ઇંગ્લેન્ડમાં રેસિડેન્ટ ડોકટરોએ પગાર અને વર્કફોર્સ અંગેની સરકારી ઓફરને નકારી કાઢ્યા બાદ મંગળવારે છ દિવસની હડતાળ શરૂ કરી છે જે ઇસ્ટર હોલીડેના સમયગાળા એટલે કે 13 એપ્રિલની સવાર સુધી ચાલશે. હતી. બ્રિટિશ મેડિકલ એસોસિએશન (BMA) એ કહ્યું કે આ ડીલ વર્ષોથી ચાલી રહેલા પગાર ઘટાડા અને સ્ટાફિંગ દબાણને લાગુ પડતું નથી. બીજી તરફ સરકારે 1,000 વધારાની સ્પેશિયાલિટી તાલીમ પોસ્ટ્સ માટે ભંડોળ પૂરું પાડવાનું વચન પાછું ખેંચી લીધું છે.
વડા પ્રધાન કેર સ્ટાર્મર દ્વારા કોઈપણ કરાર વિના નક્કી કરાયેલ 48 કલાકના અલ્ટીમેટમની સમાપ્તિ પછી 7 એપ્રિલ, 2026 ના રોજ સેન્ટ્રલ લંડનમાં સેન્ટ થોમસ હોસ્પિટલની બહાર છ દિવસની રેસિડેન્ટ ડોકટરોની હડતાળના પહેલા દિવસે સ્ટાફ સભ્યોએ પ્લેકાર્ડ પકડીને ધરણાની લાઇન પર ઊભા રહ્યા હતા.
હેલ્થ સેક્રેટરી વેસ સ્ટ્રીટીંગે જણાવ્યું હતું કે ‘’સરકાર દર્દી સેવાઓ માટે જરૂરી ભંડોળ ફાળવશે નહીં. હડતાળથી એનએચએસને દરરોજ અંદાજીત લગભગ 50 મિલિયન પાઉન્ડ અથવા છ દિવસમાં 300 મિલિયન પાઉન્ડનો ખર્ચ થશે. રેસિડેન્ટ ડોકટરોને લેબર સરકાર હેઠળના કોઈપણ જાહેર ક્ષેત્રના જૂથ કરતાં સૌથી વધુ પગાર વધારો મળ્યો હતો પરંતુ તેમણે કોઈ પણ પ્રતિ પ્રસ્તાવ મૂક્યા વિના ઓફરને નકારી કાઢી હતી.’’
સ્ટ્રીટીંગે યુનિયનને પુનર્વિચાર કરવા વિનંતી કરી હતી.
BMA અગાઉ જુનિયર ડોકટરો તરીકે ઓળખાતા લગભગ 55,000 રેસિડેન્ટ ડોકટરોનું પ્રતિનિધિત્વ કરે છે અને તેઓ NHSના તબીબોના લગભગ અડધા છે.
2023ની શરૂઆતથી, BMA એ પગાર અંગે એક ડઝનથી વધુ વખત હડતાળ કરી છે. એક પછી એક સરકારોએ કહ્યું છે કે હડતાળથી રાજ્ય સંચાલિત સેવામાં વેઇટીંગ લીસ્ટ ઘટાડવાના પ્રયાસોને અસર થઈ છે.
