ઈરાનના યુદ્ધના કારણે દુબઈના સત્તાધિશોએ 31 મે સુધી વિદેશી એરલાઇન્સને તેના એરપોર્ટ પર દરરોજ માત્ર એક જ ફ્લાઇટનું સંચાલન કરવાની મર્યાદા લાદતા ભારતની વિવિધ એરલાઇન્સ કંપનીઓમાં આવક ગુમાવવાનો ડર વ્યાપ્યો છે. ભારતીય કંપનીઓએ અન્ય કોઈપણ દેશની એરલાઇન્સ કરતાં વધુ ફ્લાઇટ્સના સંચાલનનું આયોજન કર્યું હતું. આ સ્થિતિ અંગે તેમણે ભારત સરકારને પત્રો પણ લખ્યા છે.
ભારતની ઇન્ડિગો, એર ઇન્ડિયા અને સ્પાઇસજેટ જેવી એરલાઇન્સનું પ્રતિનિધિત્વ કરી રહેલ ફેડરેશન ઓફ ઇન્ડિયન એરલાઇન્સે (FIA) ભારત સરકારને પત્ર દ્વારા દુબઈના સત્તાધિશોને આવા પ્રતિબંધો હટાવવા દબાણ કરવા અને જો તેવું ન થઇ શકે તો, અમીરાત અને ફ્લાયદુબઈ સહિતની સ્થાનિક એરલાઇન્સ સામે પરસ્પર કાર્યવાહી કરવા માટે વિચારવા જણાવ્યું હતું. આ પત્ર 31 માર્ચના રોજ મોકલવામાં આવ્યો હતો.
અત્રે ઉલ્લેખનીય છે કે, ભારતીય એરલાઇન્સ કંપનીઓ અગાઉથી જ પેટ્રોલની ઊંચી કિંમત અને પશ્ચિમી શહેરોના લાંબા રુટના કારણે નાણાકીય સંકટ અનુભવે છે. આ ઉપરાંત ગત વર્ષથી ભારત-પાકિસ્તાન વચ્ચે ઊભા થયેલા તણાવને કારણે ભારતીય એરલાઇન્સ પર પાકિસ્તાની હવાઈ સરહદનો ઉપયોગ કરવા પર પ્રતિબંધ છે.
મીડિયા રીપોર્ટ મુજબ, દુબઇ એરપોર્ટ્સે 27 માર્ચના રોજ વિવિધ એરલાઇન્સને લખેલા એક ખાનગી ઇમેઇલમાં જણાવ્યું હતું કે, ઉનાળામાં સામાન્ય રીતે વિશ્વમાં સૌથી વ્યસ્ત રહેતા ઇન્ટરનેશનલ ટ્રાવેલ સેન્ટર એવા દુબઈ ઇન્ટરનેશનલ એરપોર્ટ (DXB) અને નાના અલ મક્તૂમ ઇન્ટરનેશનલ એરપોર્ટ (DWC) પર દૈનિક એક રાઉન્ડ ટ્રીપની મંજૂરી આપવામાં આવશે.
બીજી તરફ ભારતીય એવિએશન મંત્રાલયના જણાવ્યા મુજબ, યુદ્ધની સ્થિતિ અને હવાઇ પ્રતિબંધોના કારણે ભારતીય એરલાઇન્સ કંપનીઓએ દસ હજારથી વધુ ફ્લાઇટ્સ રદ્દ કરી હતી. મુખ્ય હવાઇ માર્ગ વ્યાપક બંધ થવાને કારણે એરલાઇન્સ કંપનીઓને યુરોપ અને નોર્થ અમેરિકાની લાંબા રૂટની સર્વિસ સ્થગિત કરવાની અથવા અન્ય વિકલ્પ પસંદ કરવાની ફરજ પડી હતી. મંત્રાલયના જોઇન્ટ સેક્રેટરી અસંગબા ચુબા એઓએ આ સ્થિતિ અંગે મીડિયાને જણાવ્યું હતું કે, ‘સરેરાશ, ભારતીય એરલાઇન્સ કંપનીઓ મધ્ય-પૂર્વના દેશોમાં બંને તરફી દૈનિક 300થી 350 ફ્લાઇટ્સનું સંચાલન કરતી હતી. આજે તે સંખ્યા ઘટીને 80-90 થઈ ગઈ છે. એટલે કે, યુદ્ધ શરૂ થયું એ 28 ફેબ્રુઆરીથી ભારતીય એરલાઇન્સ કંનપીઓ દ્વારા રદ્દ કરાયેલી ફ્લાઇટ્સની સંખ્યા દસ હજારથી વધુ થઈ છે.’ આ ઘર્ષણને કારણે ઇઝરાયલ, જોર્ડન, લેબેનન, કુવૈત, કતાર, બહેરીન અને યુએઈ સહિત પશ્ચિમ એશિયાના ઘણા દેશોમાં હવાઈ વિસ્તાર બંધ કરવામાં આવ્યા છે અથવા ગંભીર પ્રતિબંધો મૂકવામાં આવ્યા છે.
