અમદાવાદના નરેન્દ્ર મોદી સ્ટેડિયમ ખાતે રવિવાર, 8 માર્ચે રમાયેલી ટી-20 વર્લ્કકપની ફાઇનલમાં ન્યૂઝીલેન્ડને 96ને હરાવીને ભારત આ ટુર્નામેન્ટમાં ત્રીજી વખત ચેમ્પિયન બન્યું હતું. ભારતે પ્રથમ બેટિંગ કરતાં 20 ઓવરમાં પાંચ વિકેટ ગુમાવીને 255નો જંગી સ્કોર ખડો કર્યો હતો. 256 રનના વિશાળ ટાર્ગેટનો પીછો કરતાં ન્યૂઝીલેન્ડની ટીમ 19 ઓવરમાં 159 રનમાં ઓલઆઉટ થઈ ગઈ હતી.
ન્યૂઝીલેન્ડ તરફથી ટિમ સીફર્ટ 26 બોલમાં 52 રનની આક્રમક ઇનિંગ રમી હતી. માર્ક ચેપમેન 5 બોલમાં 3 રન બનાવ્યાં હતાં, જ્યારે ગ્લેન ફિલિપ્સ 5 બોલમાં 5 રન બનાવીને અક્ષર પટેલના બોલ પર આઉટ થયો હતો. રચિન રવિન્દ્ર પણ માત્ર 1 રન બનાવીને જસપ્રીત બુમરાહના બોલ પર આઉટ થયો હતો. ફીન એલન 7 બોલમાં 9 રન બનાવીને અક્ષર પટેલના બોલ પર આઉટ થયો હતો. ભારત તરફથી જસપ્રીત બુમરાહ અને અક્ષર પટેલે અનુક્રમે ચાર અને ત્રણ વિકેટ લીધી હતી.
ભારતના કેપ્ટન સૂર્યકુમાર યાદવ ટોસ હાર્યો હતો. આ પછી પ્રથમ બેટિંગ કરતાં ભારતે ધમાકેદાર શરૂઆત કરી હતી. ભારતના ઓપનર સંજુ સેમસનને તોફાની 89 રન ફટકાર્યા હતાં, જોકે તે ફરી એકવાર સદી ચુકી ગયો હતો. ઘણી મેચોમાં નિષ્ફળ રહેલા અભિષેક શર્માએ ફાઇનલમાં ઉત્કૃષ્ટ દેખાવ કરી ફક્ત 18 બોલમાં ટુર્નામેન્ટની સૌથી ઝડપી અડધી સદી ફટકારી હતી. ઈશાન કિશને પણ 25 બોલમાં 54 રન બનાવ્યા હતો. જોકે તે પછી ભારતની ત્રણ વિકેટ ઝડપથી પડી ગઈ હતી. કેપ્ટન સૂર્યકુમાર યાદવ શૂન્ય રને આઉટ થયો હતો.
વર્તમાન ચેમ્પિયન ભારત આ ટુર્નામેન્ટમાં ત્રણ વખત વિશ્વ ચેમ્પિયન બન્યું છે. ફાઇનલ મેચ પહેલા અમદાવાદમાં ક્રિકેટનો ફીવર છવાયો હતો. આ મેચની ટિકિટના કાળા બજાર ચાલુ થયાં હતાં. શહેરમાં વિવિધ સ્થળોએ મોટી સ્ક્રીન પર મેચ જોવા માટેની પણ વ્યવસ્થા કરવામાં આવી હતી. આખાય અમદાવાદમાં ભારે ઉત્સાહનો માહોલ હતો. લોકોએ આ મેચ માણવા અને સેલિબ્રેશન માટેની તડામાર તૈયારીઓ કરી હતી. અમદાવાદના ઘણા થિયેટર્સમાં પણ ફાઈનલ મેચના મોટા પડદા પર લાઇવ પ્રસારણનું આયોજન કરાયું હતું અને મોટાભાગના ક્રિકેટ શો હાઉસફુલ થઈ ગયા હતાં.
ભારતે ગ્રુપ સ્ટેજમાં તેની ચારેય મેચ જીતી હતી. જોકે સુપર 8માં દક્ષિણ આફ્રિકા સામે તેની કારમી હાર થઈ હતી. આ પછી સુપર-8માં ભારતીય ટીમે ઝિમ્બાબ્વે અને વેસ્ટ ઈન્ડિઝને હરાવીને સેમિફાઇનલમાં પ્રવેશ કર્યો હતો. ન્યૂઝીલેન્ડ લીગ તબક્કા દરમિયાન દક્ષિણ આફ્રિકા પછી તેમના ગ્રુપમાં બીજા સ્થાને રહ્યું હતું.
