ભારતની ટેક્સટાઈલ ઇન્ડસ્ટ્રીના દિગ્ગજ અને અગ્રણી કંપની ‘રેમન્ડ ગ્રુપ’ના ભૂતપૂર્વ ચેરમેન વિજયપત સિંઘાનિયાનું શનિવાર, 28 માર્ચે મુંબઈમાં નિધન થયું હતું. તેઓ 87 વર્ષના હતાં. રાજકીય નેતાઓ અને કોર્પોરેટ વડાઓ સહિતના અનેક મહાનુભાવોએ તેમને શ્રદ્ધાંજલિ અર્પી હતી.
વિજયપત સિંઘાનિયાએ રેમન્ડ ગ્રુપને નવી ઊંચાઈઓ પર પહોંચાડવામાં મહત્ત્વની ભૂમિકા ભજવી હતી. તેમના નેતૃત્વ હેઠળ રેમન્ડ ભારતની સૌથી મોટી અને લોકપ્રિય ફેબ્રિક બ્રાન્ડ તરીકે ઉભરી આવી હતી. વ્યાપાર ક્ષેત્રે તેમના અમૂલ્ય યોગદાન બદલ ભારત સરકારે તેમને દેશના ત્રીજા સર્વોચ્ચ નાગરિક સન્માન ‘પદ્મભૂષણ’ થી નવાજ્યાં હતાં.
તેઓ માત્ર એક સફળ બિઝનેસમેન જ નહીં, પરંતુ એક સાહસિક પાયલટ પણ હતા. તેમણે વર્ષ 2005માં સૌથી વધુ ઊંચાઈ પર હોટ એર બલૂન ઉડાવવાનો વિશ્વ રેકોર્ડ બનાવ્યો હતો. આ ઉપરાંત તેમણે લંડનથી દિલ્હી સુધી સોલો ફ્લાઈટ (એકલા વિમાન ઉડાવવાનું) સાહસ પણ કર્યું હતું.
જીવનના અંતિમ વર્ષોમાં પુત્ર ગૌતમ સિંઘાનિયા સાથેના પારિવારિક અને મિલકત સંબંધિત વિવાદ થયો હતો. તેઓ 2000 સુધી કંપનીના ચેરમેન હતાં. ગૌતમને કંપનીની કમાન સોંપ્યા પછી તેમણે પોતાનો સમગ્ર 37 ટકા હિસ્સો પણ ટ્રાન્સફર કર્યો હતો.
