ઇરાન યુદ્ધ વધુ એક વખત શાંતિ અને ધમસાણ વચ્ચે ઝોલા ખાઈ રહ્યું છે. રવિવારે (પાંચ એપ્રિલ)એ પાકિસ્તાનના પ્રયાસો પછી એક તરફ 45 દિવસના યુદ્ધવિરામની તકો ઉજજવળ જણાઈ હતી, બીજી તરફ અમેરિકાના પ્રેસિડેન્ટ ટ્રમ્પે ઈરાન હજી પણ તાબે નહીં થતું હોવાનું ભારે ધૂંધવાટમાં સાથે ધમકી આપી દીધી હતી કે 48 કલાકમાં ઈરાન રાજી નહીં જાય, હોર્મુઝનો જળ માર્ગ ખુલ્લો નહીં કે તો તેની નાગરિક સુવિધાઓ – વીજળી મથકો અને પાણી શુદ્ધીકરણના પ્લાન્ટનો કચ્ચરઘાણ કાઢી નાખીશું.
યુદ્ધવિરામ માટેની દરખાસ્તો બન્ને પક્ષોને પહોંચતી કરાઈ હતી, તો ઈરાને સ્પષ્ટ કર્યું હતું કે, તે કામચલાઉ યુદ્ધવિરામના એક ભાગરૂપે હોર્મુઝ જળ માર્ગ ખુલ્લો નહીં મુકે અને “અમેરિકાની શરતોએ તે યુદ્ધવિરામ પણ નહીં સ્વીકારે. બીજી તરફ અમેરિકાના વાઈસ પ્રેસિડેન્ટ ડી વેન્સ યુદ્ધવિરામ માટે અવિરત પ્રયાસો કરતાં હોવાના અહેવાલો મળે છે.
વેન્સની દરખાસ્ત મુજબ અમેરિકા યુદ્ધવિરામના પગલે 15-20 દિવસ શાંતિની સમજુતી માટે મંત્રણાનો ગાળો રાખવામાં આવે. પડદા પાછળના શાંતિના પ્રયાસોમાં પાકિસ્તાનના સર્વોચ્ચ સેનાપતિ ફિલ્ડ માર્શલ આસિમ મુનિર સંકલન કરી રહ્યાં હતાં. તો અમેરિકા તરફે જે ડી વેન્સ તથા ટ્રમ્પના ખાસ દૂત સ્ટીવ વિટકોફ તથા ઈરાન તરફે વિદેશ પ્રધાન અબ્બાસ અરાગાચી સક્રિય હતાં.
ઈરાને તેના સત્તાવાર પ્રતિભાવમાં કહ્યું હતું કે, તહેરાને યુદ્ધવિરામ માટેની પોતાની શરતો અને અપેક્ષાઓ તૈયાર કરી મધ્યસ્થીઓ દ્વારા સામે પક્ષે પહોંચાડી છે, પણ અમેરિકાની બેફામ શરતો અને અપરાધોના કૃત્યો ગણાય તેવી ધમકી અને અલ્ટીમેટમને શરણે તે થવાનું નથી. ઈરાને અમેરિકી પ્રતિબંધો અને વેપાર નિયંત્રણો હટાવવાની માંગણી કરી છે, તો ટ્રમ્પનું તંત્ર ઈરાન યુરેનિયમ સમૃદ્ધિકરણનો કાર્યક્રમ સદંતર બંધ કરે,
તમામ પ્રકારની અણુવિકાસની પ્રવૃત્તિઓ પડતી મુકે તેવો છે. ઈરાનના નેતાઓ, અધિકારીઓને ડર છે કે ગાઝા અને લેબોનનમાં જે પ્રકારના એક્તરથી યુદ્ધવિરામો થયા છે તેવું ઈરાન સમાધાન થઈ શકે. તેમાં સમાધાન કાગળ ઉપર જ રહી જાય તો અમેરિકા અને ઈઝરાયેલને મનસ્વી રીતે ગમે ત્યારે હુમલા કરવાની છુટ મળી જાય છે.
દરમિયાન, ઈરાનની સીમામાં તોડી પડાયેલા અમેરિકન F-15 ફાઈટર જેટના પાયલોટને બચાવવાનું સાહસિક ઓપરેશન અમેરિકાના કમાન્ડોએ સફળતાપૂર્વક પાર પાડયું હતું. તેમણે ઇરાનમાં ઘૂસીને પોતાના પાયલોટને બચાવી લીધો હતો.
