ભારત સરકારે ગુરુવાર, 12 ફેબ્રુઆરી એર ફોર્સ માટે વધુ રાફેલ ફાયટર જેટ અને નેવી માટે બોઇંગ P-8I રિકોનિસન્સ એરક્રાફ્ટની ખરીદી સહિત ભારતીય લશ્કરી દળોની લડાયક ક્ષમતામાં વધારો કરવા માટે રૂ.3.6 લાખ કરોડ ($40 બિલિયન)ના શસ્ત્રોની ખરીદીની મેગાડીલને મંજૂરી આપી હતી. પાકિસ્તાન સહિત તેના પડોશીઓ સાથે વધતા તણાવને કારણે ભારતની સેનાને આધુનિકીકરણ કરવાની ફરજ પડી છે.
સરકારે 114 રાફેલ યુદ્ધવિમાનો અને છ બોઇંગ P8-I સર્વેલન્સ વિમાન સહિતની દરખાસ્તોને મંજૂરી આપી છે. ફ્રાન્સ પાસેથી સરકાર-સરકાર વચ્ચેના માળખા હેઠળ 18 રાફેલ વિમાનની સીધી ખરીદી કરાશે, જ્યારે બાકીના વિમાનનું ભારતમાં ઉત્પાદન થશે.
સંરક્ષણ પ્રધાન રાજનાથ સિંહની અધ્યક્ષતામાં યોજાયેલી ડિફેન્સ એક્વિઝિશન કાઉન્સિલ (DAC)ની બેઠકમાં આ દરખાસ્તને મંજૂરી અપાઈ હતી. તેમાં અમેરિકામાં ઉત્પાદિત વધારાના છ બોઇંગ P8-I સર્વેલન્સ વિમાનની ખરીદીનો પણ સમાવેશ થાય છે.
મલ્ટી-રોલ ફાઇટર એરક્રાફ્ટ (MRFA) પ્રોજેક્ટ હેઠળ રાફેલની ઉત્પાદક કંપની દસોલ્ટ એવિએશન ઉડ્ડયન માટે સજ્જ હોય તેવા 18 વિમાનો પૂરા પાડશે. બાકીના વિમાનોનું સ્વદેશી સામગ્રી સાથે ભારતમાં ઉત્પાદન કરાશે. ફ્રાન્સના પ્રેસિડન્ટ ઇમેન્યુઅલ મેક્રોનના ભારત પ્રવાસના ચાર દિવસ પહેલા રાફેલ વિમાનો ખરીદવાની આ દરખાસ્તને મંજૂરી અપાઈ છે. રાફેલ ખરીદી યોજના પર પ્રધાનમંત્રીના નેતૃત્વ હેઠળની સુરક્ષા અંગેની કેબિનેટ સમિતિમાં ટૂંક સમયમાં ચર્ચા થવાની ધારણા છે.
મેક્રોનના પ્રવાસ દરમિયાન ભારત અને ફ્રાન્સ સરકાર વચ્ચે આ પ્રોજેક્ટ પર કરાર થવાની ધારણા છે.
એપ્રિલ 2019માં ઇન્ડિયન એરફોર્સે આશરે 18 અબજ ડોલરના ખર્ચે 114 મલ્ટી-રોલ ફાઇટર એરક્રાફ્ટ (MRFA) ખરીદવા માટે RFI (માહિતી માટે વિનંતી) અથવા પ્રારંભિક ટેન્ડર જારી કર્યાં હતાં. તેને તાજેતરના વર્ષોમાં વિશ્વના સૌથી મોટા લશ્કરી ખરીદી કાર્યક્રમ ગણવામાં આવે છે. આ મેગા પ્રોજેક્ટના અન્ય દાવેદારોમાં લોકહીડ માર્ટિનના F-21, બોઇંગના F/A-18 અને યુરોફાઇટર ટાયફૂનનો સમાવેશ થાય છે.
ભારતીય વાયુસેના માટે મલ્ટી રોલ ફાઇટર એરક્રાફ્ટ (MRFA) રાફેલ, કોમ્બેટ મિસાઇલો અને એર-શિપ આધારિત હાઇ એલ્ટિટ્યુડ સ્યુડો સેટેલાઇટ (AS-HAPS)ની ખરીદીની દરખાસ્તને મંજૂરી અપાઈ છે. આ આર્મી માટે એન્ટી-ટેન્ક માઇન્સ (વિભાવ), T-72 ટેન્ક અને ઇન્ફન્ટ્રી કોમ્બેટ વ્હીકલ્સ (BMP-II)ની ખરીદી તથા આર્મર્ડ રિકવરી વ્હીકલ્સ (ARVs)ના વ્હિકલ પ્લેટફોર્મમાં સુધારાની દરખાસ્તને મંજૂરી અપાઈ છે.
