લંડન ગ્રોવનર મેરિયોટ હોટેલમાં યોજાયેલ બ્રિટિશ એશિયન ટ્રસ્ટની વાર્ષિક ઇફ્તારમાં લંડનના મેયર અને હાઉસ ઓફ કોમન્સના ડેપ્યુટી સ્પીકર નુસરત ગની, સાઉથ એશિયન ડાયસ્પોરાના અગ્રણી વ્યક્તિઓ સહિત લગભગ 350 મહેમાનો ઉપસ્થિત રહ્યા હતા.
મેયર સાદિક ખાન, ડેપ્યુટી સ્પીકર નુસરત ગની એમપી, બ્રિટિશ એશિયન ટ્રસ્ટના અધ્યક્ષ લોર્ડ ગઢિયા અને ટ્રસ્ટના ચીફ એક્ઝિક્યુટિવ હિતન મહેતા OBEએ પ્રાસંગીક પ્રવચનો કર્યા હતા.
આ કાર્યક્રમમાં ફિલાન્થ્રોપીસ્ટ, ઉદ્યોગસાહસિકો, પ્રોફેશનલ્સ, અને સમુદાયના નેતાઓએ પાકિસ્તાન અને બાંગ્લાદેશમાં માનસિક સ્વાસ્થ્ય કાર્યક્રમો માટે જાગૃતિ અને ભંડોળ એકત્ર કરવા માટે એકત્ર થયા હતા. બીબીસી પત્રકાર હારૂન રશીદ દ્વારા સંચાલિત આ કાર્યક્રમમાં યુકેમાં પાકિસ્તાનના હાઇ કમિશનર મહામહિમ ડૉ. મોહમ્મદ ફૈઝલ, લોર્ડ જીતેશ ગઢિયા, આસિફ રંગૂનવાલા CBE અને જજ ખાતુન સપનારા, ઇકરામ બટ, રેશમિન ચૌધરી અને રૈશ્મા ઇસ્લામ સહિતના ટ્રસ્ટના રાજદૂતોનું પણ સ્વાગત કરવામાં આવ્યું હતું.
આ પ્રસંગે ઉપસ્થિત મહેમાનોએ ટ્રસ્ટની માનસિક સ્વાસ્થ્ય પહેલને ટેકો આપવા માટે £300,000થી વધુ રકમનું દાન આપ્યું હતું, જેનો હેતુ કલંકનો સામનો કરવા અને પોષણક્ષમ સંભાળની પહોંચ સુધારવાનો છે.
ટ્રસ્ટના અધ્યક્ષ લોર્ડ ગઢિયાએ સંસ્થાના રોયલ ફાઉન્ડિંગ પેટ્રોન કિંગ ચાર્લ્સ III નો સંદેશ વાંચ્યો હતો. બ્રિટિશ એશિયન ટ્રસ્ટની સ્થાપના 2007માં કિંગ ચાર્લ્સ III – તે સમયના પ્રિન્સ ઓફ વેલ્સ – અને બ્રિટિશ એશિયન બિઝનેસ લીડર્સ દ્વારા કરવામાં આવી હતી. જે માનસિક સ્વાસ્થ્ય, શિક્ષણ, રોજગાર અને સંરક્ષણમાં તેના કાર્ય દ્વારા ભારત, પાકિસ્તાન, બાંગ્લાદેશ અને શ્રીલંકામાં 18.8 મિલિયનથી વધુ લોકો સુધી પહોંચી ગયું છે.
