અમેરિકામાં ફીઝિશિયન્સની વધતી જતી અછતને કારણે કોંગ્રેસમાં થયેલી ચર્ચામાં એક નવી ખામી બહાર આવી છે, જે અમેરિકામાં કામ કરવા ઇચ્છતા ભારતીય મેડિકલ ગ્રેજ્યુએટ્સને સીધી અસર કરી શકે છે.
આ ચર્ચાના કેન્દ્રમાં નવા H-1B વિઝા માટે એક લાખ ડોલરની ફીનો મુદ્દો છે, જે અત્યારે એમ્પ્લોયર દ્વારા ચૂકવાતા પ્રોસેસિંગ ખર્ચ કરતાં ઘણી વધારે છે. 24 ફેબ્રુઆરીએ સાંસદોએ મુદ્દો ઉઠાવ્યો હતો કે, આવા પગલાથી ગ્રામીણ હોસ્પિટલોને વિદેશી તાલીમબદ્ધ ડોકટરોની ભરતી કરવામાં રૂચિ રહેશે નહીં. ગ્રામીણ અમેરિકામાં ગ્રેજ્યુએટ મેડિકલ એજ્યુકેશનના વ્યાપ અને હેલ્થ કેર વ્યવસ્થાને મજબૂત બનાવવા માટે વેઝ એન્ડ મીન્સ હેલ્થ સબકમિટીની સુનાવણી દરમિયાન આ મુદ્દો ચમક્યો હતો.
આ ચર્ચા દરમિયાન ભારતનો સીધો ઉલ્લેખ કરાયો નહોતો. જોકે, ભારતીય નાગરિકો, ઐતિહાસિક રીતે અમેરિકામાં વિશેષમાં ઇન્ટરનલ મેડિસીન, ફેમિલી મેડિસીન તથા અન્ય પ્રાથમિક સારવારના ક્ષેત્રે વિદેશી મેડિકલ ગ્રેજ્યુએટસના સૌથી મોટા ગ્રુપમાં સ્થાન ધરાવે છે.
ભારત જેવા દેશોના ઘણા વિદેશી મેડિકલ ગ્રેજ્યુએટ્સ, ગ્રામીણ અને મેડિકલની સુવિધાનો અભાવ ધરાવતા વિસ્તારોમાં કાર્યરત છે. આ અંગે સાંસદોએ નોંધ્યું હતું કે, વિઝા ફીમાં માતબર વધારો થવાના કારણે નાની સામુદાયિક હોસ્પિટલો માટે વિદેશી ડોકટરોની ભરતી કરવાનું નાણાકીય રીતે અશક્ય બની શકે છે.
આમ, પણ આ હોસ્પિટલો અગાઉથી જ મર્યાદિત બજેટમાં કાર્યરત છે. કોંગ્રેસમેન એડ્રિયન સ્મિથે ચેતવણી આપી હતી કે, અમેરિકા અત્યારે ‘એક ખૂબ જ વાસ્તવિક મુશ્કેલીનો સામનો કરી રહ્યું છે કે, આરોગ્ય તંત્રમાં કર્મચારીઓ ઝડપથી ઘટી રહ્યા છે. વર્તમાન સ્થિતિ અનુસાર 2037 સુધીમાં, દેશમાં 187,000 ફીઝિશિયન્સની અછત દેખાશે. આગામી દસકામાં પ્રેક્ટિસ કરી રહેલા ફીઝિશિયન્સમાંથી અડધા જેટલા નિવૃત્ત થશે.’
