ભારતમાં જેટ ફ્યુઅલ (એટીએફ)ના ભાવ બુધવારે બમણાથી વધુ વધીને પ્રતિ કિલોલીટર રૂ.2.07 લાખ થયા હતાં, પરંતુ સરકારી માલિકીની તેલ કંપનીઓએ દેશની એરલાઇન્સ પર આ વધારાનો સંપૂર્ણ બોજો નાંખ્યો નથી. સરકારી માલિકીની તેલ કંપનીઓ ડોમેસ્ટિક એરલાઇન્સ માટે એવિએશન ટર્બાઇન ફ્યુઅલ (ATF)ની કિંમત 8.5 ટકા વધારીને રૂ.104,927.18 પ્રતિ કિલોલિટર કરી હતી.
એરલાઇન્સ વિદેશી એરલાઇન્સ તેમજ નોન-શિડ્યુલ્ડ, એડહોક અને ચાર્ટર જેવી અન્ય એરલાઇન્સની સરખામણીમાં ડોમેસ્ટિક એરલાઇન્સે અડધો ભાવ ચુકવવો પડશે. વિદેશી એરલાઇન્સ માટે ભાવ પ્રતિ કિલોલિટર ૧૧૪.૫ ટકા વધીને રૂ. ૨૦૭,૩૪૧.૨૨ થયા છે.
આ ઉપરાંત, કોમર્શિયલ LPGના ભાવમાં પ્રતિ 19 કિલોના સિલિન્ડર દીઠ 195.50 રૂપિયાનો વધારો કરવામાં આવ્યો છે.આ ઉપરાંત કેટલાંક પ્રીમિયમ કે બ્રાન્ડેડ પેટ્રોલ અને ડીઝલના ભાવમા લીટર દીઠ રૂ.1.50નો વધારો થયો છે. જોકે નોર્મલ કે અનબ્રાન્ડેડ પેટ્રોલ ડીઝલના ભાવમાં કોઇ ફેરફાર થયો નથી.
પેટ્રોલિયમ અને કુદરતી ગેસ મંત્રાલયે X પરની એક પોસ્ટમાં જણાવ્યું હતું કે ભારતમાં ATFના ભાવ 2001માં સરકારના નિયંત્રણથી મુક્ત કરવામાં આવ્યા હતા અને આંતરરાષ્ટ્રીય બેન્ચમાર્કના ફોર્મ્યુલાના આધારે માસિક ધોરણે સુધારવામાં આવે છે. હોર્મુઝ સ્ટ્રેટ બંધ થવાને કારણે અને વૈશ્વિક ઉર્જા બજારોમાં અસાધારણ પરિસ્થિતિને કારણે 1 એપ્રિલના રોજ સ્થાનિક બજારો માટે ATFના ભાવમાં 100 ટકાથી વધુનો વધારો થવાની ધારણા હતી. આંતરરાષ્ટ્રીય ભાવમાં થયેલા નોંધપાત્ર વધારાથી સ્થાનિક મુસાફરી ખર્ચને વધતો અટકવવા માટે પેટ્રોલિયમ મંત્રાલયની PSU ઓઇલ માર્કેટિંગ કંપનીઓએ, નાગરિક ઉડ્ડયન મંત્રાલય સાથે પરામર્શ કરીને એરલાઇન્સ પર ફક્ત 25 ટકા (માત્ર રૂ. 15 પ્રતિ લિટર)નો આંશિક અને તબક્કાવાર વધારાનો બોજો નાંખવામાં આવ્યો છે.
