શાહરુખ ખાન અને તેની પુત્રી સુહાના ખાનની નવી ફિલ્મ ‘કિંગ’ તેના બજેટના કારણે ખૂબ ચર્ચામાં છે. આ ફિલ્મ તેના નિર્માણના તબક્કામાં છે અને તેનું દિગ્દર્શન સિદ્ધાર્થ આનંદ કરી રહ્યા છે. તેઓ બોલીવૂડના સૌથી મોટા એક્શન ડાયરેક્ટર્સમાં સ્થાન ધરાવે છે. તેમણે ‘પઠાન’, ‘બેંગ બેંગ’, ‘વૉર’ અને ‘ફાઇટર’ જેવી મેગા હિટ ફિલ્મો આપી છે. ‘કિંગ’ આ વર્ષે ક્રિસમસ પર રીલીઝ થશે. આ ફિલ્મમાં દીપિકા પાદુકોણ, અભિષેક બચ્ચન અને રાની મુખરજી પણ મહત્વનાં રોલમાં જોવા મળશે.
કહેવાય છે કે, સિદ્ધાર્થ આનંદે દર્શકોને એક ભવ્ય વિઝ્યુઅલ એક્સપિરીયન્સ આપવામાં કોઈ ખામી રાખવા ઇચ્છતા નથી. સૂત્રો કહે છે કે, સિદ્ધાર્થ આનંદે યુરોપમાં એક ભવ્ય એક્શન સિક્વન્સ શૂટ કરી છે, જેના માટે પ્રોડક્શન ટીમે રૂ. 50 કરોડ જેવી મોટી રકમનો ખર્ચ કર્યો છે. એટલે કે, આ એક્શન સિક્વન્સના શૂટ માટે દરરોજ 5 કરોડનો ખર્ચ થયો છે.” સૂત્રો કહે છે કે, ‘કિંગ’ ભારતીય ફિલ્મ જગતની સૌથી મોંઘી એક્શન ફિલ્મો એક હશે. આ સીક્વન્સ યુરોપમાં શાહરુખ ખાન, અભિષેક બચ્ચન સાથે હાઈ-ઓક્ટેન સ્ટન્ટ્સ કરવા માટે ખાસ રાખવામાં આવેલી આખી ટીમની હાજરીમાં ફિલ્માવવામાં આવ્યો હતો. શાહરુખ ખાન આખા એક્શન સીક્વન્સ પર વ્યક્તિગત રીતે નજર રાખે છે, કારણ કે તેને મોટા પડદા માટે કંઈક વિશાળ અને ભવ્ય બનાવવાનો વિચાર ખૂબ ગમ્યો છે. યુરોપના લોકેશન્સ પર આ આખા સીક્વન્સની પ્લાનિંગમાં તેણે સિદ્ધાર્થ આનંદને મદદ કરી અને તેનું અમલીકરણ પણ યોગ્ય રીતે કરવામાં આવ્યું છે. આ ફિલ્મનું શૂટિંગ જૂન સુધીમાં પૂર્ણ થશે. માર્કેટિંગ ખર્ચ સિવાય ‘કિંગ’નું પ્રોડક્શન બજેટ અંદાજે રૂ. 350 કરોડ હોવાનું માનવામાં આવે છે.
