૨૦૨૮ની લોસ એન્જલસ ઓલિમ્પિક્સમાં ક્રિકેટના ઐતિહાસિક પુનરાગમનના પગલે અત્યારે અમેરિકામાં ટિકિટનું બજાર ડીમાન્ડમાં છે. સત્તાવાર પ્લેટફોર્મ પર જાહેર થયેલી વિગતો અનુસાર, આયોજકોએ સામાન્ય જનતા અને પ્રીમિયમ ગ્રાહકો બંનેને ધ્યાનમાં રાખીને ટિકિટના ભાવ નક્કી કર્યા છે.
પોમોના ફેરગ્રાઉન્ડ્સ ખાતે રમાનારી પ્રારંભિક મેચોની ટિકિટો માત્ર $૨૮થી શરૂ થાય છે, જ્યારે ગોલ્ડ મેડલ મેચ જેવી મહત્વની સ્પર્ધાઓ માટે ટિકિટના ભાવ $૭૪થી શરૂ થઈ $૫૦૦ સુધી પહોંચી શકે છે. આ પ્રક્રિયામાં કેલિફોર્નિયાના સ્થાનિક રહીશોને ૨ થી ૬ એપ્રિલ દરમિયાન વિશેષ પ્રી-સેલ વિન્ડો દ્વારા ટિકિટ ખરીદવાની પ્રથમ તક આપીને એક પ્રકારનો શરૂઆતી લાભ અપાયો હતો.
જો કે, સ્ટેડિયમનો સીટિંગ મેપ હજુ જાહેર કરાયો નથી, જેના કારણે દર્શકો માટે સીટની કિંમત અને ત્યાંથી દેખાતા મેદાનના વ્યૂનો સાચો અંદાજ મેળવવો અત્યારે મુશ્કેલ છે. તેમ છતાં, ઓલિમ્પિક ટિકિટોની એકંદર માંગ આશ્ચર્યજનક સ્તરે પહોંચી છે.
અંદાજે ૫૦ લાખ લોકોએ શરૂઆતી ટિકિટ બેલેટ માટે નોંધણી કરાવી છે, જેઓ વિવિધ રમતોની આશરે ૧.૪ કરોડ ટિકિટો મેળવવા માટે સ્પર્ધા કરી રહ્યા છે. પસંદગી પામેલા અરજદારોને ટિકિટ ખરીદવા માટે ચોક્કસ સમય અને ૪૮ કલાકની મર્યાદા આપવામાં આવી છે, જેથી બજારમાં સર્જાનારી અંધાધૂંધી અટકાવી શકાય.
મેદાન બહાર ટિકિટોની હોડ વચ્ચે ક્રિકેટ ટુર્નામેન્ટનું માળખું પણ આકર્ષણનું કેન્દ્ર બન્યું છે. ૨૦૨૮માં પુરુષ અને મહિલા બંને વર્ગની મેચો અત્યંત રોમાંચક અને ટુંકા ટી-20 ફોર્મેટમાં રમાશે. આ સ્પર્ધામાં ત્રણ-ત્રણ ટીમોના બે ગ્રુપ હશે, જેમાં દરેક ટીમ એકબીજા સામે બે વાર મેચ રમશે.
આ રીતે કુલ ૧૨ પ્રારંભિક મેચો રમાશે, જે અત્યંત રસાકસીભરી બની રહેશે કારણ કે આ વખતે ટૂર્નામેન્ટમાં કોઈ સેમી ફાઈનલ નહીં હોય. આમ, દરેક મેચ સીધી મેડલની રેસ નક્કી કરવામાં મહત્વની બની રહેશે. સંક્ષિપ્ત અને ઉચ્ચ તીવ્રતા ધરાવતું આ ફોર્મેટ ઓલિમ્પિકના મંચ પર ક્રિકેટને એક નવા સ્તરે લઈ જશે તેવી અપેક્ષા છે.
