અમેરિકાના પ્રેસિડન્ટ ડોનાલ્ડ ટ્રમ્પે મંગળવારે જાહેરાત કરી હતી કે ભારતની રિલાયન્સ ઇન્ડસ્ટ્રીઝ ટેક્સાસમાં ખુલી રહેલી નવી ઓઇલ રિફાઇનરીમાં રોકાણ કરશે. આ સોદા માટે કંપની અને ભારતમાં અમારા ભાગીદારોનો આભાર માનું છું. ભારતની રિલાયન્સ ઇન્ડસ્ટ્રીઝના રોકાણની મદદથી અમેરિકાને 50 વર્ષમાં પ્રથમ નવી ઓઇલ રિફાઇનરી મળશે.
ટ્રમ્પે એક સોશિયલ મીડિયા પોસ્ટમાં તેને ઐતિહાસિક 300 બિલિયન ડોલરના સોદા તરીકે વર્ણવતા કહ્યું હતું કે આ પ્રોજેક્ટ તેમના વહીવટીતંત્રના “અમેરિકા ફર્સ્ટ એજન્ડા”ને કારણે શક્ય બન્યો છે. આ સોદો અમેરિકાના ઇતિહાસમાં સૌથી મોટો તથા અમેરિકન કામદારો, ઊર્જા અને દક્ષિણ ટેક્સાસના મહાન લોકો માટે એક મોટી જીત છે.
ટ્રમ્પે જણાવ્યું હતું કે આ જબરદસ્ત રોકાણ માટે ભારતમાં અમારા ભાગીદારો અને તેમની સૌથી મોટી ખાનગી ઊર્જા કંપની રિલાયન્સનો આભાર. ટેક્સાસના બ્રાઉન્સવિલે બંદર ખાતે નવી રિફાઇનરી યુએસ બજારોને બળતણ પૂરું આપશે, રાષ્ટ્રીય સુરક્ષાને મજબૂત બનાવશે, અમેરિકન ઉર્જા ઉત્પાદનને વેગ આપશે અને હજારો નોકરીઓનું સર્જન કરશે.
અમેરિકા ફર્સ્ટ રિફાઇનિંગ (AFR)ની એક પ્રેસ રિલીઝમાં જણાવાયું છે કે તેને ફેબ્રુઆરીમાં “ગ્લોબલ સુપરમેજર” તરફથી 10-આંકડાના મૂલ્યાંકન પર નવ-અંકનું રોકાણ મળ્યું છે. તેને આ જ વૈશ્વિક સુપરમેજર સાથે 20-વર્ષની બંધનકર્તા ઓફટેક ટર્મ શીટ પર પણ હસ્તાક્ષર કર્યા છે, જે અમેરિકન શેલ ઓઇલમાંથી ફક્ત અમેરિકન ઉત્પાદિત ઊર્જા ખરીદવા, પ્રોસેસ કરવા અને વિતરણ કરવા માટે પ્રતિબદ્ધતાઓ સુરક્ષિત કરે છે”.
જોકે આ પ્રેસ રિલીઝમાં રિલાયન્સ ઇન્ડસ્ટ્રીઝનો ઉલ્લેખ કરાયો ન હતો. રિલાયન્સ આ પ્રોજેક્ટમાં કેટલું રોકાણ કરશે તેની પણ સ્પષ્ટતા કરાઈ ન હતી. કંપનીએ જણાવ્યું હતું કે તે 2026ના બીજા ક્વાર્ટરમાં રિફાઇનરીનું ખાતમુહૂર્ત કરવાની યોજના ધરાવે છે.
