ભરૂચ જિલ્લાના હાંસોટ તાલુકાના અલવા ગામ નજીક બુધવાર, 16 ઓગસ્ટે બે કાર વચ્ચે થયેલા ગોઝારા અકસ્માતમાં એક જ પરિવારના પાંચ લોકોના મોત થયા હતા. કારમાં એક બાળકનો ચમત્કારિક બચાવ થયો હતો. બંને કાર વચ્ચે ટક્કર એટલી જોરદાર હતી કે બંને કારના આગળના ભાગના ફુરચેફુરચા નીકળી ગયા હતા. હાંસોટ પોલીસે ઘટનાસ્થળ પર પહોંચી વધુ તપાસ હાથ ધરી હતી.
આ અકસ્માતમાં ત્રણ મહિલા અને એક પુરૂષનું ઘટના સ્થળ પર મોત નિપજ્યું હતું, જ્યારે એક મહિલા અને એક બાળકની હાલત ગંભીર હતી, જેમાં સારવાર દરમિયાન મહિલાનું મોત થયું હતું. જેને પગલે મોતનો આંક પાંચ પર પહોંચ્યો હતો.
સ્થાનિક મીડિયાના અહેવાલ મુજબ મૃતકોમાં ઈમ્તિયાઝભાઈ પટેલ, તેમના પત્ની સલમાબેન પટેલ, પુત્રી મારિયા દિલાવર પટેલ અને પુત્રી અફિફા સફવાન ઈલ્યાસ અફીણી અને ઈમ્તિયાઝ ભાઈના ભાભી જમિલા પટેલના મોત નિપજ્યા હતા.
ઘટનાની જાણ પોલીસને થતા જ પોલીસ ટીમ ઘટના સ્થળ પર પહોંચી ગઈ હતી, અકસ્માત સ્થળે લોકોના ટોળે ટોળા ભેગા થઈ ગયા હતા, જેને પગલે થોડા સમય માટે ટ્રાફિક જામ જેવી સ્થિતિ સર્જાઈ હતી. પોલીસે મામલો હાથ પર લઈ ટ્રાફિક દુર કર્યો હતો, જ્યારે 108 દ્વારા મૃતકોને પીએમ માટે અને ઘાયલોને સારવાર માટે ખસેડવાની તજવીજ હાથ ધરવામાં આવી હતી.
