યુકે આકાશમાંથી થતા શાસન પરિવર્તનમાં જોડાશે નહીં : વડા પ્રધાન કેર સ્ટાર્મર

વડા પ્રધાન કેર સ્ટાર્મરે કોમન્સમાં આપેલા એક નિવેદનમાં ઈરાન પર અમેરિકાના નેતૃત્વ હેઠળના પ્રારંભિક હુમલામાં જોડાવાના પોતાના નિર્ણયનો બચાવ કરતા સાંસદોને કહ્યું હતું કે “હું મારા નિર્ણય પર અડગ છું. યુકે આકાશમાંથી થતા શાસન પરિવર્તનમાં જોડાશે નહીં. યુકે યુદ્ધમાં નથી અને વાટાઘાટો દ્વારા સમાધાનની માંગ કરી રહ્યું છે. મારી પાર્ટીએ ઇરાકમાંથી પાઠ શીખ્યો છે.”

સર કેરે કહ્યું હતું કે “રાષ્ટ્રપતિ ટ્રમ્પે શરૂઆતના હુમલાઓમાં સામેલ ન થવાના અમારા નિર્ણય સાથે પોતાનો અસંમતિ વ્યક્ત કરી છે, પરંતુ બ્રિટનના રાષ્ટ્રીય હિતમાં શું છે તે નક્કી કરવાની મારી ફરજ છે. મેં તે જ કર્યું છે. યુકેની કોઈપણ કાર્યવાહી હંમેશા કાયદેસર હોવી જોઈએ. આપણે યુદ્ધમાં નથી અને અમે અમેરિકા અને અન્ય લોકો જે આક્રમક કાર્યવાહી કરી રહ્યા છે તેમાં સામેલ થઈ રહ્યા નથી.”

ડોનાલ્ડ ટ્રમ્પે જાહેરમાં તેમની ટીકા કર્યા પછી વડા પ્રધાને પુષ્ટિ આપી હતી કે તેમણે શરૂઆતમાં અમેરિકાને ડિએગો ગાર્સિયા ખાતે યુકે-યુએસ બેઝનો ઉપયોગ આક્રમક કામગીરી માટે કરવાની પરવાનગી આપવાનો ઇનકાર કર્યો હતો. જોકે, બાદમાં તેમણે ઈરાને સમગ્ર ગલ્ફમાં બદલો લેવા માટે મિસાઇલ અને ડ્રોન હુમલા શરૂ કર્યા પછી રક્ષણાત્મક કાર્યવાહી માટે કેટલાક યુકે બેઝનો ઉપયોગ કરવાની મંજૂરી આપી હતી.

લેબર સાંસદોએ વડા પ્રધાનના નિવેદનનું સ્વાગત કરી આગ્રહ કર્યો હતો કે તેમણે આંતરરાષ્ટ્રીય કાયદાનું સન્માન કરવું જોઈએ. પરંતુ ટોરી અને રિફોર્મ યુકેએ સાથે મળીને ચેતવણી આપી હતી કે વડા પ્રધાને કહેવું પડશે કે તેઓ કોના પક્ષમાં છે.

ઈરાન યુધ્ધ વચ્ચે યુકેમાં આતંકવાદી ધમકીનું સ્તર સમીક્ષા હેઠળ

યુએસ અને ઇઝરાયલી હુમલાઓ સામે ઈરાન બદલો લે તેવી સુરક્ષા ચિંતાઓને પગલે યુકેમાં આતંકવાદી ધમકીના સ્તરની સમીક્ષા કરવામાં આવી રહી છે એમ ડીફેન્સ સેક્રેટરી જોન હીલીએ જણાવ્યું હતું.

યુકેના જોઇન્ટ ટેરરીઝમ એનાલીસીસ સેન્ટર (JTAC) દ્વારા નિર્ધારિત ધોરમો મુજબ વર્તમાન ધમકીનું સ્તર ‘નોંધપાત્ર’ એટલે કે હુમલો “સંભવિત” છે અને આ સ્તર કુલ પાંચ ધમકીઓના સ્તરોમાંથી ત્રીજું છે.

હીલીએ યુકેમાં ઓછામાં ઓછા 20 હુમલાઓના પ્રયાસોને પ્રાયોજિત કરવાના ઈરાનના ઇતિહાસ પર પ્રકાશ પાડ્યો હતો. તે બધા પ્રયાસો નિષ્ફળ ગયા હતા અને યુક્રેન સંઘર્ષ માટે રશિયાને 50,000 ડ્રોન સપ્લાય કર્યાની નોંધ લીધી હતી.

સાયપ્રસમાં RAF બેઝ પર ડ્રોન હુમલો

સાયપ્રસમાં આવેલા રોયલ એરફોર્સ (RAF) અક્રોટિરી એરબેઝ પર ઇરાન દ્વારા એક “માનવરહિત ડ્રોન” દ્વારા કરાયેલા હુમલામાં રન વેને “પ્રમાણમાં મર્યાદિત નુકસાન” થયું હતું. સાવચેતી તરીકે કર્મચારીઓના પરિવારના સભ્યોને બેઝથી દૂર ખસેડવામાં આવ્યા હતા.

સાયપ્રસમાં કરાયેલો આ ડ્રોન હુમલો સીધો ઈરાનથી થયો હતો કે લેબનોનમાંથી હિઝબુલ્લાહ જેવા તેહરાન સમર્થિત પ્રોક્સીઓ દ્વારા કરવામાં આવ્યો હતો તે હજુ સ્પષ્ટ થયું નથી.

માનવામાં આવે છે કે સર કેર સ્ટાર્મરે યુ.એસ. દળોને બ્રિટિશ ઠેકાણાઓનો ઉપયોગ કરવાની મંજૂરી આપી તે પહેલાં જ આ હુમલો કરવામાં આવ્યો હતો. RAF અક્રોટિરી એરબેઝ પર 1,500થી વધુ બ્રિટિશ લશ્કરી કર્મચારીઓ અને તેમના પરિવારના લગભગ 1,400 સભ્યો રહે છે.

સાયપ્રસના RAF એરબેઝ પર હુમલો થયા બાદ ઇઝી જેટે યુકે – સાયપ્રસ વચ્ચેની ફ્લાઇટ્સ રદ કરી

બ્રિટનની સૌથી મોટી બજેટ એરલાઇન, ઇઝી જેટે હુમલો થયા બાદ યુકે અને સાયપ્રસ વચ્ચેની છ ફ્લાઇટ્સ રદ કરી દીધી છે. સાવચેતી રૂપે તા. 3ના રોજ પેફોસ અને લાર્નાકા તથા યુકે વચ્ચે ત્રણ રિટર્ન ફ્લાઇટ્સ કાર્યરત રહેશે નહીં.”

આગામી દિવસોમાં સાયપ્રસ-યુકેની મુસાફરી માટે ગ્રાહકોને નવીનતમ માહિતી માટે ફ્લાઇટ ટ્રેકરની તપાસ કરવા જણાવાયું છે. અન્ય એરલાઇન્સ પર રિબુકિંગ અથવા રિફંડ તેમજ હોટેલમાં રહેવાની વ્યવસ્થા અને ભોજન જેવા વિકલ્પો પૂરા પાડવામાં આવી રહ્યા છે.

વડા પ્રધાન સર કેર સ્ટાર્મરે યુએસ સૈન્યને બ્રિટિશ બેઝનો ઉપયોગ કરવા મંજૂરી આપી

વડા પ્રધાન સર કેર સ્ટાર્મરે ઈરાન સામે રક્ષણાત્મક હેતુઓ માટે યુએસ સૈન્યને ઈરાન તરફ મિસાઇલો છોડવા માટે બ્રિટિશ આરએએફ બેઝનો ઉપયોગ કરવાની તા. 1ની રાત્રે મંજૂરી આપી છે. સ્ટાર્મરનો આંશિક યુ-ટર્ન બ્રિટનને મિડલ ઇસ્ટના યુદ્ધમાં ધકેલી દેવાના પ્રથમ તબક્કા તરીકે જોવામાં આવી શકે છે.

મિડલ ઇસ્ટ મિનિસ્ટર હેમિશ ફોકનરે યુકે યુદ્ધમાં છે કે કેમ તેના જવાબમાં જણાવ્યું હતુ કે “ઈરાન તરફથી બેદરકારીભર્યા હુમલાઓનો સામનો કર્યા બાદ સર કેર સ્ટાર્મરે યુ.એસ.ને બ્રિટિશ ઠેકાણાઓથી લશ્કરી હુમલા કરવાની મંજૂરી આપવાનો નિર્ણય લીધો હતો.

કેમી બેડેનોકે સ્ટાર્મર પર ટ્રમ્પ સાથે ઈરાન યુદ્ધમાં પ્રવેશવા દબાણ વધાર્યું

ટોરી નેતા કેમી બેડેનોકે વડા પ્રધાન કેર સ્ટાર્મરને રક્ષણાત્મક પગલાંથી આગળ વધીને ડોનાલ્ડ ટ્રમ્પના ઈરાન સામેના યુદ્ધમાં યુકેને સંપૂર્ણ ભાગ લેવા માટે દબાણ વધાર્યું છે.

X પરના નિવેદનમાં, તેમણે કહ્યું હતું કે “કેનેડા અને ઓસ્ટ્રેલિયાએ યુનાઇટેડ સ્ટેટ્સ અને ઇઝરાયલ દ્વારા લેવામાં આવેલા પગલાને સમર્થન આપ્યું હતું. છતાં સ્ટાર્મર હજુ પણ બ્રિટિશ લોકોને કહી શક્યા નથી કે આપણો દેશ ક્યાં છે અથવા યુકે આપણા પોતાના એરબેઝનો ઉપયોગ કરવાની મંજૂરી આપશે કે નહીં? ફોરેન સેક્રેટરી હજુ પણ કહી શકતા નથી કે લેબર સરકાર ઈરાન સામેની કાર્યવાહીને સમર્થન આપે છે કે નહીં. આપણી સરકારે કહેવું જોઇએ કે તેઓ યુએસ-ઇઝરાયલના પગલાંનું સ્વાગત કરે છે.”

શેડો ફોરેન સેક્રેટરી અને ટોરી નેતા ડેમ પ્રીતિ પટેલ, એમપીએ કહ્યું હતું કે “ઈરાનમાં કટોકટી પ્રત્યે લેબર સરકારનો પ્રતિભાવ શરમજનક રહ્યો છે. આપણે આપણા સાથીઓને ટેકો આપવો જોઈતો હતો. તેમના માટે પરિસ્થિતિ વધુ મુશ્કેલ ન બનાવીને હજુ પણ સ્ટાર્મર હજુ પણ ફેન્સ પર બેસવાનો પ્રયાસ કરી રહ્યા છે, જે નેતૃત્વની સંપૂર્ણ નિષ્ફળતા છે.”

ડાયેન એબોટે ઇરાન પરના આક્રમણને ગેરકાયદેસર અને આક્રમક ગણાવ્યું

પૂર્વ લેબર નેતા અને એમપી ડાયેન એબોટે વડા પ્રધાન સર કેર સ્ટાર્મર પર “યુએસ-ઇઝરાયલી બોમ્બમારા માટે કવરેજ કરવાનો પ્રયાસ કરવાનો” આરોપ મૂકી ઇરાન ઉપરના આક્રમણને ગેરકાયદેસર આક્રમણ અને યુદ્ધ ગણાવ્યું છે.

MI6ના ભૂતપૂર્વ વડાએ સ્ટાર્મરના પ્રતિભાવની ટીકા કરી

બ્રિટનની સિક્રેટ ઇન્ટેલિજન્સ સર્વિસના ભૂતપૂર્વ વડા સર રિચાર્ડ ડિયરલોવે સ્ટાર્મરના બ્રિટિશ એર બેઝ પરથી ઈરાન સામે લશ્કરી હુમલા કરવાની મંજૂરી આપવાના અભિગમની ટીકા કરી છે.

તેમણે જણાવ્યું હતું કે વડા પ્રધાને “શરૂઆતથી” અમેરિકાને બેઝનો ઉપયોગ કરવાની મંજૂરી આપવા અંગે સ્પષ્ટ હોવું જોઈએ. સરકારે ફક્ત 24 કલાકની અંદર પોતાનો વિચાર બદલ્યો હતો.

તેલના ભાવમાં વધારાથી FTSE પર અસર પડી

ઈરાન અને યુએસ-ઇઝરાયલી દળો વચ્ચે વધતા સંઘર્ષને કારણે તેલના ભાવમાં વધારો થતાં લંડનનો FTSE 100 ઇન્ડેક્સ નીચો ખુલ્યો છે. ઇન્ડેક્સ ખુલ્યા પછી તરત જ બ્લુ ચિપ શેર ઇન્ડેક્સ એક તબક્કે 1 ટકાથી વધુ ઘટી ગયો હતો, પરંતુ ટૂંક સમયમાં જ 0.6 ટકા ઘટીને 10841.4 પર પાછો ફર્યો હતો.

મિડલ ઇસ્ટમાં સંઘર્ષ તીવ્ર બનતા તેલના ભાવમાં ઉછાળો આવ્યો હતો અને બ્રેન્ટ ક્રૂડ 9 ટકાથી વધુ વધ્યું હતું.

• બ્રિટિશ વિમાનો યુકેના હિતો, સાથીઓ અને કર્મચારીઓનું રક્ષણ કરવા માટે સંકલિત રક્ષણાત્મક કામગીરી કરી રહ્યા છે.
• કેર સ્ટાર્મરે પશ્ચિમ એશિયામાં ઈરાનના “અંધાધૂંધ હુમલાઓ”ની નિંદા કરી મણે ઈરાની શાસનને “સંપૂર્ણપણે ઘૃણાસ્પદ” ગણાવી તેના પર દમન અને પ્રાદેશિક અસ્થિરતાનો આરોપ લગાવ્યો
• ઈરાનને ક્યારેય પરમાણુ શસ્ત્ર વિકસાવવાની મંજૂરી આપવી જોઈએ નહીં : સ્ટાર્મર
• યુકેએ ઈરાનને વધુ હુમલાઓ બંધ કરવા, શસ્ત્ર કાર્યક્રમો છોડી દેવા અને રાજદ્વારી પર પાછા ફરવા વિનંતી કરી.
• ઇઝરાયલ અને પેલેસ્ટાઇનની તમામ મુસાફરી સામે ભલામણ સાથે મુસાફરી કરવા સલાહ આપવામાં આવી છે.
• વધતા તણાવ વચ્ચે યુકેએ તેહરાનમાંથી દૂતાવાસના કર્મચારીઓને પાછા ખેંચી લીધા છે.
• ઈરાન પર યુએસ-ઇઝરાયલના પ્રારંભિક હુમલામાં યુકે સામેલ નહોતું અને સરકાર માને છે કે વાટાઘાટો દ્વારા સમાધાન એ શ્રેષ્ઠ લાંબા ગાળાનો ઉકેલ છે.
• બહેરીન, કુવૈત, કતાર અને યુએઈમાં રહેતા બ્રિટિશ નાગરિકોને ફોરેન, કોમનવેલ્થ અને ડેવલપમેન્ટ ઓફિસમાં નોંધણી કરાવવા અને સ્થાનિક “આશ્રયસ્થાન” માર્ગદર્શિકાનું પાલન કરવા વિનંતી કરવામાં આવે છે.
• યુકેમાં સંવેદનશીલ સ્થળોએ સુરક્ષા વધારી દેવામાં આવી છે.