કિંગ ચાર્લ્સ ત્રીજાએ તેમના ભાઈ અને ભૂતપૂર્વ પ્રિન્સ એન્ડ્રુએ દોષિત જાતીય ગુનેગાર જેફરી એપ્સટાઈન સાથે ગુપ્ત સરકારી દસ્તાવેજો શેર કર્યા હોવાના આરોપો પર “ગહન ચિંતા” વ્યક્ત કરી હોવાની બકિંગહામ પેલેસે પુષ્ટિ આપી છે.
મહારાજાએ કહ્યું હતું કે જો થેમ્સ વેલી પોલીસ આ બાબતે તેમનો સંપર્ક કરશે તો તેઓ સંભવિત તપાસ માટે “સમર્થન કરવા તૈયાર” છે.
નવા અહેવાલો દર્શાવે છે કે એન્ડ્રુએ તેમના ભારતીય મૂળના ભૂતપૂર્વ સહાયક, અમિત પટેલના ઈમેલ સહિત ટ્રેડ એન્વોય અહેવાલો એપ્સટાઈનને ફોરવર્ડ કર્યા હોઈ શકે છે.
પોલીસ રાજાશાહી વિરોધી જૂથ રિપબ્લિક દ્વારા “જાહેર કાર્યાલયમાં શંકાસ્પદ ગેરવર્તણૂક અને સત્તાવાર રહસ્યોના ભંગ” માટે રજૂ કરાયેલા દાવાઓની તપાસ કરી રહી છે. ગયા વર્ષે તમામ શાહી પદવીઓ છીનવી લેવાયા બાદ એન્ડ્રુએ સતત ખોટું કર્યું હોવાનો ઇનકાર કર્યો છે. દરમિયાન તેઓ વિન્ડસર એસ્ટેટ પરના રોયલ લોજમાંથી પણ બહાર નીકળી ગયા છે.
આ કૌભાંડમાં રાજાશાહીને પણ જાહેર તપાસનો સામનો કરવો પડ્યો છે. એન્ડ્રુના વર્તન અંગે લેન્કેશાયરના ક્લિથેરોની શાહી મુલાકાત દરમિયાન રાજા ચાર્લ્સનો વિરોધ કરવામાં આવ્યો હતો. તો પ્રિન્સ વિલિયમ અને કેટ મિડલટને ચિંતા વ્યક્ત કરતા અને ભાર મૂકતા એક નિવેદન બહાર પાડ્યું હતું જેમાં તેમનું ધ્યાન દુર્વ્યવહારનો ભોગ બનેલા લોકો પર રહે છે એમ જણાવાયું હતું.
યુએસ કોંગ્રેસનલ તપાસના ભાગ રૂપે તાજેતરમાં બહાર પાડવામાં આવેલી એપ્સટાઇન ફાઇલોના આરોપોમાં એવા દાવાઓ કરાય છે કે એપ્સટાઇન દ્વારા એન્ડ્રુને મળવા માટે મહિલાઓને મોકલવામાં આવી હતી.
થેમ્સ વેલી પોલીસ અને મેટ્રોપોલિટન પોલીસ તેમના મૂલ્યાંકન ચાલુ રાખી રહી છે અને રાજકીય નેતાઓ પારદર્શિતા માટે હાકલ કરે છે.
