સિંગાપોરમાં શાંગરી-લા ડાયલોગમાં અમેરિકાના સંરક્ષણ પ્રધાન પીટ હેગસેથે શનિવારે વોર્નિંગ આપી હતી કે ચીન એશિયામાં તાકાતનું સંતુલન બદલવા માટે મોટી લશ્કરી કાર્યવાહીની તૈયારી રહી રહ્યું છે. અમેરિકા ચીનની ધમકીઓનો સામનો કરવા માટે તેની વ્યૂહરચના બદલી રહ્યું છે. એશિયામાં અમેરિકાના સાથી દેશોએ પણ સંરક્ષણ ક્ષમતાને ઝડપથી મજબૂત બનાવવી જોઇએ. અમેરિકા ઈન્ડો-પેસિફિક રિજન માટે સંપૂર્ણપણે પ્રતિબદ્ધ છે.
પેન્ટાગોનના વડાએ કહ્યું હતું કે ચીને ખડો કરેલો ખતરો વાસ્તવિક છે અને તે નિકટવર્તી પણ હોઈ શકે છે. તેમણે તાઇવાન પર આક્રમણ કરવા માટે લશ્કરી ક્ષમતાઓમાં વધારો કરવાનો અને વારંવાર મોટા પાયે લશ્કરી કવાયતો દ્વારા વાસ્તવિક સોદા માટે રિહર્સલ કરવાનો પણ બેઇજિંગ પણ આક્ષેપ કર્યો હતો.
અહીં ઉલ્લેખનીય છે કે આંતરરાષ્ટ્રીય ચુકાદા ચુકાદા હોવા છતાં બેઇજિંગ લગભગ સમગ્ર દક્ષિણ ચીન સમુદ્ર પર પોતાનો દાવો કરી રહ્યું છે અને ફિલિપાઇન્સ સાથેના તાજેતરના સંઘર્ષથી પ્રાદેશિક તણાવમાં વધારો થયો હતો.
એશિયામાં અમેરિકાના સાથી દેશોને ઝડપથી પોતાના સંરક્ષણ ક્ષમતા મજબૂત બનાવવાનો અનુરોધ કરતાં હેગસેથે જણાવ્યું હતું કે અમેરિકા સામ્યવાદી ચીનના આક્રમણને રોકવા માટે પોતાની વ્યૂહરચનામાં ફેરફાર કરી રહ્યું છે.
વેપાર, ટેકનોલોજી અને પ્રાદેશિક પ્રભાવને લઈને વોશિંગ્ટન અને બેઇજિંગ વચ્ચે વધતાં જતાં તણાવ વચ્ચે યુએસ સંરક્ષણ પ્રધાને આ ટીપ્પણી કરી હતી.
ચીનના પગલાંને ખતરાની ઘંટડી ગણાવી તેમણે જણાવ્યું હતું કે ચીન સાયબર હુમલાઓથી લોકોના જીવન જોખમમાં મૂકી રહ્યું છે, પડોશીઓને હેરાન કરી રહ્યું છે અને દક્ષિણ ચીન સમુદ્રમાં ગેરકાયદેસર રીતે જમીનો હડપ કરવા કરી રહ્યું છે. પરંતુ ચીન અમેરિકા કે તેના સાથી દેશો પર પ્રભુત્વ ન મેળવી શકે તેની ખાતરી કરવા યુએસ પ્રતિબદ્ધ છે.
