બોલીવૂડમાં મોટા બજેટમાં નિર્માણ પામી રહેલી અનેક ફિલ્મોની દર્શકો આતુરતાપૂર્વક રાહ જોઇ રહ્યા છે. તો બીજી તરફ એવા નવોદિત કલાકારોની ફિલ્મો આ વર્ષે રીલીઝ થશે જેના દ્વારા તેઓ પોતાનુ નસીબ અજમાવી રહ્યા છે. સાઉથના જાણીતા સ્ટાર્સની સાથોસાથ બોલીવૂડના કેટલાક સ્ટારકિડ્સ પણ જોવા મળશે.
યશવર્ધન આહુજા
ગોવિંદાનાં પત્ની સુનિતા આહુજાએ જાહેરાત કરી હતી કે, તેમનો પુત્ર યશવર્ધન હવે ફિલ્મોમાં પદાર્પણ કરશે. હર્ષવર્ધનને 2023ની હિટ તેલુગુ ફિલ્મ ‘બેબી’ની હિન્દી રીમેકથી લોન્ચ કરવાનું આયોજન હતું પરંતુ બાબિલ ખાન અચાનક આ પ્રોજેક્ટમાંથી નીકળી જતાં બધું ખોરવાયું હતું. હવે સૂત્રોના જણાવ્યા મુજબ યશવર્ધન સાજિદ ખાન દિગ્દર્શિત ‘રોમ-કોમ’ બોલીવૂડમાં કારકિર્દીનો પ્રારંભ કરશે.
અમન ઇન્દ્રકુમાર
દિલ, બેટા, રાજા, ઇશ્ક, મસ્તી, ધમાલ, ડબલ ધમાલ જેવી અનેક ફિલ્મોનું નિર્માણ કરનારા જાણીતા દિગ્દર્શક ઈન્દ્ર કુમારનો પુત્ર અમન ‘તેરા યાર હું’ નામની ફિલ્મથી બોલીવૂડમાં પોતાની કારકિર્દી પ્રારંભ કરશે. 2024ના અંતમાં યોજાયેલા ફિલ્મના મુહૂર્ત દરમિયાન આમિર ખાન, અજય દેવગણ અને રણવીર સિંહ જેવા ટોપના સ્ટાર્સની હાજર રહ્યા હતા. આ ફિલ્મને ગત વર્ષે રીલીઝ કરવાનું આયોજન હતું પરંતુ કોઇ કારણસર તેમાં વિલંબ થતાં હવે આ વર્ષે તે રીલીઝ થશે. ફિલ્મમાં અમનની અભિનેત્રી આકાંક્ષા શર્મા છે અને તેનું દિગ્દર્શન મિલાપ મિલન ઝવેરીએ કર્યું છે.
સાઈ પલ્લવી
સાઉથ ઇન્ડિયન ફિલ્મની મોખરાની અભિનેત્રીઓમાં સ્થાન ધરાવતી સાઈ પલ્લવી આ વર્ષે બે મોટી હિન્દી ફિલ્મો દ્વારા બોલીવૂડમાં પદાર્પણ કરશે. તે નીતેશ તિવારીની ‘રામાયણ પાર્ટ-1’માં રણબીર કપૂર (રામ) સાથે સીતા માતાની ભૂમિકામાં જોવા મળશે. જ્યારે તેની બીજી ફિલ્મ આમિર ખાનના પુત્ર જુનૈદ ખાન સાથે ‘મેરે રહો’ છે. આ ફિલ્મ ગત વર્ષે રીલીઝ કરવાનું આયોજન હતું.
શ્રીલાલા
દક્ષિણ ભારતીય ફિલ્મોની લોકપ્રિય યુવા અભિનેત્રી શ્રીલાલા ખરેખર તો ગત વર્ષે જ બોલીવૂડમાં પ્રવેશ કરવાની હતી પરંતુ કાર્તિક આર્યન સાથેની તેની ફિલ્મનું શૂટિંગ પૂર્ણ ન થતાં એ હવે આ વર્ષે રીલીઝ થશે. જાણીતા દિગ્દર્શક અનુરાગ બાસુની આ રોમેન્ટિક મ્યુઝિકલ ડ્રામા ફિલ્મની ઘણી ચર્ચા થઇ રહી છે. સાઉથમાં શ્રીલીલાનો ખૂબ જ વિશાળ ચાહક વર્ગ હોવાનું કહેવાય છે.
અંશ દુગ્ગલ-પ્રગતિ શ્રીવાસ્તવ
ફિલ્મકાર આનંદ એલ. રાયે પોતાના બેનર હેઠળની ‘નખરેવાલી’ નામની ફિલ્મથી અંશ દુગ્ગલ અને પ્રગતિ શ્રીવાસ્તવની નવી જોડીને લોન્ચ કરવાની જાહેરાત કરી હતી. ફિલ્મને ગત વર્ષે વેલેન્ટાઈન્સ ડેના રોજ રીલીઝ કરવાનું આયોજન હતું પરંતુ કોઈક કારણસર રીલીઝ પાછળ ઠેલાઈ હતી. હવે આ ફિલ્મ આ વર્ષે રીલીઝ થશે.
મેધા રાણા
મોડેલ તરીકે નસીબ અજમાવ્યા પછી અભિનેત્રી બનેલી મેધા રાણાએ મલ્ટિસ્ટારર વોર ફિલ્મ ‘બોર્ડર-ટુ’થી પડદા પર પદાર્પણ કર્યું હતું. આ સુપર હિટ ફિલ્મમાં મેધાનો હીરો વરુણ ધવન હતો. 26 વર્ષીય મેધા રાણા મૂળ બેંગલુરુની છે. જોકે, તેનો ઉછેર ગુરુગ્રામમાં થયો હતો. તે આર્મી પરિવારમાંથી આવે છે.
