લોસ એન્જેલસમાં 98મા એકેડમી એવોર્ડ્સ સમારંભમાં બોલીવૂડ અભિનેત્રી પ્રિયંકા ચોપરા જોનસ ફરી એકવાર મંચ પર જોવા મળી હતી. ડોલ્બી થીએટર ખાતે ખાતે યોજાયેલા આ ભવ્ય સમારંભમાં પ્રિયંકાએ ‘બેસ્ટ ઇન્ટરનેશનલ ફીચર ફિલ્મ’ કેટેગરીનો એવોર્ડ રજૂ કર્યો હતો. પ્રિયંકાએ અગાઉ 2016માં એકેડેમી એવોર્ડ રજૂ કર્યો હતો.
આ સમારંભનું સંચાલન કોમેડિયન કોનન ઓ’બ્રાયનએ કર્યું હતું. પ્રિયંકાએ આ એવોર્ડ ઓસ્કાર વિજેતા અભિનેતા જેવિઅર બાર્ડેમ સાથે મળીને રજૂ કર્યો હતો. બાર્ડેમે પોતાના પ્રારંભિક સંબોધનમાં “નો ટુ વોર, ફ્રી પેલેસ્ટાઇનને” જેવી અપીલ પણ કરી હતી.
વ્હાઇટ ફેધરવાળા ડિઓર ગાઉનમાં સજ્જ પ્રિયંકાએ કહ્યું હતું કે સિનેમા દુનિયાભરની માનવીય લાગણીઓને જોડવાની અનોખી શક્તિ ધરાવે છે. આંતરરાષ્ટ્રીય ફિલ્મોની વાર્તાઓ આપણને અલગ-અલગ સંસ્કૃતિઓ સાથે જોડે છે અને દુનિયાના દરેક ખૂણામાંથી આવી રહેલી લાગણીઓનો અહેસાસ કરાવે છે.
‘બેસ્ટ ઇન્ટરનેશનલ ફીચર ફિલ્મ’ કેટેગરીમાં નોર્વેની ફિલ્મ “સેન્ટિમેન્ટલ વેલ્યૂ”ને એવોર્ડ મળ્યો હતો. પ્રિયંકા પોતાના પતિ અને ગાયક નિક જોનાસ સાથે સમારંભમાં હાજર રહી હતી. આ દરમિયાન ઉદ્યોગપતિ મુકેશ અંબાણીની પુત્રી ઇશા અંબાણી પણ ઓસ્કારના રેડ કાર્પેટ પર પહેલીવાર હાજરી આપી હતી. તેઓ પોતાના પતિ આનંદ પિરામલ સાથે સમારંભમાં આવ્યાં હતાં.
