પછી 1 વિકેટે 125 રન બનાવ્યા હતા, પરંતુ ઓસ્ટ્રેલિયાએ અંતિમ ઓવરોમાં વાપસી કરી હતી. છેલ્લી પાંચ ઓવરમાં માત્ર 44 રન આપ્યા હતાં.
આ ટાર્ગેટનો બચાવ કરતાં ઝિમ્બાબ્વેએ બીજી ઓવરથી જ ઓસ્ટ્રેલિયા પર હુમલો શરૂ કર્યો. બ્લેસિંગ મુઝારાબાનીએ જોશ ઇંગ્લિસને બીજી ઓવરના પહેલા બોલ પર આઉટ કર્યો હતો. કેમેરોન ગ્રીન અને ટિમ ડેવિડ ખાતું પણ ના ખોલાવી શક્યા. ઓસ્ટ્રેલિયાએ વિકેટ ગુમાવવાનું ચાલુ રાખ્યું અને એક સમયે તેમનો સ્કોર 4 વિકેટે 29 રન હતો. ત્યાંથી ગ્લેન મેક્સવેલ (31)એ મેથ્યુ રેનશો સાથે 50 રનની ભાગીદારી કરી, પરંતુ તે પૂરતું નહોતું. રેનશો આખરે 65 રન બનાવીને આઉટ થયો હતો. બ્લેસિંગ મુઝારાબાનીએ ચાર વિકેટ લીધી અને બ્રેડ ઇવાન્સે પાંચ વિકેટ લીધી હતી.
