ટેક્સાસની રાજધાની ઓસ્ટિનમાં એક બારની બહાર થયેલા ફાયરિંગમાં 21 વર્ષીય ઇન્ડિયન અમેરિકન વિદ્યાર્થી સહિત ચાર લોકોના મોત થયા હતાં. અધિકારીઓ આ હુમલાની આતંકવાદી કૃત્યના એંગલથી તપાસ કરી રહ્યાં છે.
રવિવારે વેસ્ટ સિક્સ્થ સ્ટ્રીટ પર ભીડભાડવાળા વિસ્તારમાં એક બંદૂકધારીએ ગોળીબાર કર્યો ત્યારે ઓસ્ટિનની વતની અને યુનિવર્સિટી ઓફ ટેક્સાસમાં ડ્યુઅલ-ડિગ્રી સિનિયર સવિતા શાનનું મોત થયું હતું. યુનિવર્સિટીના અધિકારીઓએ શાનને મેનેજમેન્ટ ઇન્ફર્મેશન સિસ્ટમ્સ અને અર્થશાસ્ત્રનો અભ્યાસ કરતી એક ઉત્કૃષ્ટ વિદ્યાર્થી નેતા તરીકે વર્ણવી હતી.
સોમવારે બપોરે ઓસ્ટિન પોલીસના ચીફ લિસા ડેવિસે એક ન્યૂઝ કોન્ફરન્સમાં ગોળીબારમાં મૃત્યુ પામેલા બે વ્યક્તિઓની ઓળખની પુષ્ટિ કરી હતી. તેઓ રાયડર હેરિંગ્ટન (19 વર્ષ) અને શાન હતાં.
આ હત્યાથી ઓસ્ટિનના ઇન્ડિયન ડાયસ્પોરામાં અને ખાસ કરીને શહેરના “સિલિકોન હિલ્સ” કોરિડોરમાં રહેતા વિદ્યાર્થીઓ અને ટેકનોલોજી પ્રોફેશનલમાં આઘાતની લાગણી ફેલાઈ ગઈ હતી.
ઓસ્ટિન ખાતે યુનિવર્સિટી ઓફ ટેક્સાસના પ્રવક્તાએ પુષ્ટિ આપી હતી કે શાન શાળામાં વિદ્યાર્થી હતાં અને શાળાના રેકોર્ડ અનુસાર કાનૂની છેલ્લું નામ શનમુગાસુંદરમ હતું.
શંકાસ્પદ હુમલાખોરની ઓળખ ૫૩ વર્ષીય એનડિયાગા ડાયગ્ને તરીકે થઈ હતી, જે મૂળ સેનેગલનો રહેવાસી છે અને અમેરિકાનો નાગરિક છે. પોલીસની વળતી કાર્યવાહીમાં ઘટનાસ્થળે જ તેનું મોત નીપજ્યું હતું.તપાસકર્તાઓએ જણાવ્યું હતું કે ઘટનાસ્થળ અને શંકાસ્પદના નિવાસસ્થાન પરથી મળી આવેલી સામગ્રીમાં ઈરાની ધ્વજ અને ઉગ્રવાદી લખાણો શામેલ છે, જેના કારણે અધિકારીઓએ કટ્ટરપંથી આતંકવાદની શક્યતાની તપાસ કરી રહ્યાં છે.
આ હુમલામાં ઘાયલ થયેલા ટેક્સાસ યુનિવર્સિટીના 21 વર્ષીય સિનિયર કરણ ભક્તે જણાવ્યું હતું કે તે મિત્રો સાથે રાત્રિનો આનંદ માણી રહ્યો હતો ત્યારે એક ગોળી તેના માથાના ભાગમાં વાગી હતી.
