ઇરાને શનિવાર, 21 માર્ચે હિંદ મહાસાગરમાં ચાગોસ દ્વીપસમૂહમાં આવેલા યુએસ-યુકેના લશ્કરી મથક ડિએગો ગાર્સિયા પર બે બેલિસ્ટિક મિસાઇલો છોડીને દુનિયાની તેમની ક્ષમતા અંગે ચોંકાવી હતી. ઈરાને આ બેઝ તરફ ઇન્ટરમેડિયેટ રેન્જની બે બેલિસ્ટિક મિસાઇલો છોડી હતી, પરંતુ તે ટાર્ગેટ સુધી પહોંચી ન હતી. એક મિસાઇલ નિષ્ફળ ગઈ હતી, જ્યારે બીજી મિસાઇલ સામે યુએસ યુદ્ધ જહાજે SM-3 ઇન્ટરસેપ્ટર ફાયર કર્યું હતું.
ઇરાનનો આ હુમલો દર્શાવે છે કે ઈરાનની મિસાઈલોની રેન્જ દુશ્મનની ધારણા કરતાં ઘણી વધુ છે. ડિએગો ગાર્સિયા બેઝ ઇરાનથી આશરે 3,800 કિમી (2,400 માઇલ્સ) દૂર છે.
બ્રિટને ઈરાન પર યુએસ-ઇઝરાયલી હુમલાઓમાં ભાગ લીધો નથી, પરંતુ અમેરિકન બોમ્બર્સને ઈરાનના મિસાઇલ સ્થળો પર હુમલો કરવા માટે યુકે બેઝનો ઉપયોગ કરવાની મંજૂરી આપી છે. શુક્રવારે, બ્રિટિશ સરકારે જણાવ્યું હતું કે યુએસ બોમ્બરો ડિએગો ગાર્સિયા સહિતના યુકે બેઝનો ઉપયોગ કરી શકે છે. જોકે બ્રિટન આ જાહેરાત કરે તે પહેલા ઇરાનને ડિએગો ગાર્સિયા બેઝ પર મિસાઇલ હુમલા કર્યા હતાં.
ઇઝરાયલી મિલિટરીના વડા ઇયલ ઝમીરે શનિવારે જણાવ્યું હતું કે ઇરાની દળોએ પહેલીવાર લાંબા અંતરની મિસાઇલો છોડી હતી, જેનાથી મધ્ય પૂર્વની બહાર પણ હુમલાઓનું જોખમ વધી ગયું છે. ઇરાને હિંદ મહાસાગરમાં યુએસ-યુકે લશ્કરી બેઝ ડિએગો ગાર્સિયા પર 4,000 કિલોમીટર રેન્જની બે બેલિસ્ટિક મિસાઇલો છોડી હતી. ઇરાને સંઘર્ષમાં લાંબા અંતરની મિસાઇલોનો ઉપયોગ પ્રથમ વખત કર્યો હતો. આ મિસાઇલો ઇઝરાયલ પર હુમલો કરવા માટે નથી. તેની રેન્જ યુરોપિયન રાજધાનીઓ બર્લિન, પેરિસ અને રોમ સુધીની છે, તેથી સીધા ખતરાના રેન્જમાં છે.
