નવી દિલ્હીમાં ગુરુવાર, 19 ફેબ્રુઆરીએ ઈન્ડિયા એઆઈ ઈમ્પેક્ટ સમિટમાં લીડર્સ પ્લેનરી સેશનમાં સંબોધતા વડાપ્રધાન નરેન્દ્ર મોદીએ જણાવ્યું હતું કે મહત્વાકાંક્ષી ભારતની આર્ટિફિશિયલ ઈન્ટેલિજન્સની વૈશ્વિક યાત્રામાં મુખ્ય ભૂમિકા છે. એઆઇમાં અનૈતિક વર્તનનો અવકાશ અમર્યાદિત છે, તેથી AIના નૈતિક ઉપયોગ માટે નિયમો બનાવવાની જરૂર છે. તેમણે ડેટા સાર્વભૌમત્વનો આદર કરવાના અને સલામતીના પારદર્શક નિયમો બનાવવાના પણ સૂચન કર્યા હતાં. ટેકનોલોજી શક્તિશાળી હોઈ શકે છે, પરંતુ દિશા હંમેશા માનવજાત દ્વારા નક્કી થવી જોઇએ.
મોદીએ જણાવ્યું હતું કે ભારત ભગવાન બુદ્ધની ભૂમિ છે જેમણે કહ્યું હતું કે યોગ્ય કાર્ય યોગ્ય સમજણમાંથી ઉદભવે છે અને તેથી જ એ ખૂબ જ જરૂરી છે કે બધા એક સાથે મળીને એક એઆઇ માટે એક યોગ્ય રોડમેપ બનાવવો જોઇએ. AIમાં અનૈતિક વર્તનનો અવકાશ અમર્યાદિત છે અને તેથી, બધાએ AI માટે નૈતિક વર્તન અને ધોરણોના માળખાને વિસ્તૃત કરવું જોઈએ.AI કંપનીઓ ખૂબ જ મહત્વપૂર્ણ જવાબદારી નિભાવે છે. AIના નૈતિક ઉપયોગ માટે તેમના ત્રણ સૂચનો છે. પહેલું ડેટા સાર્વભૌમત્વનું સન્માન કરવાનું છે, દરેક વ્યક્તિએ AI તાલીમ માટે સ્પષ્ટ ડેટા ફ્રેમવર્ક બનાવવું જોઈએ. AI પ્લેટફોર્મ્સે પણ તેમના સલામતી નિયમો ખૂબ જ સ્પષ્ટ અને પારદર્શક રાખવા જોઈએ. AI માટે સ્પષ્ટ માનવીય મૂલ્યોની પણ જરૂર છે.
આ પ્લેનરી સેશનમાં ફ્રાન્સના પ્રેસિડન્ટ ઇમેન્યુઅલ મેક્રોન, ગૂગલના સીઈઓ સુંદર પિચાઈ, ઓપનએઆઈના સીઈઓ સેમ ઓલ્ટમેન અને એન્થ્રોપિકના સીઈઓ ડારિયો અમોડેઈ સહિતના મહાનુભાવો હાજર રહ્યાં હતાં.
મોદીએ કહ્યું હતું આપણે એઆઈને ખુલ્લું આકાશ આપવું પડશે, પરંતુ તે જ સમયે આપણે લગામ આપણા હાથમાં રાખવી પડશે.AI આપણી સિસ્ટમોને વધુ સ્માર્ટ, વધુ કાર્યક્ષમ અને વધુ અસરકારક બનાવશે. તે લોકો માટે સર્જનાત્મક ભૂમિકાઓ નિભાવવાની વધુ તકો ખોલશે. તે નવીનતા, ઉદ્યોગસાહસિકતા અને નવા ઉદ્યોગોના નિર્માણ માટે એક મોટી તક છે. આજે દુનિયામાં બે પ્રકારના લોકો છે – જેઓ AIમાં ભય જુએ છે અને જેઓ AIમાં નસીબ જુએ છે.હું ગર્વ અને જવાબદારીપૂર્વક કહું છું કે આપણે ભય જોતા નથી. ભારત AIમાં નસીબ જુએ છે, ભારત AIમાં ભવિષ્ય જુએ છે. AIમાં, ભારત તક અને આવતીકાલની બ્લુપ્રિન્ટ જુએ છે.
ભારત મંડપમ ખાતે સમિટમાં ભાગ લેનારા વિશ્વના નેતાઓમાં ફ્રાન્સના પ્રેસિડન્ટ ઈમેન્યુઅલ મેક્રોન, બ્રાઝિલના પ્રેસિડન્ટ લુઈઝ ઈનાસિયો લુલા દા સિલ્વા, શ્રીલંકાના પ્રેસિડન્ટ અનુરા કુમારા ડિસનાયકા અને ભૂટાનના વડાપ્રધાન શેરિંગ તોબગેનો સમાવેશ થાય છે.આ કાર્યક્રમમાં મોરેશિયસના વડા પ્રધાન નવીનચંદ્ર રામગુલામ, ક્રોએશિયાના વડા પ્રધાન આન્દ્રેજ પ્લેન્કોવિક, સર્બિયાના પ્રેસિડન્ટ અલેક્ઝાન્ડર વુસિક, સેશેલ્સના વાઇસ પ્રેસિડન્ટ સેબેસ્ટિયન પિલ્લે, એસ્ટોનિયાના પ્રમુખ અલાર કારિસ અને ફિનલેન્ડના વડા પ્રધાન પેટેરી ઓર્પો સહિતના મહાનુભાવો હાજર રહ્યા હતા.
