રાજકારણ, બિઝનેસીસ, મનોરંજન, રમતગમત અને જાહેર જીવનમાં યુકેના 101 સૌથી પ્રભાવશાળી સાઉથ એશિયનોનું વાર્ષિક રેન્કિંગ ધરાવતા GG2 પાવર લિસ્ટ 2026માં આ વર્ષે હોમ સેક્રેટરી શબાના મહમૂદ ટોચ પર બિરાજ્યા છે. તેમના પછી લંડનના મેયર સર સાદિક ખાન બીજા સ્થાને છે, જ્યારે ફેબ્રુઆરીમાં વડા પ્રધાન સર કેર સ્ટાર્મરના જોઇન્ટ એક્ટીંગ ચિફ ઓફ સ્ટાફ તરીકે નિમણૂક પામેલા વિદ્યા એલેકસન ત્રીજા સ્થાને છે.

16મા વર્ષમાં પ્રવેશેલા GG2 પાવર લિસ્ટ 2026નું બુધવાર તા. 25ના રોજ સેન્ટ્રલ લંડનમાં યોજાયેલા 27મા વાર્ષિક GG2 લીડરશીપ એન્ડ ડાયવર્સિટી એવોર્ડ્સમાં વિમોચન કરવામાં આવ્યું હતું. આ પ્રસંગે ડેપ્યુટી પ્રાઇમ મિનિસ્ટર ડેવિડ લેમી મુખ્ય મહેમાન તરીકે ઉપસ્થિત રહ્યા હતા.

શબાના મહમૂદ સપ્ટેમ્બર 2025માં કેબિનેટ ફેરબદલ બાદ હોમ સેક્રેટરી તરીકે બઢતી પામ્યા હતા. જ્યારે મેયર સર સાદિક ખાન ગયા વર્ષે આ યાદીમાં ટોચ પર હતા.

કોર્ટ ઓફ અપીલના જજ સર રવિન્દર સિંહ ચોથા સ્થાને છે, અને બાર્કલેઝના ચીફ એક્ઝિક્યુટિવ સીએસ વેંકટકૃષ્ણન યાદીમાં પાંચમા સ્થાને છે. તો દેશના જસ્ટીસ સેક્રેટરી અને ભારતીય મૂળના પ્રથમ લેબર કેબિનેટ મિનિસ્ટર  લિસા નંદી છઠ્ઠા સ્થાને છે.

ભૂતપૂર્વ વડા પ્રધાન ઋષિ સુનક યાદીમાં સાતમા ક્રમે છે, જ્યારે બિઝનેસ અને ઇન્વેસ્ટમેન્ટ માટેના યુએસ ખાતેના વડા પ્રધાનના ખાસ દૂત વરુણ ચંદ્રા આઠમા ક્રમે છે. બીબીસીના અધ્યક્ષ સમીર શાહ નવમા અને ગાયક-ગીતકાર ચાર્લી XCX 10મા સ્થાને છે.

ઇસ્ટર્ન આઇ અને ગરવી ગુજરાત સાપ્તાહિકો, અન્ય પ્રકાશનો અને ટાઇટલના પ્રકાશક એશિયન મીડિયા ગ્રુપ દ્વારા આયોજિત આ ગાલા ઇવેન્ટમાં યુકેના ટોચના વંશીય લઘુમતી પ્રતિભાઓની શ્રેષ્ઠતાની સરાહના કરવામાં આવી હતી જેમાં 600થી વધુ ટોચના અગ્રણીઓએ હાજરી આપી હતી.

આ વર્ષના GG2 પાવર લિસ્ટ 2026માં 23 નવી એન્ટ્રીઓ અને 30 મહિલાઓનો સમાવેશ થાય છે, અને તેઓ બ્રિટિશ જાહેર જીવનમાં સાઉથ એશિયન પ્રતિભાની ઊંડાઈને પ્રતિબિંબિત કરતી વિશાળ શ્રેણીના ક્ષેત્રોમાં ફેલાયેલી છે.

ફોરેન ઓફિસ માટે ભારતના ડી ફેક્ટો મિનીસ્ટર એમપી સીમા મલ્હોત્રા 16મા સ્થાને છે. તો ડૉ. પાર્લામેન્ટરી અંડર સેક્રેટરી ઓફ ધ સ્ટેટ ઝુબીર અહેમદ 18મા અને કનિષ્ક નારાયણ 20મા સ્થાને છે. જ્યારે ડેપ્યુટી સ્પીકર અને વેઝ એન્ડ મીન્સના ચેરમેન નુસરત ગની 50મા સ્થાને છે.

બાર્કલેઝ રિટેલ કંપનીના વડા વિમ મારુ 25મા સ્થાને; ટેસ્કો યુકેના ચીફ એક્ઝિક્યુટિવ અશ્વિન પ્રસાદ 23મા સ્થાને; શેલ યુકેના ચેર અને શેલ ગ્રુપના એક્ઝિક્યુટિવ વાઇસ પ્રેસિડેન્ટ પરમિન્દર કોહલી 53મા સ્થાને છે જેઓ કોર્પોરેટ ક્ષેત્રમાં સઉથ એશિયનોની સફળતા દર્શાવે છે.

HSBCના ચીફ ફાઇનાન્શિયલ ઓફિસર પામ કૌર 54મા સ્થાને; ડિયાજિયોમાં સમાન ભૂમિકા ભજવતા નિક ઝાંગિયાની 62મા સ્થાને; લોર્ડ જીતેશ ગઢિયા 14મા સ્થાને અને ડૉ. સ્વાતિ ઢીંગરા 24મા સ્થાને છે જેઓ તેમના પ્રભાવ માટે યુકેમાં જાણીતા છે.

AMGના એક્ઝિક્યુટિવ એડિટર શૈલેષ સોલંકીએ જણાવ્યું હતું કે, “શબાના મહેમૂદ દેશની એક મહાન ઓફિસનું નેતૃત્વ કરે છે અને સરકારના ટોચ પર તેમનો ઉદય દર્શાવે છે કે આપણા સમયના સૌથી મહત્વપૂર્ણ પડકારોમાંના એક – ઇમિગ્રેશનનો સામનો કરવા માટે વડા પ્રધાન તેમને કેટલી સારી રીતે માને છે.”

તેમણે ઉમેર્યું હતું કે “સરકારમાં સેવા આપતા એશિયનોની સંખ્યામાં વધારો, પછી ભલે તે સ્ટેટ સેક્રેટરી હોય, જુનિયર મિનિસ્ટર હોય, વેપાર દૂત હોય કે સિવિલ સર્વન્ટ્સ હોય, તે સમુદાયના રાજકીય પ્રભાવને પ્રતિબિંબિત કરે છે અને આ તાજેતરના વર્ષોમાં રાજકીય જોડાણમાં વધારો થવાનું પરિણામ છે. અમે વ્યાવસાયિક સેવાઓમાં એશિયનોના રૂઢિપ્રયોગથી આગળ વધ્યા છીએ. ગયા ઉનાળામાં ચેકર્સ ખાતે વડા પ્રધાન સર કેર સ્ટાર્મર અને નરેન્દ્ર મોદી વચ્ચે થયેલા મુક્ત વેપાર કરાર સાથે, આપણે બંને બાજુ વધુ મુખ્ય ખેલાડીઓ જોવા જઈ રહ્યા છીએ અને તે વાર્તાઓ એશિયનોની આગામી પેઢીને પ્રેરણા આપશે.”

આ ગાલા ઇવેન્ટમાં બ્રિટનના લઘુમતી વંશીય સમુદાયોમાં ટોચની પ્રતિભાની સરાહના કરતા GG2 લીડરશીપ એન્ડ ડાયવર્સિટી એવોર્ડ્સનું આયોજન પણ કરાયું હતું.

પાવર લીસ્ટના જજીસે સરકારના મહાન પદોમાંથી એકમાં શબાના મહેમૂદના ઉદયની નોંધ લીધી હતી જેના કારણે તેઓ આ વર્ષે GG2 પાવર લિસ્ટમાં ટોચ પર પહોંચ્યા હતા. મહમૂદની આ ભૂમિકામાં ઇમિગ્રેશન, કાયદો અને વ્યવસ્થા, પોલીસિંગ, રાષ્ટ્રીય સુરક્ષા અને આતંકવાદ વિરોધી ક્ષેત્રોનો સમાવેશ થાય છે.

આ મહિનાની શરૂઆતમાં, તેમણે ઇમિગ્રેશન પર પોતાના કડક વલણનો ખુલાસો કરતા કહ્યું કે તેઓ બ્રિટનની સરહદો પર “વ્યવસ્થા અને નિયંત્રણ પુનઃસ્થાપિત” કરી રહ્યા છે અને એસાયલમ પ્રણાલીમાં તેમનો સુધારો “મક્કમ પરંતુ વાજબી” છે.

ભૂતપૂર્વ ટોરી જસ્ટીસ સેક્રેટરી અને હવે ધ સ્પેક્ટેટરના એડિટર માઈકલ ગોવે તેમને લેબર સરકારમાં “સૌથી પ્રભાવશાળી વ્યક્તિ” ગણાવી આગાહી કરી હતી કે તેઓ એક દિવસ લેબર પાર્ટીનું નેતૃત્વ કરશે.

શબાના મહમૂદ બર્મિંગહામના સ્મોલ હીથમાં ઉછર્યા હતા અને ઓક્સફોર્ડની લિંકન કોલેજમાં લોનો આભ્યાસ કરતા પહેલા કિંગ એડવર્ડ VI કેમ્પ હિલ સ્કૂલ ફોર ગર્લ્સમાં ભણ્યા હતા. 2010માં તેઓ બર્મિંગહામ લેડીવુડના સાંસદ તરીકે પ્રથમ વખત ચૂંટાયા હતા અને લોર્ડ ચાન્સેલર તરીકે સેવા આપનાર પ્રથમ મુસ્લિમ મહિલા હતા. તે વખતે તેમણે કુરાન પર શપથ લીધા હતા અને છેલ્લા 1,400 વર્ષમાં આવું કરનારી પહેલી વ્યક્તિ હતાં.

ગયા વર્ષે લેબર પાર્ટી કોન્ફરન્સને સંબોધિત કરતાં તેમણે કહ્યું હતું કે “લેબર હોમ સેક્રેટરી તરીકે પહેલીવાર તમને સંબોધિત કરવું એક સન્માન છે અને તેની મેં ક્યારેય અપેક્ષા રાખી નહોતી. 1970ના દાયકામાં મારા માતાપિતા પહેલી વાર અહીં આવ્યા ત્યારે તેમના માટે આ એક અકલ્પનીય બાબત હતી.”

ગયા સમરમાં બકિંગહામ પેલેસમાં નાઈટહૂડનું બહુમાન મેળવનાર અને યુએસ પ્રમુખ ડોનાલ્ડ ટ્રમ્પના હુમલાઓનો વારંવાર સામનો કરનાર લંડનના મેયર સર સાદિક ખાને કહ્યું હતું કે “ટ્રમ્પ મને કેમ પસંદ નથી કરતા? હું એક એવા શહેરના મેયર છું જે વૈવિધ્યસભર, પ્રગતિશીલ અને અતિ સફળ છે. અમે બતાવ્યું છે કે તેમનો થીસીસ ખોટો છે. જો લંડન એક અલગ દેશ હોત તો આપણે યુરોપમાં સાતમું સૌથી મોટું અર્થતંત્ર હોત. આપણે દેશની GDPમાં ચોથા ભાગથી વધુ અને ટ્રેઝરીમાં £43 બિલિયનથી વધુનું યોગદાન આપીએ છીએ.”

વડા પ્રધાન સર કેર સ્ટાર્મરના મુખ્ય સહાયકોમાંના એક, વિદ્યા અલેકેસનનો જન્મ બ્રિટિશ શ્રીલંકન પરિવારમાં થયો હતો અને તેમણે ઓક્સફોર્ડ અને લંડન સ્કૂલ ઓફ ઇકોનોમિક્સમાં શિક્ષણ મેળવ્યું હતું. 2024 ની સામાન્ય ચૂંટણી પહેલા લેબર પાર્ટીના બિઝનેસ નેતાઓ સાથેના સંબંધોને ફરીથી સારા બનાવવાનો શ્રેય તેમને આપવામાં આવ્યો હતો.

કોર્ટ ઓફ અપીલના સર રબિન્દર વરિષ્ઠ અદાલતોના ઉચ્ચતમ સ્તર પર સેવા આપનારા પ્રથમ એથનિક વ્યક્તિ અને હાઇકોર્ટમાં નિયુક્ત થયેલા પ્રથમ શીખ હતા.

1966માં મૈસુરમાં જન્મેલા અને MITમાં તાલીમ પામેલા, બાર્કલેઝના CEO વેંકટકૃષ્ણનના વડપણ હેઠળ 335 વર્ષ જૂની બાર્કલેઝ બેંકે 2025માં £9.1 બિલિયનનો ટેક્સ પહેલાનો નફો નોંધાવ્યો હતો.

ડાઉનિંગ સ્ટ્રીટ છોડ્યા પછી ભૂતપૂર્વ વડા પ્રધાન સુનક ઓક્સફર્ડ અને હૂવર ઇન્સ્ટિટ્યુશન ખાતે બ્લાવ્ટનિક સ્કૂલ ઓફ ગવર્નમેન્ટમાં જોડાયા છે, અને ગોલ્ડમેન સૅક્સ, માઇક્રોસોફ્ટ અને એન્થ્રોપિકના પાર્ટ-ટાઇમ સલાહકાર તરીકે કામ કરે છે. તેમણે ફેબ્રુઆરીમાં નવી દિલ્હીમાં ઇન્ડિયા એઆઈ ઇમ્પેક્ટ સમિટમાં દલીલ કરી હતી કે ભારત એઆઈ વિકાસના આગામી તબક્કાનું નેતૃત્વ કરવા માટે અનન્ય રીતે સ્થાન ધરાવે છે.

યુએસમાં યુકેના વેપાર દૂત અને બિહારના માતાપિતાના ઘરે સાઉથ શિલ્ડ્સમાં જન્મેલા ચંદ્રા ભારતીય વડા પ્રધાન નરેન્દ્ર મોદી યુકે-ભારત મુક્ત વેપાર કરાર પર હસ્તાક્ષર કરવા આવ્યા ત્યારે ચેકર્સમાં સ્ટાર્મરની સાથે હતા. તેઓ સ્ટાર્મર સાથે ચીન પણ ગયા હતા અને જ્યારે વડા પ્રધાન સ્કોટલેન્ડમાં ટ્રમ્પને મળ્યા ત્યારે ત્યાં હાજર હતા.

GG2 પાવર લિસ્ટમાં ડેમ બોબી ચીમા-ગ્રુબ 17મા સ્થાને; પુષ્પિંદર સૈની 22મા સ્થાને; અનુજા ધીર 34મા સ્થાને; સર અખલાક ચૌધરી 38મા સ્થાને અને કેલી કૌલ 91મા સ્થાને પ્રભાવશાળી એશિયનોમાં સ્થાન ધરાવે છે.

કલામાં, નેશનલ થિયેટરના કલાત્મક દિગ્દર્શક ઇન્ધુ રૂબાસિંઘમ 19મા સ્થાને; અભિનેતા રિઝ અહેમદ 12મા સ્થાને; ડેમ મીરા સ્યાલ 31મા સ્થાને; અભિનેત્રી અંબિકા મોડ 42મા સ્થાને; સિતાર ઉસ્તાદ અનુષ્કા શંકર 78મા સ્થાને અને શિલ્પકાર સર અનીશ કપૂર 80મા સ્થાને છે.

ચેનલ ૪ના ચીફ એક્ઝિક્યુટિવ પ્રિયા ડોગરા 45મા સ્થાને; બીબીસીના અમોલ રાજન 36મા સ્થાને; ચેનલ 4ના કૃષ્ણન ગુરુ-મૂર્તિ 51મા સ્થાને છે.

સાયન્સ, ઇનોવેશન અને ટેકનોલોજી વિભાગના પર્મેનન્ટ સેક્રેટરી ઇમરાન મિયા 32મા સ્થાને; ચૂંટણી પંચના ચિફ એક્ઝીક્યુટીવ વિજય રંગરાજન યાદીમાં 67મા સ્થાને છે.

GG2 લીડરશીપ એન્ડ ડાયવર્સિટી એવોર્ડ્સનું કવરેજ આગામી તા. 4 એપ્રિલના ગરવી ગુજરાતની  આવૃત્તીમાં પ્રકાશિત કરવામાં આવશે.

GG2 પાવર લિસ્ટની નકલો વેચાણ માટે ઉપલબ્ધ છે જે માટે સૌરીન શાહનો [email protected] ઇમેઇલ પર અથવા 020 79281234 પર કૉલ કરી સંપર્ક કરવા વિનંતી છે.

GG2 પાવર લિસ્ટ 2026ના તેજસ્વી તારલાઓ