એજ્યુકેશન સેક્રેટરી બ્રિજેટ ફિલિપ્સને લેબરના ડેપ્યુટી લીડરશીપ માટે પોતાની ઉમેદવારીની સત્તાવાર જાહેરાત કરી છે. તેઓ એન્જેલા રેનરના રાજીનામા બાદ આ સ્પર્ધામાં ઉતરનાર સૌથી વરિષ્ઠ વ્યક્તિ બન્યા છે.
ડાબેરી ઉમેદવાર અને ક્લેફામ અને બ્રિક્સટન હિલના સાંસદ બેલ રિબેરો-એડી ઉપરાંત ફોરેન અફેર્સ સિલેક્ટ કમિટીના અધ્યક્ષ એમિલી થોર્નબેરીએ પણ રસ દર્શાવ્યો છે. શબાના મહમૂદ અને લુઇસ હેઈ સહિત અન્ય વરિષ્ઠ નેતાઓએ મંત્રીપદની જવાબદારીઓનો ઉલ્લેખ કરીને પોતાને બહાર રાખવાનો ઇનકાર કર્યો છે. લ્યુસી પોવેલ ટૂંક સમયમાં પોતાની બીડની જાહેરાત કરે તેવી અપેક્ષા છે.
ઉમેદવારોએ ગુરુવાર સુધીમાં ઓછામાં ઓછા 80 લેબર સાંસદો પાસેથી નામાંકન મેળવવું આવશ્યક છે, તે સાથે 5% મતવિસ્તારના પક્ષો અથવા ત્રણ સંલગ્ન સંગઠનો, જેમાં બે ટ્રેડ યુનિયનોનો સમાવેશ થાય છે, તેમનું સમર્થન મેળવવાનું રહેશે. જે લોકો થ્રેશોલ્ડ પૂર્ણ કરશે તેઓ પાર્ટીના સભ્યોના મતદાનનો સામનો કરશે. આ માટેનું મતદાન 8 થી 23 ઓક્ટોબર સુધીમાં સુનિશ્ચિત કરાયું છે અને 25 ઓક્ટોબરે વિજેતાની જાહેરાત કરવામાં આવશે.
ડેપ્યુટી લીડરશીપ સ્પર્ધા આગામી સામાન્ય ચૂંટણી પહેલા પાર્ટીની દિશા નક્કી કરશે તેવી અપેક્ષા છે, જેમાં ઉમેદવારો સભ્યો અને સંલગ્ન જૂથો બંનેને અપીલ કરવા માટે સ્પર્ધા કરશે.
