નોર્થ વેસ્ટ લંડનના હેરોમાં 3 માર્ચ, મંગળવારના રોજ સાંજે ઇન્ટરનેશનલ સિદ્ધાશ્રમ શક્તિ સેન્ટર દ્વારા ભૂતપૂર્વ હેરો સિવિક સેન્ટરના કાર પાર્કમાં આયોજિત હોલિકા દહનની ઉજવણી દરમિયાન 15-20 યુવાનો દ્વારા હુમલો કરીને સ્પીકરની તોડફોડ કરી એક યુવાનને માર મારવાના બનાવને પગલે યુકેના હિન્દુ સમાજમાં ઉશ્કેરાટ વ્યાપી જવા સાથે ચિંતા ફેલાઈ છે. એમપી બોબ બ્લેકમેન સહિત સિદ્ધાશ્રમ શક્તિ સેન્ટર આ હુમલા પાછળ સ્થાનિક મસ્જીદમાથી આવેલા 20 જેટલા મુસ્લિમ યુવાનો દોષિત હોવાનો આરોપ લગાવી રહ્યા છે. પોલીસે હુમલા સંબંઘે એક કિશોરની ધરપકડ કરી છે.
હેરો ઇસ્ટના એમપી બોબ બ્લેકમેને સ્થાનિક મસ્જિદમાંથી આવેલા મુસ્લિમ યુવાનો દ્વારા હોળીની ઉજવણી કરતા હિન્દુઓ પર કરાયેલા હુમલા અંગે પાર્લામેન્ટમાં નિવેદન કર્યું હતું અને સરકારને આકરા પગલા ભરવા અને બનાવ અંગે તપાસ કરી પાર્લામેન્ટમાં નિવેદન આપવા અપીલ કરી હતી.
બોબ બ્લેકમેને કોમન્સમાં કહ્યું હતુ કે ‘’20 જેટલા હુમલાખોરો હોવા છતાં, ફક્ત એક જ વ્યક્તિની ધરપકડ કરવામાં આવી છે. આનાથી પણ વધુ ચિંતાજનક વાત એ છે કે, સત્તાવાર પોલીસ નિવેદન કાર્યક્રમના આયોજકો, પીડિતો અને ઘટનાસ્થળે હાજર દરેક પ્રત્યક્ષદર્શીના નિવેદનોનો વિરોધાભાસ કરે છે, અને તેને હિન્દુ ધાર્મિક ઉજવણી પર લક્ષિત હુમલો તરીકે સ્વીકારવાનો ઇનકાર કરે છે. મેટ પોલીસે આ વિરોધાભાસ સમજાવવો જોઈએ અને પુષ્ટિ કરવી જોઈએ કે જવાબદાર તમામ લોકોને ન્યાય અપાવવા માટે સંપૂર્ણ તપાસ ચાલી રહી છે.”
હેરોના કાઉન્સિલર સુસાન હોલે ઉમેર્યું હતું કે “હેરોમાં અવિશ્વસનીય હિન્દુ સમુદાય છે… શાંતિપ્રિય સૌમ્ય લોકો. હોળીની ઉજવણી પર હુમલો કરવાની તેમની હિંમત કેવી રીતે થઈ!”
સિદ્ધાશ્રમ શક્તિ સેન્ટર દ્વારા એક અખબારી યાદીમાં જણાવાયું છે કે ‘’પૂર્વ હેરો સિવિક સેન્ટરના કાર પાર્કમાં સ્થાનિક કાઉન્સિલની પૂર્વ પરવાનગી સાથે હોલિકા દહનની ઉજવણીનો કાર્યક્રમ યોજાયો હતો. તેમાં બે મેયર, કાઉન્સિલરો, સ્થાનિક રાજકીય નેતાઓ, આંતરધાર્મિક નેતાઓ અને વરિષ્ઠ ઇમરજન્સી સેવાના અધિકારીઓ હાજર રહ્યા હતા. કાર્યક્રમ સમાપ્ત થવાના આરે હતો ત્યારે રાત્રે 8.30 વાગ્યા પછી શરૂઆતમાં, ત્રણ યુવાનોએ ઉજવણી સ્થળે પ્રવેશ કરી સાઉન્ડ સિસ્ટમમાં દખલ કરીને અને ધક્કો મારીને સ્પીકર્સ વગેરેને નુકસાન પહોંચાડી ઉજવણીમાં વિક્ષેપ પાડવાનો પ્રયાસ કર્યો હતો. સેન્ટરના સ્વયંસેવકો અને સુરક્ષા કર્મચારીઓએ દરમિયાનગીરી કરી તેમને વિસ્તાર છોડી દેવા કહેતા તેઓ ચાલ્યા ગયા હતા.
પ્રેસ યાદીમાં જણાવ્યા મુજબ ‘’આ જૂથ લગભગ દસ મિનિટ પછી લગભગ 15 થી 20 અન્ય મુસ્લિમ યુવાનો સાથે પાછું ફર્યું હતું અને હોળીની ઉજવણી કરી રહેલા લોકો પર કાચની બોટલો અને લાકડીઓ સહિતની હથિયારો વડે હુમલો કર્યો હતો. જેનાથી ઉપસ્થિત સૌ લોકોમાં ગભરાટ ફેલાયો હતો.’’
સોસ્યલ મિડીયા પર વાઇરલ થયેલા વિડીયો ફૂટેજમાં ટોળા દ્વારા એક યુવાનનો માર મારવામાં આવતો હોવાનું જોવા મળ્યું હતું. સ્વયંસેવકો અને સુરક્ષા કર્મચારીઓએ દરમિયાનગીરી કરી હિંસાનો ભોગ બનેલા યુવાનને બચાવી લેવાયો હતો અને એક હુમલાખોરને પકડી લઇને પોલીસને સોંપવામાં આવ્યો હતો. બીજી તરફ આયોજકોએ પોલીસ બોલાવતા અધિકારીઓએ સાક્ષીઓના નિવેદનો લઇ ઘટનાના સંદર્ભમાં જાતિગત રીતે ઉગ્ર હેટ ક્રાઇમની શંકાના આધારે 14 વર્ષના કિશોરની ધરપકડ કરી હતી. જોકે પરિસ્થિતિ ઝડપથી કાબૂમાં આવી ગઈ હતી અને કોઈ ગંભીર ઈજાઓ થઈ ન હતી.
6 માર્ચે જારી કરાયેલા એક નિવેદનમાં, સિદ્ધાશ્રમ શક્તિ સેન્ટરે જણાવ્યું હતું કે સ્વયંસેવકો અને સુરક્ષા ટીમોએ ઉપસ્થિતો સૌ ભક્તોને સુરક્ષિત રાખવા અને પરિસ્થિતિ વધુ વકરી ન જાય તે માટે જવાબદારીપૂર્વક કાર્ય કર્યું હતું. આ ઘટનાને કાબુમાં લેવાનો પ્રયાસ કરતી વખતે તેમના કેટલાક સુરક્ષા કર્મચારીઓ ઘાયલ થયા હતા. આધ્યાત્મિક નેતા પૂ. શ્રી રાજરાજેશ્વર ગુરુજીએ ઘટના દરમિયાન વ્યક્તિગત રીતે વરિષ્ઠ પોલીસ અધિકારીઓનો સંપર્ક કર્યો હતો, અને કાર્યક્રમ પૂરો થાય ત્યાં સુધી ઉપસ્થિતોની સલામતી સુનિશ્ચિત કરવા માટે વધારાના અધિકારીઓ તૈનાત કરવામાં આવ્યા હતા.
લંડન બરો ઓફ હેરો પોલીસિંગ લીડના સુપરિન્ટેન્ડેન્ટ ઝુબિન રાઈટરે જણાવ્યું હતું કે: “પોલીસ પૂર્વ હેરો સિવિક સેન્ટરમાં બનેલી ઘટના બાદ સ્થાનિક ચિંતાથી વાકેફ છે. પોલીસ અધિકારીઓએ 14 વર્ષના કિશોરને અશ્વેત સમુદાય પ્રત્યે વંશીય અપમાનજનક ટિપ્પણી કરતો સાંભળવામાં આવ્યા બાદ અને તેની હિંસા અને વંશીય રીતે વધુ ગંભીર હેટ ક્રાઇમના ગુનાની શંકાના આધારે ધરપકડ કરી હતી. તેને ત્યારથી વધુ પૂછપરછ માટે જામીન પર મુક્ત કરવામાં આવ્યો છે. કોઈ ઈજાના અહેવાલ મળ્યા નથી અને અમે ઘટનાસ્થળે હાજર અનેક સાક્ષીઓ સાથે વાત કરી છે, જેઓ અમારી તપાસમાં સહયોગ આપી રહ્યા છે.’’
રાઈટરે જણાવ્યું હતું કે “હું સોશિયલ મીડિયા પર ફેલાતી અટકળોથી વાકેફ છું અને એવી ચિંતાઓ છે કે હિન્દુ ફોબિક ભાષાનો ઉપયોગ કરવામાં આવ્યો હતો. હું તપાસ ટીમ સાથે નિયમિત સંપર્કમાં છું અને તેમણે જણાવ્યું છે કે આ ઘટના હિન્દુ કે ઇસ્લામિક સમુદાયોને લક્ષ્ય બનાવીને કરવામાં આવી નથી. મેટ પોલીસ આ ઘટનાથી પેદા થયેલી ચિંતાને સમજે છે અને તમામ સમુદાયોના તમામ રહેવાસીઓને ખાતરી આપવા માટે પ્રતિબદ્ધ છે. કોઈપણ પ્રકારના નફરતના ગુનાને અત્યંત ગંભીરતાથી લેવામાં આવે છે, અને જ્યાં ગુનાઓ ઓળખાય છે, ત્યાં મેટ ઝડપથી અને મજબૂત રીતે કાર્યવાહી કરશે.”
તેમ છતાં, આ ઘટનાએ સ્થાનિક હિન્દુ સમુદાયના સભ્યો પોતાના ધાર્મિક અને સાંસ્કૃતિક કાર્યક્રમો કોઈપણ વિક્ષેપ વિના યોજી શકે તે સુનિશ્ચિત કરવા માટે મજબૂત સુરક્ષા વ્યવસ્થા માટે સરકારને હાકલ કરી છે. અધિકારીઓનું કહેવું છે કે પૂછપરછ ચાલુ છે અને પોલીસ સાક્ષીઓના નિવેદનો, વિડીયો ફૂટેજ અને ઘટના સંબંધિત અન્ય પુરાવાઓની સમીક્ષા કરી રહી છે.
ઇન્ટરનેશનલ સિદ્ધાશ્રમ શક્તિ સેન્ટર છેલ્લા 15 વર્ષથી હેરોમાં આ હોળી અને હોલિકા દહન ઉજવણીનું આયોજન એક જ સ્થળે કરી રહ્યું છે અને આ તહેવાર હેરોમાં શાંતિ, સંવાદિતા અને એકતાનું પ્રતીક બની ગયો છે. આ ઉજવણીમાં લગભગ 1,000 લોકોએ હાજરી આપી હતી.
