અમેરિકા-ઈઝરાયલ દ્વારા ઇરાન પર હુમલા પછી ઈરાને વળતો પ્રહાર કર્યો છે. શનિવારે ઇઝરાયલે ઇરાનના પાટનગર તહેરાન સહિત અનેક શહેરો પર હુમલો કર્યો છે.
અત્યાર સુધી તહેરાનમાં જ્યાં હુમલા કરાયા છે તેમાં ઇન્ટેલિજન્સ મંત્રાલય, સંરક્ષણ મંત્રાલય, સુપ્રીમ લીડર ખામેનીની ઓફિસ અને ઇરાનનું પરમાણુ ઊર્જાનું સ્થળનો સમાવેશ થાય છે. હુમલા બાદ ખામેનીને સુરક્ષિત સ્થળે ખસેડવામાં આવ્યા છે. ઇરાને પણ ઇઝરાયલ પર જવાબી હુમલા શરૂ કર્યા છે. મીડિયા રિપોર્ટ મુજબ, ઇરાને કતાર, બહેરીન સહિત સાત દેશોમાં અમેરિકી મિલિટરી સ્ટેશનો પર 400 જેટલી મિસાઈલોથી હુમલો કર્યો હતો. સ્થાનિકો આ હુમલાઓના વીડિયો સોશિયલ મીડિયા પર પોસ્ટ કરી રહ્યા છે. ઈરાને જે દેશોને નિશાન બનાવ્યા છે તેમાં કતાર, બહેરીન, કુવૈત, સાઉદી, જોર્ડન અને અબુ ધાબીનો સમાવેશ થાય છે. હુમલાના વીડિયો ખૂબ જ ભયાવહ છે. તેમાં આગના ગોળા અને ધુમાડાને સ્પષ્ટ જોઈ શકાય છે. ઇઝરાયલે ઇરાન વિરુદ્ધ પોતાના નવા અભિયાનનું નામ ‘લાયન્સ રોર’ (સિંહની ગર્જના) રાખ્યું છે. જ્યારે અલ ઝઝીરાએ અમેરિકન અધિકારીઓને ટાંકીને જણાવ્યું કે આ અમેરિકા અને ઇઝરાયલની જોઇન્ટ મિલિટરી કાર્યવાહી છે.
આ હુમલો ઈરાન અને અમેરિકા વચ્ચે પરમાણુ હથિયારો મુદ્દે થઇ રહેલી ચર્ચા દરમિયાન થયો છે. અમેરિકન પ્રેસિડેન્ટ ડોનાલ્ડ ટ્રમ્પે ઈરાન પર હુમલાની ધમકી આપી હતી. તેમણે કહ્યું કે આ કાર્યવાહીનો હેતુ અમેરિકા અને તેના લોકોને ખતરાથી બચાવવાનો છે. ટ્રમ્પના જણાવ્યા મુજબ, અમેરિકન સેના ઈરાનની મિસાઈલોને નષ્ટ કરવા અને તેના મિસાઈલ પ્રોગ્રામને ખતમ કરવાનો પ્રયાસ કરી રહી છે.
