નાટોના સભ્ય દેશોએ સોમવારે જણાવ્યું હતું કે તેઓ યુએસ પ્રમુખ ડોનાલ્ડ ટ્રમ્પની હોર્મુઝ સ્ટ્રેટની નાકાબંધી કરવાની યોજનામાં સામેલ નહીં થાય. નાટો દેશોએ આની જગ્યાએ યુદ્ધ સમાપ્ત થયા પછી જ હસ્તક્ષેપ કરવાની દરખાસ્ત મુકી હતી. નાટોના આ નિર્ણયથી ટ્રમ્પના પ્રયાસોને ફટકો પડશે.
ઈરાન સાથે છ અઠવાડિયાના સંઘર્ષને સમાપ્ત કરવા માટે સપ્તાહના અંતે થયેલી વાટાઘાટો કોઈ કરાર પર પહોંચવામાં નિષ્ફળ ગયા પછી ટ્રમ્પે કહ્યું હતું કે અમેરિકી આર્મી આ જળમાર્ગમાં તમામ દરિયાઈ ટ્રાફિકને રોકવા માટે અન્ય દેશો સાથે કામ કરશે. જોકે પછી અમેરિકી આર્મીએ સ્પષ્ટતા કરી હતી કે આ નાકાબંધી ફક્ત ઈરાની બંદરો પર જતા અથવા ત્યાંથી આવતા જહાજો પર લાગુ થશે.
28 ફેબ્રુઆરીના રોજ યુદ્ધ શરૂ થયું ત્યારથી, ઈરાને મોટાભાગે તેના પોતાના જહાજો સિવાય તમામ જહાજો માટે સ્ટ્રેટને બ્લોક કરેલી છે. ઇરાન હોર્મુઝ સ્ટ્રેટ પર કાયમી નિયંત્રણ મેળવવા અને સંભવતઃ તેનો ઉપયોગ કરતા જહાજો પાસેથી ટેક્સ વસૂલવાનો પ્રયાસ કરી રહ્યું છે.
બ્રિટન અને ફ્રાન્સ સહિતના નાટો સાથી દેશોએ કહ્યું હતું કે તેઓ નાકાબંધીમાં ભાગ લઈને સંઘર્ષમાં સામેલ થશે નહીં. તેના બદલે તેઓ આ જળમાર્ગ ખોલવાની એક પહેલ પર કામ કરી રહ્યા છે. બ્રિટિશ વડાપ્રધાન કેર સ્ટાર્મરે બીબીસીને જણાવ્યું કે “અમે નાકાબંધીને સમર્થન આપી રહ્યા નથી. મારો નિર્ણય ખૂબ જ સ્પષ્ટ છે કે ગમે તેટલું દબાણ આવે તો પણ અમે યુદ્ધમાં સામેલ થશું નહીં.
