અમેરિકાના ટેક્સાસ રાજ્યમાં હાઇપ્રોફાઇલ કેમ્પેઇન કેસમાં ભારતીય મૂળના કાઉન્ટી જજને મની લોન્ડરિંગના આરોપમાં દોષી ઠેરવવામાં આવ્યા છે. જ્યૂરી સજાની જાહેરાત 16 જૂને કરશે. સજાની જાહેરાત પછી તેમને પદ પરથી હટાવવામાં આવે તેવી શક્યતા છે.
કે. પી. જ્યોર્જને 2થી 10 વર્ષ સુધીની જેલ સજા અને 10,000 અમેરિકન ડોલર સુધીનો દંડ થઈ શકે છે. ફોર્ટ બેન્ડ કાઉન્ટીના જજ તરીકે કાર્યરત જ્યોર્જ પર આરોપ છે કે તેમણે ચૂંટણી અભિયાનના ફંડનો વ્યક્તિગત ખર્ચ માટે દુરુપયોગ કર્યો હતો.
ફરિયાદ પક્ષના જણાવ્યા મુજબ જ્યોર્જે પોતાના કેમ્પેઇન એકાઉન્ટમાંથી 46,000 ડોલરથી વધુ રકમ પોતાના વ્યક્તિગત ખાતામાં ટ્રાન્સફર કરી અને તેનો ઉપયોગ ઘર સંબંધિત ખર્ચ સહિત ખાનગી ઉપયોગ માટે કર્યો હતો. બચાવ પક્ષે દલીલ કરી હતી કે આ રકમ તેમણે પોતાની કેમ્પેઇન ફંડને આપેલી પર્સનલ લોન હતી અને તે રકમ પાછી લીધી હતી.
જ્યુરીએ ઘણા કલાકોની વિચારવિમર્શ બાદ તેમને દોષી ઠેરવ્યાં હતાં અને તેમને કોર્ટમાંથી જ કસ્ટડીમાં લેવામાં આવ્યા હતાં. આ પછી બોન્ડ પર તેમને મુક્ત કરાયા હતાં. અને શુક્રવારે સાંજે લગભગ 8 વાગ્યે જેલમાંથી બહાર આવ્યાં હતાં.
જ્યોર્જે સજા નક્કી કરવાની જવાબદારી જજ પર છોડી હતી. તેમની સજા અંગેની સુનાવણી 16 જૂને યોજાશે.
જિલ્લા એટર્નીઓએ જણાવ્યું કે કાયદા મુજબ દોષિત ઠેરવાયા બાદ તેમને પદ પરથી હટાવવા જોઇએ, પરંતુ સજા જાહેર થયા પછી જ આ પ્રક્રિયા પૂરી થશે. ટેક્સાસ કાયદા મુજબ સજાની જાહેરાત સુધી તેઓ પદ પર રહી શકે છે, જોકે આગળની કાનૂની પ્રક્રિયા અને અપીલના આધારે તેમને સસ્પેન્ડ અથવા દૂર કરવામાં આવી શકે છે.
જ્યોર્જ સ્થાનિક રાજકારણમાંથી આગળ વધીને ટેક્સાસમાં સૌથી અગ્રણી ભારતીય-અમેરિકન ચૂંટાયેલા અધિકારીઓમાંના એક બન્યા હતાં. તેમને આ પ્રદેશમાં ડાયસ્પોરાના વધતા રાજકીય પ્રભાવનું પ્રતિનિધિત્વ કરતી એક મુખ્ય વ્યક્તિ તરીકે ગણવામાં આવતા હતાં. ફોર્ડ બેન્ડ કાઉન્ટીમાં નોંધપાત્ર સંખ્યામાં ઇન્ડિયન અમેરિકનની વસતી છે.
